Read Yupik Hosea 11 Bible Online

Hosea 11 - Yupik bible

Hosea 11

¹ATANEQ qanertuq, “Israel-aaq mikelnguullrani, kenkellruaqa qayagaurluku-llu Egypt-aamek qetunraqellriatun.

²Tau͡gaam kiiki wii qayagaurturangramni, uluryugturaraanga wii. Wii yuunka ekuagiut Baal-amun; elegciut aruviarmek agayutnguanun.

³Wiinga tau͡gken elitnaullruluku Israel-aaq piyuayaramek. Wiinga kevellruanka yuunka talligemnun, tau͡gaam ellaita nallunaiqanritaat wangnun aulukucirteng.

⁴Cayullruanka wangnun cayuumaklemkun kenkekun-llu. Wiinga kevegluki agtuumatellruanka ulluvamnun; Pusvikellruanka nereqluki-llu.

⁵“Utercuumiitut wangnun, taumek uterrnarqai Egypt-aamun, ataniurniarai Assyria-m.

⁶Anguyak sen̄iciquq nunarpaitgun camun nagtevkenani ikirtuqait navgurluki. Piunrirciqai yuunka ellaita assiryuklerteng maliggluku pilaata.

⁷Ciumualartut avcugluteng wangnek. Qayagaciqut atmautaq ellmeggni uitalria pitekluku, tau͡gaam kia au͡g'arngaitaa ellaitnek.

⁸“Qaillun wii pegciiqsiken, Israel-aaq? Qaillun wii cakevkenak uniciiqsia? Wiinga-qaa piunrirciiqamken elpet Admah pillrucimtun, wall'u caliaqeciqamken Zeboiim-aaq pillrucimtun? Ircaquma pivkarngaitaanga! Kenkutka elpenun tuknissiyaagtuq.

⁹Anucimirqecetaarngaitamken qenertellma nalliini; Wiinga Israel-aaq piunrinqiggngaitaqa. Wiinga Agayutnguama yuunginarauvkenii-llu. Wiinga, Tanqilriami, nayuramken. Wiinga taingaitua elpenun qenerrlua.

¹⁰“Yum'a maligciiqaatnga uirranikuma yugtutulim uirranilauciitun ingluni. Taiciqut cukangnaqluteng wangnun kanaknermek.

¹¹Egypt-aamek taiciqut, yaqulegtun cukataluteng, Assyria-mek-llu, kanguruacuartun. Wiinga ataam ut'ruciiqanka enaitnun. Wiinga, ATANEQ, qanertua.”

¹²ATANEQ qanertuq, “Israel-aam yuin kassugutaatnga iqluqutetgun piciunrilngurteggun-llu, Judah-m-llu yui taqeksaunateng ingluliqu'rtut wangnun, piciulriamun tanqilriamun-llu Agayutmun.