Read Yupik Daniel 1 Bible Online

Daniel 1 - Yupik bible

Daniel 1

¹Allrakut pingayuatni angayuqrullran Judah-m angayuqran Jehoiakim-aam, Nebuchadnezzar-aam Babylonia-m angayuqran, anguyagaa Jerusalem-aaq avatairluku-llu.

²Agayutem-llu teguaqevkaraa Jehoiakim-aaq Agayuvigpiim-llu aklukegtaarain ilait teguluki. Teguanek-llu ut'rulluni agayuvigpiitnun agayutmi Babylon-aami, tegutellni-llu agayuvigtaat qemaggluki qemaggviinun agayuvigpiim.

³Nebuchadnezzar-aam-llu Ashepanez-aaq, atanerruami ciuqliat, ellimerraa cucukisqelluku teguat Israelite-at ilaitnek, Israel-aam angayuqrin atanerruarin-llu kinguvritnek.

⁴Kenegnalrianek, umyuartuluteng, elluarrluteng elitnaurumaluteng, puqigluteng, temait natlugnerunateng, angayuqam eniini callerkameggnek elisngaluteng. Ashpenaz-aamun-llu elitnauresqelluki naaqiyaramek igaryaramek-llu Babylonian-aat qaneryaraitgun.

⁵Nebuchadnezzar-aam-llu alerquutai unuaquaqan nerevkalaasqelluki elliin nerlallerminek mercet'laasqelluki-llu wine-amek merkaminek. Allrakut pingayun kinguatni waten elitnaurumarraarluteng angayuqamun Nebuchadnezzar-aamun nasvaumaarkauluteng.

⁶Cucukumalriit-llu ilangqellruut Daniel-aamek, Hananiah-mek, Mishael-aamek, Azariah-mek-llu, tamarmeng Judah-m ilakelriartain ilakluki.

⁷Atanerruat-llu ciuqliata acinqigtai: Daniel-aaq Belteshazzar-aamek, Hananiah-llu Shadrach-amek, Mishael-aaq-llu Meshach-amek, Azariah-llu Abednego-mek.

⁸Daniel-aaq-llu picirkiurtuq menuliumayuumiinani angayuqam neqkautainek nerrlermikun mell'e'rmikun-llu wine-amek merkautiinek, tua-i Ashpenaz-aamun ikayuusquq.

⁹Agayutem-llu Ashpenaz-aamun takumcukevkaraa Daniel-aaq.

¹⁰Tau͡gaam Ashpenaz-aam, uluryayuami angayuqamek qanrutaa Daniel-aaq, “Angayuqam alerquutekellrui neqkaci merkaci-llu, ilavcen̄i ayagyuarullgutevcen̄i ayaniillrukuvci, tuquciiqellianga.”

¹¹Tua-i Daniel-aam nayurta ullagaa Ashpenaz-aam elkartellra murilkesqelluki Daniel-aankut taukut-llu pingayun ilai.

¹²Qanrulluku-llu, “Naspaaqerkut ernerni qulni nerevkaraqluta naucetaanek mermek-llu mercetaqluta.

¹³Taukut erenret kinguatni pitassiarutniarpekut ilamten̄un angayuqam alerquutekellrinek nerlallernun, tuani ayuqucirput tangerrluku camek picirkirniarpekut.”

¹⁴Taum maligarulluni tuaten naspaasqelluki ernerni qulni.

¹⁵Erenret naangata, Daniel-aankut tangellrat assinrullruuq pininruluteng-llu taukuni angayuqam alerquutainek neqengqellerni.

¹⁶Tua-i tuakenirnek qaunqestiita nerevkalarai naucetaanek angayuqam alerquutekellrinek pivkarpek'naki.

¹⁷Agayutem taukut yun'erraat cetaman iganek elisnganermek puqigyaramek-llu cikirai. Tamatumun ilakluku Daniel-aaq cikiraa nalqigciyugngarivkarluku yuut nasvicimallritnek qavangunek-llu.

¹⁸Nebuchadnezzar-aam picirkiuraa aturluku pingayun allrakut naangata, Ashpenaz-aam tamalkuita yun'erraat ullautai elliinun.

¹⁹Angayuqam-llu tamalkuita qanellgutekluki, nataqutenrituq Daniel-aam, Hananiah-m, Mishael-aam, Azariah-m-llu ayuqaitnek. Tua-i ilaurtut angayuqam ataniurviani calisten̄un.

²⁰Angayuqam caungraan apyutii wall'u canek arenqiallugutnek paivcingraan, ukut cetaman nallunrillrulartut qulerqunek amllenrulriamek ciunerkarcurtet wall'u angalkut tamiini angayuqauvigmi nallunrilkengaitni.

²¹Daniel-aaq-llu angayuqam atanruviani uitallruuq Cyrus-aam, Persia-m angayuqran, cirlaknatkaanun Babylonia-q.