Read Yupik Daniel 6 Bible Online

Daniel 6 - Yupik bible

Daniel 6

¹Darius-aaq umyuanguq cucuklirnaluni yuinarnek arvinlegnek (120) atanerruaruarkanek tamiini angayuqauvimini.

²Pingayunek-llu cali cucuklirluni taukunun ciuqliugarkanek, taukut pingayun Daniel-aaq ilakaat.

³Daniel-aaq-llu nallunaitelartuq ilamini atanerruani assinruluni, cali yuk elluatuunruluni calinrulartuq tamakuni ilamini. Kiituani-llu angayuqam, caliari tangerrluki, atanirturilriarurcugaa angayuqauviminun tamalkuan.

⁴Tua-llu allat cucukumallret ciuliqagtet pitkarcurtut picetaarutnaluku Daniel-aaq caliarakun, tau͡gaam nalaqutesciigatut picetaarutkameggnek, Daniel-aaq caliamikun canganarqutailan.

⁵Waten qanruyutut, “Picetaarutkaanek Daniel-aam nalaqusngaicugnarqukut allakun, agayumaciakun tau͡gaam.”

⁶Taukut-llu ag'ut umyuallgutekluteng tangerrsarturluku angayuqaq qanrulluku-llu, “Angayuqaaq Darius, unguvamakina!

⁷Atanerruarpet tamarmeng umyuallgutekluteng picirkamek taqutesqaatgen, pinritevkenaku ciumurucimaarkamek. Picirkiuri erenret yuinaat qulmek cipluku (30) iluatni kina imna camek kaigaarkaunrirtelluku allanun agayutnun wall'u allamun yugmun elpenun tau͡gaam. Kina-llu imna allanun kaigalria, agayutnun wall'u yugnun, egcimaarkaurtelluku petmigmun yugtutulinek imalegmun.

⁸Kitaki, Elpet Takarnarqellriami, picirkiura uumek kalikarmun, atren-llu elliluku picirkiuraq cimiqetaarumangairulluku, Medes-aat Persian-aat-llu alerquutait aturluki cimiumasciigalnguut.”

⁹Tua-i Angayuqam Darius-aam kalikamun picirkiuramun at'ni igautaa.

¹⁰Daniel-aaq-llu nallunriami angayuqam at'ni kalikarmun igautellranek eneminun utertuq. Enii qullirmi egalertangqertuq ikingqaluteng Jerusalem-aam tungiinun. Tuani-llu egaleq ikingqalria cauluku, piciryaramitun ciisqumigtuq piicagluni-llu Agayutmun pingayurqunek ernerpak.

¹¹Inglukestain tangrramegteggu Daniel-aaq piicallrani Agayutmun,

¹²tamarmeng malikluteng angayuqaq ullagaat picetaarutnaluku Daniel-aaq. Qanerluteng, “Angayuqaaq, picirkamek taqutellruuten aterpenek-llu takarnarqucilirluku ernerni yuinaq qulnek cipluku (30) kina imna kaigalria agayutet iliitnun wall'u yuut iliitnun, elpengunrilngurmun, egcimaarkauniluku petmigmun yugtutulinek imalegmun.” Kiuluni-llu angayuqrat qanertuq, “Ilumun tamana picirkiutnguqapiartuq, picirkiutiit Medes-aat Persian-aat-llu, cimiumaarkaunrilnguq.”

¹³Taukut-llu angayuqaq qanrutaat, “Imum Daniel-aam, Judah-mek teguarullret iliita, catkenritaaten, kalikaq-llu imna takarnillren catkevkenaku piicagturalartuq ernerpak pingayurqunek.”

¹⁴Angayuqam man'a niicamiu umyuamikun cakviurtuq, piyunartacimitun-llu qaillun piluni Daniel-aam anirtuumallerkaanek caliyaaquq unugvianun.

¹⁵Taukut-llu angutet angayuqaq ullanqiggluku qanrutaat, “Nallunrituten Medes-aat Persian-aat-llu alerquutait aturluki picirkiullrukuvet angayuqauluten, tamana cimirciigatuq.”

¹⁶Tua-i angayuqam alerquutaa Daniel-aaq teguluku egtesqelluku petmigmun yugtutulinek imalegmun. Qanrulluku-llu, “Daniel-aaq, Agayutvet, cakaniyuunak kevgiuqengarpet, anirtuqiliten.”

¹⁷Petmiim-llu painga teggalqumek patuat, angayuqam-llu takarnarqucirissuutminek atanerruami-llu cali piatnek teggalquq nepyuciraa, kia-llu Daniel-aaq anirturciiganaku.

¹⁸Angayuqaq-llu utercami eneminun nereksaunani; avayurrutnek-llu piyugpek'nani uitauq, unugpak-llu qavarciiganani.

¹⁹Erqaaraan angayuqaq nangerrluni cukangnaqluni petmigmun ayagtuq.

²⁰Tekicamiu-llu Daniel-aam uitavia umyuassuugarluni qayagpagtuq, “Daniel-aaq, pistiini unguvalriim Agayutem! Agayutvet-qaa cakaniyuunak kevgiuqengarpet anirturyugngallruaten yugtutulinek?”

²¹Daniel-aam kiugaa, “Angayuqaulriami unguvamakina!

²²Agayutem-wa an'gilani taivkarluku qanrit yugtutulit mamtellrukai taukunun akngircetevkenii. Tuaten pillruuq nallunrilamiu camek pinarqutailuciqa, camek-llu assiitellriamek piksailama tungevnun.”

²³Angayuqam cakneq quyaluni alerquutaa Daniel-aaq petmigmek nugtesqelluku. Nugcamegteggu tangrraat akngiringavkenani, tua-i-wa cacetuqutekngamiu Agayun.

²⁴Angayuqam-llu alerquutai imkut Daniel-aam picetaarutestai nuliartuumaita irniartuumaita-llu tailluki egtesqelluki petmigmun yugtutulinek imalegmun. Petmiim-llu terr'a tekipailgatgu yugtutulit qecengvik'larait keggmarluki enrit-llu ayemqelluki.

²⁵Tua-i Angayuqaq Darius-aaq igartuq yugnun atanruvillgutkenrilngurnun, naumallgutkenrilngurnun, qaneryarallgutkenrilngurnun-llu nunami qaingani: “Uitanqegcin piureskili elpecen̄i!

²⁶Mat'umek picirkiramci ataniumakemni tamarpeci, uluryakiciu qigcikluku-llu Daniel-aam Agayutii. “Unguvaluni Agayutnguan, piugarkauluni-llu nangyuilngurmek. Angayuqauvia piunriumangaunani, atanrullra-llu piugarkauluni iquklicuunani.

²⁷Anirturilartuq aviuciluni-llu, irr'inarqellrianek caliaqluni qilagmi nunami-llu, Anirtullrua Daniel-aaq tuqucetevkenaku yugtutulinun.”

²⁸Daniel-aaq-llu elluarrluni piurallruuq atanrullrani Darius-aaq Cyrus-aaq-llu Persia-rmiu.