Read Yupik Ezekiel 7 Bible Online

Ezekiel 7 - Yupik bible

Ezekiel 7

¹ATANREM qanrutaanga,

²“Tuquarkaulriami yugmi, waten qanertuq ATANEQ Agayun Israel-aam yuin nuniitnun: Iquklituq! Cetamanun nunam tamarmi kangirainun iquklitlerkaq tekituq!

³“Israel-aam yuini, iquklitlerkam tekitaaci, eq'urtelqa petuiqataraqa elpecen̄un, cuqtarkauluci-llu caliallerpeciuggun; anucimirqecetaarciqamci-llu tamalkuita pellernarqelrialialci pitekluki.

⁴Tangrrinarngaitamci, tuaten-llu takumcukngaunaci; tau͡gaam anucimirqecetaarciqamci pellernarqelriit caliaci pitekluki. Nutaan nallunriciiqerci wiinga ATANRUCIQA.”

⁵Waten qanertuq ATANEQ Agayun: “Pillugnarqellriit kinguqliqu'urluteng tuciiqut elpecen̄un.

⁶Iquklituq. Allamek pikartairutuq. Iquklitlerkaci tekituq.

⁷Assiitellriim tekitarkaqlerpeci waniwa tekitaaci, elpeci nunam yuini; pillerkaq tekituq, erneq canimelliuq, erenra aakulagnam, nunaniryugluni qayagayarauvkenani ingrit qaingitni.

⁸“Waniwa ak'anivkenaku kuvciqaqa eq'urtelqa elpecen̄un, qenertelqa-llu aturciqaqa elpecen̄un, cuqluci-llu caliarpeciuggun, anucimirqecetaarciqamci-llu tamalkuitnek pellernarqelrialiarpecen̄ek.

⁹Tangrrinarngaitamci-llu, tuaten-llu takumcukngaunaci; anucimirqecetaarciqamci umyualngunarqellriit piciryaraci pitekluki. Nutaan nallunriciiqerci wii ATANRUCIQA, piunriritulua.”

¹⁰Erenra piunririlriim agiirtuq! Nangciyaraq anagutuq. Pivaksaraq ilaviirutuq.

¹¹Nangciyaraq naugiuq assiilngurmek amllerivkarluku; kina iliit uitangaituq, wall'u nuuqitenritellrat, wall'u tukuutait; kitumek-llu ellmeggni pinrulriamek ilangqerrngaitut.

¹²Pillerkaq tekituq, erneq canimelliuq. Kipucaraq tuneniaryaraq-llu caungairuciiquq, tua-i-wa qenerta yugugarnun tamalkuitnun tusngiin.

¹³Tuneniartem tegunqiggngaitaa ca akluni tunellni unguvallermeggni. Tua-i-wa qenerta yugugarnun tamalkuitnun tusngiin; angicimangaituq-llu. Yuut assiitellriit anagciigatut.

¹⁴Cupu'uryaraq cupsaaqaat upluteng-llu; tau͡gaam anguyagyartulriartaituq, tua-i-wa qenertelqa yugugarnun tamalkuitnun tusngiin.

¹⁵Nunat tumyaraitni calluagut, naulluunaq piitnaq-llu enet iluatni uitauk; yuilqumi uitalria anguyagmi tuqutaat; nunarpagni-llu uitalria cangerliim piitnam-llu nerciqaak.

¹⁶Ilait anagluteng qimakuneng, ingrini uitaciqut, yaquliyagartun uitaviteng kuignayuut uniskaicetun unguvangnaqluteng, tamarmeng yuuniaraluteng assiilnguteng pitekluki.

¹⁷Tamarmeng unatait cirlaurtut, ciisqurrit-llu pinianateng tuar mertun ayuqluteng.

¹⁸Missuullernek aciiqut, uulegciiqut-llu; kasnguyullrat tamarmeng kegginaita tangellratgun nallunaituq, qamiqurrita nuyait keligaumaciqut, tamarmeng-llu kiaresngiaciiqut.

¹⁹Qerrirliuteteng egtait tumyaranun, suulutaarutait-llu pellernarqellriatun ayuqut; qerrirliutiita suulutaarutiita-llu aviutesciigatait tuani erenrani ATANREM eq'uqertiin; umyuameng piyuutaitnek camirutkesciigatait wall'u aqsiluteng neresciiganateng akikluki. Suulutaam qerrirlim-llu ciuliqagtellruit assiilngurmun.

²⁰Teggalquqegtaaraat kenuguteteng ucuryagutek'lallruit, tau͡gaam tamakut aturluki pellernarqellrianek agayutngualillruut canek-llu allanek pikameggnek uuminarqellrianek; taumek wiinga menuulriatun ayuqlirivkarciqaqa ellaitnun.

²¹“Allanernun nunat allat yuitnun teglegluku teguvkarciqaqa, nunam-llu yuinun assiitellrianun uayaaraqevkarluku; taukut-llu menuurciiqaat.

²²Kegginaqa tuigciiqaqa taukut tungiitnek, qunukataqa Agayuvigpak menuurrniaraat; teglengalriit iterciqaat pellernariluku-llu,

²³yuirucelluku. “Ca tamarmi ayuquciitnariuq nuna muirumauq tuqucilrianek nunarpiit-llu muirumaut nangcilrianek.

²⁴Yurrluunqurrait atanruviit taivkarciqanka enait piksagutesqelluki; ucuryagutek'lallrat piniat arulairciiqaqa, agayularviit-llu pellernariciqait.

²⁵Tememun umyuamun-llu tuknilria nangteqnaq tekiskan, yuarciqut uitanqegcitmek, tau͡gaam nani uitanqegcicetangqerrngaituq.

²⁶Assiitellriit arenqialluguterpiit kinguqliqu'urluteng tuciiqut, qanemcit-llu niicuuminailngurnek taqsuunateng tekirqeciqut; prophet-aat aguaguciiqsaaqait qanrutkesqelluki tekitarkat tangellrit. Tau͡gaam prophet-aat camek elitnaurutkaiciiqut yugnun, ciulirneret-llu ayuqucirtuutekaunateng.

²⁷Angayuqaq tuquilriatun ayuqeciquq, atanerruaq-llu ciunerkairuciiquq, yuut-llu uullegciiqut alingem ugaani. Ellaita piciryarait maliggluki wii piciqanka, cuqciiqanka-llu ellaita cuqciyaraicetun; ellaita-llu nallunriciiqaat wii ATANRUCIQA.”