Read Yupik Ezekiel 8 Bible Online

Ezekiel 8 - Yupik bible

Ezekiel 8

¹Allrakut arvinelgatni, iralut arvinelgat tallimanek ernengqerluku, enemni aqumgaurainanemni, Judah-m ciulirneri aqumgaluteng ciuqamni, alqunaq ATANREM Agayutem pinia wangnun tut'ellruuq.

²Ciugglua tangertua yugtun elucilegmek; qukaminek ayagluni acitmun temii ayuquq kenertun, qukaminek-llu qulmun ciqinqerluni punernertun qevlercaumalriatun ayuqluni.

³Yagtaa-llu unacetun elucilek, qecugmiglua-llu nuyamkun. Tua-llu wani tangrruami Agayutem anerneran nalugaanga akunliignun nunam qiliim-llu, ayaullua-llu Jerusalem-aamun. Agutaanga-llu iteryaraan ilulirneranun negeqliim ikirtuqaan Agayuvigpiim, tuani agayutnguaq uitauq Agayutem eq'ukekii.

⁴Tuani-llu tangrraqa qitngirnarqelria tanqik nasvagtii Agayutiin Israel-aam uitacian, tangllemtun ayuqluni Chebar-am Kuigan caniani uitallemni.

⁵Agayun-llu qanertuq wangnun, “Tuquarkaulriami yugmi, iigken naluglukek negeqvam tungiinun kiarten.” Tua-i iigka nalugagka negeqvam tungiinun, kiarrlua tangertua, neglirnerani ekuaviim ikirtuqaan, iteryaram caniani, agayutnguaq una Agayutem eq'ukekii.

⁶Agayun-llu qanertuq wangnun, “Tuquarkaulriami yugmi, tangrran-qaa ukut yuut caliarat? Tangerki angelriit pellernarqellriit Israel-aam yuin caliarit maani, ayagtellua yaaqsigiinartellua tanqilriamek uitavimnek. Tau͡gaam cali makuni arcaqanrulrianek tangerciquten.”

⁷Ayautaanga-llu iteryaraanun carr'ilnguum elaqliim, apertuullua-llu ukinermek qacarnermi.

⁸Tua-llu qanrutaanga, “Tuquarkaulriami yugmi, elagaa qacarnerkun.” Elagamaa-llu qacarnerkun maaten piunga amigtangqellinilria.

⁹Qanrutaanga-llu, “Iterluten tangerrsarturki pellernarqellriit assiilnguut caliarit wani.”

¹⁰Iterlua kiartua; tamaani-llu tangrranka qacarnermi pilinguat ayuqeliluki ciissirpiit allat-llu menuulriit ungungssit,[2] allat-llu cali Israel-aam yuin agayuvikekait.

¹¹Yuinaat-llu pingayun qulnek cipluku (70) Israel-aami ciuliqagtet tuanlluteng, ilakluku Jaazaniah Shaphan-aam qetunraa. Tamarmeng tegumiarluteng aruviarcuutnek, aruvirluteng taukut aruviaraat.

¹²Agayutem aptaanga, “Tuquarkaulriami yugmi, tua-i-qaa tangrraten Israel-aam yuin ciuliqagtain aassaqluteng caliarit? Agayuaqluteng enem iluani agayutnguanek imalegmi. Waten qanerluteng, ‘ATANREM tangvanritaakut. Nuna man'a cakaallrua.’”

¹³Cali qanrutaanga, “Tangerciqaten nutaan makuni arcaqanrulrianek pivkarluki.”

¹⁴Tua-i ayautaanga neglirnermun Agayuvigpiim iteryaraanun maniillua-llu arnanek qialrianek qivruluteng agayutnguamek Tammuz-aamek.[3]

¹⁵Aptaanga, “Tuquarkaulriami yugmi, tua-i-qaa taukut tangrraten? Taukut cali arcaqanritnek tangerciquten.”

¹⁶Tuani cali iluqlianun carr'ilnguan Agayuvigpiim ayautaanga. Tuani-llu Agayuvigpagmun iteryaram caniani elaturram ekuaviim-llu akuliigni tangertua yuinaq tallimanek cipluku (25) angutnek Agayuvigpak tunulluku, calaraq cauluku, ciktaalrianek agayuluteng akertem̄un piqarralriamun.

¹⁷ATANREM qanrutaanga, “Tuquarkaulriami yugmi, tua-i-qaa tamakut tangrraten? Ukut Judah-m yuin makut pellernarqelriit atuqengateng tangelten camirutkenritait sagcillerteng-llu nangtequtekaitnek yuut nuna tamiin patuluku. Qang'a, ilalqerluki atuqengateng tailuteng maavet Agayuvigpagmun tamakut atularait qenertelqa pikanirtelluku. Atam tangerqerki, eqcilaqiitnga nau͡gg'un tua-i arcaqanrulriatgun pingnaqluteng! Tangrriu, elliigaqluteng napam avayaanek qengameggnun.[4]

¹⁸Tamarmeng naspetarkaugaat eq'urtellma tuknitacia. Pinricen̄arngaitanka takumcukngaunaki-llu. Qayagpagaluteng qastutacirmegcetun piicagyaaqeciqut wangnun, wiinga tau͡gaam niicugningaitanka.”