Read Yupik Daniel 8 Bible Online

Daniel 8 - Yupik bible

Daniel 8

¹Allrakut pingayuatni Belshazzar-aam angayuqrullran, aipirilua cali tangaallruunga.

²Tangllemni maaten piunga casgulgem nunarpiim Susa-m iluani uitalua Elam-aam nuniini. Nangengqalua Kuigem Ulai-am caniani,

³kuigem-llu caniani tangerrlua angucalumek qusngimek cirunerluni malrugnek takellriignek, cirunran aipaa takenruluni nutaraunruluni-llu aiparmini.

⁴Tangvallemni-llu tauna angucaluq qusngiq cirunermiaraluni kanaknetmun, negetmun, ungalatmun-llu. Inglukangesciiganani-llu, inglulirtuq'ngai-llu yuum anaucesciiganaki pinianek. Umyuani-llu aturluku piami ellminek pivaksagulluni.

⁵Umyuangcainanemni caucianek mat'um, angucaluq qusngirngalnguq taiguq pangalegluni kanaknalirnermek, cukam-llu ugaani ipiin nuna tutmarpek'naku. Nallunaiterpalriamek cirunerluni iigmi akuliignegun.

⁶Ullagaa tauna angucaluq qusngiq, tangelqa nangengqaluku kuigem cen̄iini, curukarluku-llu pitacirmitun.

⁷Curukallrani tangvagaqa. Qenrucamiu-llu cakneq puukpagaa cirunrek-llu tamarkenka ayemllukek; angucalum-llu qusngim ingluliurciiganaku. Taum curukartiin nunamun iqulluku tutmautaa; kia-llu ikayurciiganaku.

⁸Angucaluq-llu qusngirngalnguq cayunairutuq ellminek pivakluni; tau͡gaam cayunairutellran nalliini cirunra navgumallruuq. Uitavillrakun-llu nauluteng nallunaiterpalriit cetaman cirunret, caumallgutkevkenateng.

⁹Cirunret-llu iliitgun cirunecuayaaq nauluni, pinia-llu saggluni ungalatmun, calaratmun, Akqutem-llu Nunam tungiinun.

¹⁰Angliriluni piniriuq anguyagyugngariluki qiliim anguyagtai, agyat-llu; ilait-llu igcetai tutmaulluki-llu.

¹¹Kiituani-llu pakemkumiungungraan Anguyagtet ATANRAT ingluliraa, arulairtelluku-llu unuaquaqan ekuagiyaraat elliinun, Agayuvigpak-llu assiirulluku.

¹²Yuut tauna assiilngirviksagutaat elliitnek ekuagiyuirulluteng, agayumaciq-llu piciulria nunamun igcecimaluni. Tauna ciruneq callermikun tamalkuan nakilriarullruuq.

¹³Tua-llu niitua an'gilamek qanelriamek allamun, “Qaillun taktalriamek makut tangrrumallret piuqatartat? Qaillun-llu taktalriamek mat'um assiitellriim assiilngiryaram enairumaqatartau unuaquaqan ekuagilallrat? Qaillun-llu taktalriamek qilagmiut anguyagtait Agayuvigpak-llu tutmaucimaqatartat?”

¹⁴Niitaqa an'gilam aipaa kiullrani, “Ernerni-wa malruk tiissitsaak yuinarnek akimiarnek cipluku (2,300) man'a waten ayuqerkaulria, tamatum-llu nalliini unuakumi atakumi-llu ekuagiyaraq atularngaunaku. Nutaan taukut erenret kinguatgun Agayuvigpak ayuqucillermitun ayuqliriarkauluni.”

¹⁵Wiinga-llu, Daniel, tangelqa taringengnaqnginanemni, alqunaq yugmek tangertua ciuqamni nangengqalriamek.

¹⁶Erinamek-llu qayagaulriamek niitua Kuigem Ulai-am quliinek, “Gabriel-aaq, nalqigusgu una angun tangellranek taringevkarluku.”

¹⁷Gabriel-aaq tailuni nangertuq canimnun, alingama-llu cakneq nunamun palurtua. Qanrutaanga, “Tuquarkaulriami yugmi, taringekiu caucia mat'um. Man'a tangellren ellam iquklitlerkaanek pilriaruuq.”

¹⁸Qanrinanrani nunamun iquunga ellaka nalluyagulluku. Tau͡gaam tegulua nangercetaanga,

¹⁹qanerluni, “Nasvagaqa camek iqungqellerkaa Agayutem eq'uqertii. Tangellren man'a iquklitlerkamek pilriaruuq.

²⁰“Qusngim angucalua tangellren malrugnek cirunerluni, angayuqaqakek Media-m Persia-m-llu.

²¹Qusngirngalnguq-llu angucaluq Greece-am angayuqauvikaa; iigken-llu akuliigni cirunerpak tangellren angayuqrin ciuqliqaat.

²²Imna-llu ciruneq navvleq, cetaman-llu naumavillrakun nauluteng, angayuqauviugut cetaman naugarkat tuaken atanruvigmek, tau͡gaam ciuqlirtun pinirtangaunateng.

²³“Ukut angayuqauviit iquklitniaraquneng assiirulluteng-llu cakneq anucimirqecetaarnariluteng, atanertangciquq ciumualriamek nangcilriaruluni iqlungarluni-llu.

²⁴Tauna piniriarkauguq elliin piniqenrilkem̄inek. Piunririlriaruarkauluni cakneq, callermikun tamalkuan piluaqeralriaruarkaungami. Piunririlriaruciquq yugnek pinilriarungraata Agayutem-llu yuk'engraaki.

²⁵Iqlutun usvitulriaruami, piluaqeraciquq assiitellriatgun caliamikun. Ellminek pivakellriaruciquq piqatarraarpek'nani-llu yugnek amllernek piunririarkauluni. Kiituani-llu inglulirarkaugaa Angayuqat Angenrat, tau͡gaam piunriumaarkauguq yuum pilqenrilkiikun.

²⁶Man'a tangellren unuakumi atakumi-llu ekuagiyaramek piciurciiquq. Tau͡gaam maa-i qanruteksaqunaku, piciurtellerkaa ukaqvaggun pingailan.”

²⁷Wiinga-llu umyuiqellruunga naulluulua-llu ernerni qavcini. Tua-llu assiriama angayuqam caliaqesqellri wangnun caliaqanka, tau͡gaam tangelqa ayuquciitellruaqa taringesciiganaku-llu.