Read Yupik Ezekiel 6 Bible Online

Ezekiel 6 - Yupik bible

Ezekiel 6

¹ATANEQ qanertuq wangnun:

²“Tuquarkaulriami yugmi, Israel-aam ingrii cauluki qanrutesqellemnek qanruski,

³waten qanrulluki: Elpeci, Israel-aam ingriini, niiciu ATANREM Agayutem qanellra! Waten qanertuq; ATANEQ Agayun ingrinun qeminun-llu, ilutulrianun kuignayugnun-llu: Tangerrluku, wiinga, tungaunii wiinga, nuussirpagmek taiciiqua elpecen̄un, piunrirciqanka-llu agayutnguanun agayuyaraci.

⁴Ekuavici yuiruciiqut, aruviarnek-llu ekuavici navguumaciqut; tuqumalriit-llu temait egciiqanka agayutnguarpeci ciuqerritnun.

⁵Ellilarciqanka-llu Israel-aam yuin tuqumalriit temait agayutnguarita ciuqerritnun; cekavciiqanka-llu enrit ekuavigpeci avataitnun.

⁶Nani tamiini uitavigpecen̄i nunarpaci yuiruciiqut, agayularvici-llu piunriumaluteng, tuaten tua-i ekuavici yuiruciiqut piunriumaluteng, agayutnguaci navguumaluteng, aruviarnek ekuavici ilevcimaluteng, piliaqelalci perriumaluteng.

⁷Yuut tamiini tuqucimaciqut, unegtaulriit-llu nallunrirciqaat wiinga ATANRUCIQA.

⁸“Tau͡gaam ilait tuqurqilrianek anagceciiqanka cekavcimaciqut-llu allanun angayuqauvignun,

⁹tamaanciiqut nunameggnek ayagcecimaluteng. Tamaantellermeggni-llu neq'erciqaatnga nallunrirluku wangnun anucimirqecetaallrucirteng kasngunarivkarluki-llu, tua-i-wa ukverilnguut ircaqumegteggun unitellruatnga cucukevkenii wii agayutnguat tau͡gaam cucukellruitki. Assiilnguut-llu atullrita ellaitnek cumaciyaguceciiqai, pellernarqellriit-llu atulteng pitekluki.

¹⁰Nallunrirciqaat-llu wiinga ATANRUCIQA, ellmikun-llu qanellrunriluciqa qanllemni makut ellaitnun tuc'etarkauniluki.”

¹¹Artuqailnguq ATANEQ qanertuq, “Unaceci ulugciki! It'gaci tup'allaraciki! Qiaci angniinaci assiitellriit, pellernarqelriit Israel-aam yuin atullri pitekluki, tua-i tuquarkaungata anguyagkun, piitnakun, cangerlagkun-llu.

¹²Yaaqvanelnguq cangerlagkun tuquciqut; canimelnguq-llu nuussirpagkun tuquciquq; uitatqaumaluni-llu unguvalria piitnakun tuquciquq. Tuaten ayuqellriakun angelria qenertelqa pellugceciiqaqa.

¹³Nallunriciiqerci-llu wii ATANRUCIQA, ilameng tuqumalriit temait sagingakata akunliitni agayutnguat, ekuaviit-llu avataitni, sagingaluteng tamarmeng qertulriit qemit qaingitni, tamarmeng ingrit kangritni, tamarmeng napat meculget aciatni, tamarmeng-llu cuyalilriit napat oak-at aciitni, nani tamiini elliivik'lallritni narnirqellrianek tamalkuitnun agayutnguameggnun.

¹⁴Aa-ang, unatenka yagciiqanka ellaitnun inglukluki, nunat-llu uitaviit tamalkuita yuiruceciiqanka uitaviksunairulluki, yuilqumek ayagluku Riblah tekilluku. Nutaan tuani yuut tamarmeng nallunriciiqaat wii ATANRUCIQA.”