Read Yupik Daniel 12 Bible Online

Daniel 12 - Yupik bible

Daniel 12

¹An'gilaq 'lumarraqegtaarmek aturalek qanertuq, “Taum nalliini an'gilaq Michael-aaq, yugpet qaunqestiit, alairciquq. Arenqiallugutet tut'elarciqut, arcaqanruluteng atanruviit piurteqarallratnek. Tauna pillerkaq tekiskan, tamarmeng atanruvigpet yuit atrit igausngalriit Agayutem kalikaini anirtuumaciqut.

²Amllellriit-llu tuqullret makciiqut, ilait unguvaarkauluteng nangyuilngurmek ilait-llu kasngunarqellriamun, nangyuilngurmek-llu caunrilkumallerkameggnun.

³Umyuartulriit-llu yuut tanqigciqut qilagtun. Yugnek-llu qalaruciluteng umyuarnayagucivkarillret tanqigarkauluteng agyatun nangyuilngurmek.”

⁴Cali qanrutaanga, “Kitaki, Daniel, kalikat paluski nepyucirluki-llu ellam iquklitlerkaan engeliinun. Tauna tekipailgan yuut caurailngarciqut taringengnaqluki tamakut tuaten piarkat.”

⁵Tua-llu tangertua malrugnek yuugnek nangengqalriignek, kuigem cen̄egkeni akiqliqlutek.

⁶Aipaan aptaa an'gilaq kialirnermi nangengqalria 'lumarraqegtaarmek aturalek, “Qaku makut irr'inarqelriit iquklitqatartat?”

⁷Taum-llu 'lumarraqegtaarmek atulriim an'gilam unategni tamarkenka qulmun yagglukek cumiggluni akqiuq atrakun Iquilnguum Agayutem. Niitaqa waten qanertelluku, “Makut tamarmeng pillrurciiqut Agayutem yuin nangcimallrat iqukliskan.”

⁸Niicaaqaqa tamana qanellra tau͡gaam taringevkenaku. Taumek apeskeka, “Qaillun ayuqellriakun man'a iqukliciiqa?”

⁹Waten kiugaanga, “Watua ayagnariaten, Daniel-aaq, makut niitelten qemangqaarkaungata iquklitlerkaq engelkarrluku.

¹⁰Amlleret yuut menuircaumaciqut. Assiitellriit yuut taringesciiganateng assiilucirteng ciumuruciiqaat; umyuartulriit tau͡gaam taringarkaugut.

¹¹“Unuaquaqan ekuagiluni elliiyaram arulaircecimarraanranek, Uluryanarqellriim-llu Irranarqelriim alairraanranek, erenret tiissitsaaq atauciq yuinaat-wa akimiarunrita'ar qulnek cipluku (1,290) pellugciqut.

¹²Atawaqertut yuut pektayiilnguut erenret tiissitsaaq atauciq yuinaat-wa akimiaq atauciq akimiarmek cipluku (1,335) pellugnatkaatnun.

¹³“Elpet-llu, Daniel-aaq, pektayiilkina iquklitlerkamun. Tua-i-llu tuquarkauguten, tau͡gaam maktarkauluten akurturnaluku akiliuten iquklitlerkam nalliini.”