Read Yupik Daniel 4 Bible Online

Daniel 4 - Yupik bible

Daniel 4

¹Angayuqaq Nebuchadnezzar-aaq mat'umek qanermek ayagceciuq tamalkuitnun angayuqauvillgutkenrilnguut yuitnun, naumavillgutkenrilngurnun, qaneryarallgutkenrilngurnun-llu ellarpiim iluanelngurnun: “Uitanqegcin piuli elpecen̄i!

²Niitesqumaanka elpecen̄un irr'inarqellriit nallunailkutat-llu Quyinrulriim Agayutem wangnun manillri.

³“Ucurnarqellriaruut alangaanarqellriit Agayutem wangkutnun nasvallri! Angelriaruut irr'inarqelriit caliari! Angayuqauvia iquklisngaunani, atanirturilriaruarkaungami nangyuilngurmek.

⁴“Wiinga, Nebuchadnezzar-aaq, uitanqegcilua yuullruunga atanruvigmi enemni, caiturpek'nii.

⁵Tau͡gaam caqerlua qavangurturtua alingnarqellriamek, tangaalua-llu nanikuanarqelrianek qavamni.

⁶Taumek alerquutellrukenka umyuartulriit tamalkuita Babylon-aami taivkaasqelluki, nasvitesqellua qavanguma kangianek.

⁷Taingata angalkut, umyuartulriit, agyatgun-llu ciunerkarcutulit, qanrutanka qavangumnek, tau͡gaam ellaita nalqigtesciigataat.

⁸Tua-llu Daniel-aaq itertuq, (Belteshazzar-aamek cali at'lek agayutma atranek.) Anernerat tanqilriit agayutet elliini uitauq, tua-i qavanguqlemnek qanemcitaqa. Qanerlua:

⁹Belteshazzar-aaq, ciunerkarcutulit ciuqliatni, nallunritaqa tanqilriit agayutet anernerat elpeni uitacia, elpenun-llu taringyugngaciit tamalkuita nallunarqelriit. Uumek qavangurtullruunga. Qanrusnga camek kangingqerrucianek.

¹⁰“Qavamni tangellruunga angtuamek napamek nunam qukaani uitalriamek.

¹¹Tangvainanemni angliriinartuq kiituani qilak tekitaa ellarpiim-llu iluanelnguut yuut tamarmeng tangerrsugngariluku.

¹²Tangnirqellrianek cuyangqertuq, atsarugaat-llu nauvikumaluku ellarpiim yuin tamarmeng neqkanrita. Yuilqurmiutaat ungungssit talinra talisngavikaqluku, yaqulget-llu ungluliluteng avayaini, unguvalriit-llu ayuqenrilnguut ner'aqluteng tuaken.

¹³“Umyuaqnginanemni tauna tangelqa, tangertua an'gilamek atralriamek qilagmek, kellulluni cakneq.

¹⁴Qayagpagtuq qastuluni, ‘Napa kepiciu avayairluku-llu; cuyairluku sekavvluki-llu atsai. Ayagtelluki ungungssiaraat acianek yaqulget-llu avayainek.

¹⁵Acilqu͡rra tau͡gaam uitaskiciu qes'ucirluku cavigmek punernermek-llu. Uniskiciu tuavet yuilqumun canlegmun. “‘Yukutamun mecirtelluku, tamaani-llu uitavkarluku ilalirluki ungungssit naumalriit-llu.

¹⁶Allrakuni malrunlegni yuum umyugaanek umyuangqerrngaituq, ungungssim tau͡gaam umyugaanek.

¹⁷An'gilat murilkilriit picirkangutelqaat man'a. Kitaki yuut nani tamiini uitalriit nallunrirlitgu Angtatailnguum Agayutem piningqerrucia yuut angayuqauviitnun, kitumun-llu cucukellerminun tunyugngaluki, imkunun tuaten cakegtaunrilngurnun.’

¹⁸“Tuaten qavanguqa ayuquq,” qanertuq Angayuqaq Nebuchadnezzar-aaq. “Kitaki, Belteshazzar, qanrusnga kangianek. Ayuqucirtuastem̄a nalqigutesciigataatnga, tau͡gaam elpet piyugngaarpenga, anernerat tanqilriit agayutet elpeni uitiin.”

¹⁹Niicami mat'umek, Daniel-aaq Belteshazzar-aamek aterpagtelaqiit, tatamluni qanerkaunani uitaqallruuq. Nebuchadnezzar-aam-llu qanrutaa, “Belteshazzar-aaq, qavangumun kangianun-llu tatamtevkanrilu.” Belteshazzar-aam kiugaa, “Qavanguq man'a nalqigutii-llu elpenun tusngasqumanricaaqaqa inglukestevnun tau͡gaam.

