Read Yupik Daniel 3 Bible Online

Daniel 3 - Yupik bible

Daniel 3

¹Angayuqaq Nebuchadnezzar-aaq pilivkariuq yuguamek suulutaamek yuinaat cetaman qulnek cipluku (90) it'ganernek sugtutaluni, qulngunrita'arnek-llu it'ganernek iqtutaluni. Naparrluku-llu carr'ilngurmun Dura-mi Babylon-aam nuniini.

²Nebuchadnezzar-aam alerqurluki taisqai quyurtesqelluki tamalkuita atanerruani, nunat atanrit, ayuqucirturtet, akiliurtet, cuqcistet, kantalaristet, allat-llu ciuqliulriit naaqitqataamiu yuguaq piliaqevkallni.

³Taukut-llu tamarmeng quyurcimariata nangerngaluteng yuguam naaqicimaarkam ciuqerrani,

⁴qanerta qayagpagaluni qanertuq, “Elpeci yugni angayuqauvillgutkenrilngurni, nauvillgutkenrilngurni qaneryarallgutkenrilngurni-llu!

⁵Niiskuvci aturcetaalrianek ayuqenrilngurteggun aturcetaatgun cikluci agayuarkauguci yuguamun Angayuqam Nebuchadnezzar-aam napartellranun.

⁶Kina imna tuaten pinrilnguq egcimaarkauguq kaminiarpiim ekurpalriim iluanun.”

⁷Taukut-llu tuani quyungqalriit yuut aturcetaanek niicameng cikluteng agayuut tuavet yuguamun suulutaamun Nebuchadnezzar-aam napartellranun.

⁸Taum nalliini Babylonia-rmiut picetaarutait Jews-aat cumiggluteng.

⁹Waten-llu qanrulluku Nebuchadnezzar-aaq, “Unguvamasqumaamteggen!

¹⁰Nauwa angayuqaungavet picirkirillrulriaten aturcetaalrianek yuut niiskata cikluki agayusqelluki suulutaamun yuguamun,

¹¹kina-llu imna tuaten pinrilkan kaminiarpagmun ekurpalriamun egcimaarkauniluku.

¹²Jews-aartangqertuq elkartellerpenek qaunqesten͞gurrluki Babylon-aam nuniini, Shadrach-amek, Meshach-amek, Abednego-mek-llu. Taukut picirkiuten atunritaat. Kevgiunritait agayuteten, ciktaaryuunateng-llu suulutaamun yuguamun napartellerpenun.”

¹³Tamana niicamiu Nebuchadnezzar-aam eq'uqerrluni cakneq taitesqelluki-llu taukut pingayun angucet.

¹⁴Apluki-llu, “Shadrach, Meshach, Abednego-llu, piciuguq-qaa kevgiurngailucirci agayutemnun ciktaarngaunaci-llu suulutaamun yuguamun napartellemnun?

¹⁵Assirciquq niiskuvci ayuqenrilngurnek aturcetaalrianek cikluci agayukuvci yuguamun piliaqevkallemnun; tau͡gaam agayungailkuvci, egmianun egcimaarkauguci ekurpalriim kaminiarpiim iluanun. Umyuartequci-qaa agayucetangqerrsukluku aviutestekarpecen̄ek?”

¹⁶Shadrach-aq, Meshach-aq, Abednego-llu kiugut, “Wangkutnek anautengnaqngaitukut.

¹⁷Tuaten piarkaukan Agayutem wangkuta kevgiuqengamta aviucugngaakut ekurpalriamek kaminiarpagmek pinirpenek-llu aviuciiqaakut, Angayuqaaq.

¹⁸Tau͡gaam tuaten pinrilengraan, nallunritesqamteggen wangkuta agayungaitukut agayutevnun, ciktaarvikngaunaku-llu suulutaaq yuguaq piliallren.”

¹⁹Nutaan Nebuchadnezzar-aaq cakneq qenqe'rtuq, kegginaan-llu tangellra cimirluni tungiitnun Shadrach-am, Meshach-am, Abednego-m-llu. Pisten̄i-llu alerqurluki ciungani kumalallran tuknitacia malrunlerqunek ilaluku kaminiarpak puqliisqelluku.

²⁰Alerqurluki-llu anguyagtem̄i pininqurrait qillerqesqelluki taukut pingayun angutet kaminiarpagmun-llu ekurpalriamun egtesqelluki.

²¹Tua-i qillerqait aturartuumaita— 'lumarrarnek, qallirnek, nacanek-llu aturluteng, eggluki-llu kaminiarpagmun ekurpalriamun.

²²Kaminiarpak-llu angayuqam alerquutenqegcallruaku cakneq uuqnariluku pisqelluku, kenrem-llu tuqutai anguyagtet taukut pingayun Jews-aat kaminiarpagmun agutestait.

²³Tua-i Shadrach, Meshach, Abednego-llu qillengqatuumarmeng igtut kaminiarpagmun ekurpalriamun.

²⁴Alqunaq-llu Nebuchadnezzar-aaq nang'e'rtuq cakneq irr'iqapiggluni. Aptai-llu atanerruani, “Pingayunek-qaa angutnek qillerqerraarluki egcillrunritukut kaminiarpagmun kurpalriamun?” Kiugaat, “Aa-ang, tuaten pillruukut.”

²⁵Elliin-llu aptai, “Ciin-mi tangercia cetamanek yugnek piyualrianek kenrem akuliini? Qillerqumavkenateng, nangteqngatevkenateng-llu, cetamiita-llu tangellra an'gilacetun ayuqluni.”

²⁶Nebuchadnezzar-aaq kaminiarpiim amiigan canianun piluni qayagpagtuq, “Shadrach! Meshach! Abednego! Pistaini Angtatailnguum Agayutem! Anici!” Taukut-llu egmianun anluteng.

²⁷Tamarmeng-llu atanerruat, nunat angayuqrita, angayuqat tungliita, allat-llu angayuqam pistai quyurrluteng yuvrirait taukut pingayun angutet, taukut kenerkun qaillun pimavkenateng. Nuyait 'lekaumavkenateng, aturait-llu ayuqucimegcetun ayuqluteng, aruvagnimek-llu tepaunateng.

²⁸Nebuchadnezzar-aaq qanertuq, “Nanraumali Agayutiit Shadrach-am, Meshach-am, Abednego-m-llu! An'gilani atrartelluku aviuskai ukut angutet kevgiurten̄i cacetuqutekesten̄i-llu. Unguvaseng-llu qevvluku niitevkenaku alerquuteka, agayuyuumiinateng allanun agayutnun ellaita tau͡gaam Agayutmeggnun.

²⁹“Waniwa alerquigua kina imna atanruvigni, yugni ayuqenrilngurni, wall'u qaneryarallgutkenrilngurni qanelria qigcikevkenaku Agayutiit Shadrach-am, Meshach-am Abednego-m-llu, ipii qecuumaciqut, enii-llu imcimaarkauluni. Agayucetaituq waten ayuqellriakun aviuciyugngalriamek.”

³⁰Taum-llu angayuqam caliaritgun quyigikanircetai Shadrach-aq, Meshach-aq, Abednego-llu Babylon-aami.