Read Yupik Hosea 12 Bible Online

Hosea 12 - Yupik bible

Hosea 12

¹Ca tamarmi Israel-aam yuin caliarat unuakumek ayagluteng unullranun atuunrituq navguutnguluni-llu. Piciunritleq calluayaraq-llu amllerriinarluni akuliitni. Akqutnek taqutelartut Assyria-rmiunun kiputellgutek'laraat-llu Egypt-aaq.”

²ATANEQ picetaaruyutekangqertuq Judah-m yuinun; anucimirqecetaaqataraa-llu Israel-aaq yuin ayuquciat pitekluku. Akinaurciqai caliallrat pitekluku.

³Ciuliarata Jacob-aam callullrua malrini Esau aanamek eneliarani uitatuumarmek; Jacob-aam angliriami, callullrua Agayun —

⁴callullruuq an'gilamek cirlakluku-llu. Aluviliullruuq atawaqaasqesqelluni-llu. Bethel-aami-llu Agayutem ullallrua ciuliarput Jacob-aaq qanellgutekluku-llu.

⁵Una Atanrullruuq Agayun Artuqailnguq — ATANEQ aterkun tuaggun ciktaarvikumalararkauguk.

⁶Taumek watua, Jacob-aam kinguvrini, ukveqiciu Agayutsi elliinun-llu uterrluci. Piciuluci pitalqeggluci-llu, utaqaluci-llu nerinisngialliqevkenaci Agayutevci calillerkaanek.

⁷ATANEQ qanertuq, “Israel-aam yui iqlungartut Canaan-aarmiucetun; teglegiyunqelarait ellmeggnek kiputellriit uqamaltassiarcuutetgun piciunrilngurteggun.

⁸Qanlartut, ‘Wangkuta tukuurtukut, caucingluta amllernek. Kina-llu qanerciiganani piciunrilngurkun tukuurtellruniluta.’

⁹Tau͡gaam wii, ATANEQ Agayutevcen̄i anucestellerci Egypt-aamek, ataam uitavkalangeciqamci pelatekani, kinreskiini pillrucirpecetun kinreskiini nunami pilallrucirpecetun.

¹⁰“Qalarutellruanka prophet-aat nasvilluki-llu amllernek, prophet-aatgun-llu yuunka aarcirtuutnek cikillruanka.

¹¹Tau͡gken cali agayutnguat agayuvikelarait Gilead-aami, tamakut-llu agayuvikestait tuquciqut. Angucalunek tuqutarkanek elliilartut Gilgal-aami, taumek ekuaviit tamakut teggalqutun qalliqellriatun ayuqliriciqut catailngurni carr'ilqami.”

¹²Ciuliarput Jacob-aaq qimallruuq Mesopotamia-mun, tuani-llu, nuliangellerkani pitekluku, calicitellrua alla angun qaunqelluki-llu qusngii.

¹³ATANEQ ayagcecillruuq prophet-aamek anautestekaatnek Israel-aam yui teguarullratnek Egypt-aami aulukesqelluki-llu.

¹⁴Israel-aam yuin ATANEQ qatlilriatun pitaluku qenercetellruat; tuqutaunarqut picurlautait pitekluki. Atanrata anucimirqecetaarciqai kasngunarqellriamek ellminun pillrat pitekluku.