Read Yupik Hosea 10 Bible Online

Hosea 10 - Yupik bible

Hosea 10

¹Israel-aam yui napayaartun ayuqellruyaaqut wine-arkanek atsangtulitun amllernek naugilriatun. Tukuurtellerteng maliggluku, ekuavignek amlleriinarluki nauciut. Nunameng-llu naugingiinallra maliggluku, assiriinarluki tangnircarait qigcikeketeng napalriit teggalqut piicagvik'lalteng.

²Yuut ircaqumegteggun piciunrilnguut nangtequtekarkaurtait assiilnguteng. Agayutem imciiqai ekuavik'lallrit piunrirluki-llu qigcikek'ngait tegalqut napalriit.

³Ukut yuut qanerniarartut, “Angayuqritukut nunamiutarmek alikenrilamteggu ATANEQ. Tau͡gaam-llu-wa angayuqangqengramta catnguyarta wangkutnun?”

⁴Qanlartut piugarkaunrilngurnek akqiaqluteng-llu piciunrilngurnek, atuungailngurnek-llu akqiaqluteng allanun nunanun. Elluaryaraq piciunrirtuq, nauluni tuqunarqellriatun naunerrlugtun itumcimalriami naucirivigmi.

⁵Samaria-m yui alingeciqut qialuteng-llu qunuluteng agayutnguameggnek suulutaamek kuluvaguamek angucalumek; Bethaven-aami.[10] Ellait agayulirtet-llu taum agayutnguam kevgiurtain qiatekciqaat. Qialuteng neplirciqut agayutnguarteng uayaumakan ucurnarqutminek.

⁶Tauna agayutnguaq ayauciiqaat Assyria-mun cikiutekluku angelriamun angayuqamun. Israel-aam-llu yui kasnguyugcecimaciqut kiaresngiacecimaluteng-llu picirkiutmun maligaruyucirteng pitekluku.

⁷Angayuqrat ayaucimaciquq, muriim ciquaratun mer'em qaingani.

⁸Qemit qaingitni agayularvii Aven-aam, yuin Israel-aam agayularviat agayutnguanun, piunriumaciquq. Cukilanat naunerrluut-llu nauciqut patuluki ekuavik'lallrit. Yuut qayagaurciqut ingrinun, “Iircikut!” qeminun-llu, “Patucikut!”

⁹ATANEQ qanertuq, “Israel-aam yui assiilnginriqsaitut wangnun Gibeah-mi assiilngirraanermeggnek.[11] Taumek Gibeah-mi anguyiim anguciqkai.

¹⁰Curugciqanka ukut assiilngurtulriit yuut anucimirqecetaarluki-llu. Atanruviit quyurrluteng inglulirciqait, anucimirqecetaarumaciqut-llu assiilngurugait pitekluki.

¹¹“Israel-aaq imumi ayuqellruyaaquq elicaumalriatun kuluvayagartun, upingaluni piugteqluni-llu carririllerkaminek mukaarkanek. Tau͡gaam wiinga umyuangua atmagcuucirnaluku uyaquqegtaariikun uskurarluku-llu calirpagcuutmek. Judah-mun qamurcetellruaqa itumcissuun Israel-aam-llu qamurluku manigcissuun.

¹²Wii qanertua, ‘Itumcici nutaramek nunamek pikarpecen̄ek, naucirici elluarucimek, quyurciluci-llu atawaqautnek wangnun piciuluci piurallerpeci naugiarkainek. Wangnun caunariaci, elpeci ATANERPECEN̄UN, wiinga-llu taiciqua kuvevikciqamci-llu atawaqautnek.’

¹³Tau͡gaam elpeci tuaten pivkenaci assiitellriamek nauceciillruuci quyurciluci-llu naugillrinek. Nerellruuci-llu iqluulallerpeci naugillrinek. “Cacetuqutekiavci akalrialegnun ayagassuutevcen̄un amllellratnun-llu anguyagtevci,

¹⁴anguyak tekiciiquq yugpenun, asvairqumalriit-llu capten piunriumaciqut. Tauna ayuqeciquq ernertun Angayuqam Shalman-aam piunririllratun nunarpiinek Betharbel-aam anguyallermini, aanait irniarit-llu passilluki tuqucimallracetun.

¹⁵Tuaten elpeci pimaciquci, Bethel-aam yuini, arcaqassiiyaalriamek assiilngurmek atullerci pitekluku. Anguyak ayagniuciatun, angayuqra Israel-aam tuquciquq.”