Read Yupik Daniel 10 Bible Online

Daniel 10 - Yupik bible

Daniel 10

¹Allrakut pingayuatni Cyrus-aam angayuqrullran Persia-mi, qaneryaraq nasvaumallruuq Daniel-aamun, Belteshazzar-aamek-llu aterpagtetukiitnun. Qaneryaraq-llu tamana piciunge'rmi taringellerkaa arturnaqluni. Nalqigcimallruluni-llu elliinun tangaallrakun.

²Taum nalliini, wiinga, Daniel-aaq atullruaqa tuquillret atutukiit nitilini pingayuni.

³Nereksaunii-llu neqnirqellrianek, kemegtuqsaunii, wine-amek-llu meqsaunii, nuyanka-llu kenugteksaunaki nitilit pingayun pellugnatkaatnun.

⁴Iralut ciuqliat ernengqerluku yuinarnek cetamanek cipluku nangengqallruunga cen̄iini kuigpiim Tigris-aam.

⁵Ciugcama tangertua angutmek 'lumarraqegtaarmek aturarluni suulutaaqegtaarmek-llu naqugcimaluni.

⁶Temii ciqinqerluni teggalquqegtaartun. Kegginaa-llu kalluum kenerpallallran tanqiatun ayuqluni, iik-llu kenertun ekualriatun ayuqlutek. Iruk tallik-llu ayuqlutek qevlercaumalriatun punernertun, erinii-llu yugugaat nepiicetun ayuqluni.

⁷Wiinga kiima tangerrluku tauna. Angutet tau͡gken ilakellrenka camek tangerpek'nateng, camek-llu tangenrrilnge'rmeng alingalliimeng qimagluteng iirtut.

⁸Wiinga-llu kiimetqerlua, tangvallruaqa irr'inarqellria man'a. Unaqsertellruunga, kegginaqa-llu ayuqucimitun ayuqenrilan yuum elitaqsarpek'nii.

⁹Erinii niitellemni iqullruunga nunamun palurma caciqa nalluyagulluku.

¹⁰Unatet-llu tegulua maktaatnga ciisqumigtua acika ayaperluku; tau͡gaam cali qiivenriqsaunii.

¹¹Tua-llu an'gilam qanrutaanga, “Daniel-aaq, Agayutem kenkaaten. Wiinga ayagcecimallruunga elpenun. Nangerrluten niicugninqegcaarki elpenun qanrutkarkanka.” Qanrinanrani nangertua tau͡gaam cali qiivlua.

¹²Waten qanrutaanga, “Daniel-aaq, alingevkenak. Elpenek pivakenrirluten taringyuumingqerraallerpenek ayagluni piicallren niicimalartuq. Wiinga-llu wani-wa piicallren niilluku taigua.

¹³An'gilam, qaunqestiin Persia-m angayuqauvian, inglulillruanga ernerni yuinaq ataucimek cipluku (21). Tua-i-llu Michael-aam, an'gilat ciuqliita iliita, ullaglua ikayuryartullruanga, tua-i-wa kiima unegtaullruama Persia-mi.

¹⁴Ullagamken taringevkarnaluki yugpenun tut'arkat kinguqvani. Man'a tangrrarkan kinguqvaggun tekitarkanek pilriaruuq.”

¹⁵Makunek qanruqaartellua, acika tangvallruaqa, camek qanerkaunii.

¹⁶Tua-i-llu an'gilam, yugtun ayuqluni, yaggluni unatminek qerrlugka agturak; wiinga-llu qanrutaqa nangengqalria ciuqamni, “Tangaallma mat'umek piniatevkaraanga qiivenrirciiganii-llu.

¹⁷Pistetun ayuqua atanemi ciuqerrani nangerngalriatun. Qaillun tua-i wani-wa elpenun qalarteqatarcia? Piniatua anerneqa-llu naninani.”

¹⁸Ataam yaggviklua tegunqigcanga pinirikanirtua.

¹⁹Qanrutaanga, “Agayutem kenkaaten, camek alingyaqunak camek-llu umyuassuugaryaqunak.” Tuaten qanrucanga pinirikanirtua, qanerlua-llu, “Assirikanircetarpenga, kitaki nutaan camek qanrucukuvnga qanruskia.”

²⁰Taum qanrutaanga, “Nallunritan-qaa ca pitekluku taillruciqa elpenun? Taillruunga nallunrircetnaluki igausngalriit Piciunrem kalikaini. Wani-wa tau͡gaam uterteqatartua callugyarturluku Persia-m qaunqestii an'gilaq; callunriqumku Greece-am qaunqestii an'gilaq taigarkauluni. Allamek ikayurtekaitua Michael-aamek tau͡gaam, Israel-aam yuin an'gilaatnek.