²⁰Napa tangellren, sugtum ugaani qilak tekilluku, tamarmeng-llu ellarpiim yuin tangerrsugngaluku.

²¹Cuyarluni tangnirqellrianek, atsai-llu neqkaneqluki tamarmeng ellarpiim yuin. Ungungssit-llu aciani talisngaluteng, yaqulget-llu ungluliluteng avayaini.

²²“Napa tauna elpenguuq, sugtuluni pinirluni-llu. Angliriavet-llu cakneq qilak pagna tekitan, pinin-llu saggluni tamiinun ellarpiim iluanun.

²³Tangvainanerpeni an'gilaq atrallruuq qilagmek qanerluni-llu, ‘Napa kepluku piunrirciu, acilqu͡rra tau͡gaam uitaskiciu uitaviani. Qes'ucirluku-llu cavigmek punernermek-llu, tamaani-llu uitavkarluku yuilqumi canlegmi. Yukutamun mecirtelluku, tamaani-llu uitavkarluku ilagarluki ungungssit allrakuni malrunlegni.’

²⁴“Waten-llu nalqigutii ayuqluni: Angtatailnguum Agayutem tut'arkaq elpenun nallunrircetaa.

²⁵Yugnek ayagcecimaciquten ungungssit yuilqurmiutaat ilalirluki uitaciquten. Allrakuni malrunlegni nerlarciquten canegnek kuluvagtun, qavaraqluten ellami, yukutam-llu meciraqluten. Nutaan-llu nallunrirciqan Angtatailngurmun Agayutmun piurcet'lauciit angayuqauviit cikiuteksugngaluki-llu kitumun imumun piullerminun.

²⁶Taum an'gilam uitatesqellrua napam acilqu͡rra nunami. Tauna kangingqertuq elpet ataam atanrurciiquten nallunaiquvgu Agayutmun ataniurumacianek ellarpak tamalkuan.

²⁷Taumek wani-wa ayuqucirtuuteka maligesgu. Assiilnginermek taqi, piciulria aturru, takumcukaqluki-llu arrsaulriit. Tuaten pikuvet elluarrluten piurciquten.”

²⁸Makut-llu tamarmeng piciurtellruut Angayuqamun Nebuchadnezzar-aamun.

²⁹Iralut-llu qula malrugnek cipluku kinguakun, piyuallermini enemi qiliini Babylon-aami,

³⁰qanertuq, “Tangerciu Babylon-aam angtacia! Piliaqellruaqa nunarpak atanruviknaluku tangrrutkesqelluku pinirtacimnun artuqailucimnun-llu, ucurnarqucimnun-llu.”

³¹Tau͡gaam qanerpailgan, qanelriartanguq qilagmek, “Angayuqaaq Nebuchadnezzar-aaq, niicugniu qanelqa! Angayuqauyarakun pinin watua tegumauq elpenek.

³²Ayagcecimaciquten yugnek, ilalirarkaurrluki ungungssit yuilqurmiutaat, nerlararkauluten-llu canegnek kuluvagtun allrakuni malrunlegni. Nutaan nallunrirciqan Angtatailngurmun Agayutmun piurtelauciit yuut angayuqauviit cikiuteksugngaluki-llu kitumun piullerminun.”

³³Tamakut qanrutkellri piciurtut egmian. Nebuchadnezzar-aaq ayagcecimaluni yugnek ner'aqluni-llu canegnek kuluvagtun. Yukutam-llu meciraa, nuyai-llu nauluteng taktariluteng yaqulegpiim meterviim melqurritun, cetui-llu yaqulgem cetuitun taktariluteng.

³⁴“Taukut allrakut malrunelgen pelluata,” qanertuq angayuqaq, “qilagmun ciugcama ellangellruunga. Nanraraqa-llu Angtatailnguq Agayun, takarnarqutmek ucurnamek-llu piluku unguvalria nangyuilngurmek. “Atanirturiciquq akwarpak, angayuqauvia-llu nangengaituq.

³⁵Yuut nunamelnguut caunrilngurtun pitaluki tangvalarai; an'gilat qilagmi yuut-llu nunami piyugtacimitun aulukai. Kia piyullra inglulirciigataa cangakesciiganaki-llu caliari.

³⁶“Ellangellemni tuani takarnarquciqa, ucurnarquciqa, angayuqauvika-llu ataam wangnun taicimallruut. Atanerruama-llu tamarmeng ciuniullruatnga, angayuqauyarakun-llu piniqa ataam wangnun taicimaluni takarnarqenrurrlua-llu ciunganimi.

³⁷“Nutaan-llu waniwa, wii, Nebuchadnezzar, nanraraqa ucuqluku-llu Qiliim Angayuqra. Ca tamarmi pillra piciulriaruuq elluarluni-llu, pivakellriit-llu ellmikutuurcetaqluki.”