Read Yupik Hosea 13 Bible Online

Hosea 13 - Yupik bible

Hosea 13

¹Ciuqvani avani, Ephraim-aam ilakelriartai qanraqata, allat ilakellriari Israel-aam alingelartut; Ephraim-aaq qigcikngamegteggu. Tau͡gaam yuut assiilngillruut agayulallermegteggun Baal-amun, man'a-llu pitekluku tuquarkaugut.

²Tau͡gken cali assiilnginriqsaunateng cavignek agayutngualillermegteggun agayularvigkameggnek — agayutnguanek qerrirlinek, qaillun ayuqucirkait taqumaluteng yuum umyuangutiikun, piliaqumaluteng-llu yuum unataikun. Tua-i-llu qanerluteng, “Elliivikiciki ekuagarkanek!” Qaillun piluni kia cingaryartaki tamakut agayutnguat — agayutnguat angucalutun kuluvagtun elucilget!

³Taumek ukut yuut catairuciiqut unuakum taituatun, yukutartun catairutellriatun eruciatun. Carangllugtun cali tengeskiitun mukaarkanek caranglluiriyaram natranek, puyirviim-llu cali aruviitun.

⁴ATANEQ qanertuq, “Wiinga ATANRUUNGA Agayutsi, anutestellerci Egypt-aamek. Allamek Agayutaituci wangnek tau͡gaam. Wiinga kiima anirturtekarpecia.

⁵Wiinga aulukellruamci mertailngurmi kinreskiini, qau͡gyarrlainarmi nunami.

⁶Tau͡gaam itlerpecen̄i nunakegtaarmun, aqsinguci kainrirluci-llu, tua-i-llu umyuarci quyigiluni nalluyagullua-llu.

⁷Taumek wiinga curukarciqamci yugtutulitun. Kukupalegtun kuskarpagtun nayurciqamci tumkarpecen̄i.

⁸Curukarciqamci taqukatun piyagaminek paqricilriatun, ullirciiqamci-llu. Yugtutulitun nerciqamci tuani, allgurciqamci-llu caunrirluci ungungssit yuilqurmiutaat pilauciicetun.

⁹“Wiinga piunrirciqamci, Israel-aam yuini! Kia tua-llu tuani ikayurciqaci?

¹⁰Apelcillruuci angayuqamek ciuliqagten̄ek-llu, tau͡gaam qaillun taukut anirturciqatgu angayuqauvik?

¹¹Qenertellma nalliini cikillruamci angayuqanek, eq'uqertellemni-llu tegullruanka.

¹²“Israel-aam assiilngua pinarqutii-llu igausngauq, igausngaviit-llu pengegnailngurmi qemangqaluteng.

¹³Israel-aaq cikiumayaaquq unguvallerkamek, tau͡gaam usviicetacini aturluku ciuniunritaa — mikelngurtun yuurteqatalriatun, aanami eneliagkenek anyuumiilngurtun.

¹⁴Anirturngaitanka ukut yuut tuqumalriit nuniitnek, wall'u anirturngaunaki pinianek tuqum. Taiski naulluuteten, tuqu! Taisgu piunririyaran, tuqumalriit nunakestiita! Naklekenqiggngairutanka ukut yuut.

¹⁵Israel-aaq nauluaqangraan naunerrlugtun, taivkariciqua calaramek puqlanilriamek anuqmek mertailngurmek kingunelegmek, kinerceciiqai ulevlait elakait-llu. Piunrirciqai tamalkuita piksunarqellriit.

¹⁶Anucimirqecetaarnarquq Samaria-q inglulitellra wangnun pitekluku. Yui tuquciqut anguyagmi; mikelnguyagaat piqertuarucimaciqut nunamun, qingalriit-llu arnat ullirqumaluteng.”