Read Yupik Hosea 2 Bible Online

Hosea 2 - Yupik bible

Hosea 2

¹Taumek Israel-aarullguceci aterpagciki, “Agayutem Yui,” cali-llu, “Kenkumalriit ATANERMEK.”

²Irniamaa, taqsuariulluku inerquagiciu aanasi— nulirqenringramku, wiinga-llu elliin uikenrirlua. Taqsuariulluku inerquagiciu taqesqelluku akusrarutekevkallra akissuullra-llu.

³Niitenrilkan, matarqeciqaqa yuurtellrani ayuqucillratun. Kinreskiitun-llu cam nausciigalkiitun nunatun ayuqlirivkarciqaqa, quligluni-llu tuquciquq.

⁴Takumcukngaitanka-llu irniari; kasngutailnguum akissum irniaqngaki. Ellii-wa ellminek waten qanellrulria, “Kenkuurtenka ullagciqanka — cikilaraatnga neqnek mermek-llu, qusngit-llu melquitnek pilimalriamek 'lumarrarmek cali allamek 'lumarrarmek, olive-aat-llu uquatnek wine-amek-llu.”

⁶Taumek wiinga casguliqata'arqa cukilanat napayagaitnek akuliitnun elliluku naucilua-llu qacarnermek capkucirluku.

⁷Kenkuurten̄i malirqeraciqsaaqai tau͡gaam angungaitai. Yuarciqsaaqai tau͡gaam nalaqngaitai. Tua-llu qanerciquq, “Uterteqatartua ciuqlirmun uimnun— watuam assinqellrua tuani uitalqa.”

⁸Elliin arnam nalqiggngaitaa wang'ucia cikirtek'lallni mukaarkanek, wine-amek, olive-aat uquatnek, tamalkuitnek-llu qerrirlinek suulutaanek-llu atulallminek agayuaqami Baal-amun.

⁹Taumek quyurciyaram naucetaanek nalliini cikiutek'lallrenka ataam teguciqanka mukaarkat, wine-at-llu, teguluki-llu qusngit melqurritnek pilimalriit 'lumarraat allat-llu 'lumarrat cikiutek'lallrenka aturaqesqelluki.

¹⁰Aturairciqaqa kenkuurtain ciuqerratni, kia-llu atauciunger'mi anirturciigaciiqaa pinimnek.

¹¹Angnirluni kalukaryarai tamalkuita taqevkarciqanka — allamiaqan iralut-llu tamaita nerevkariyarai, Sabbath-aami-llu atulallri — tamalkuita-llu agayuyarakun quyurcarai.

¹²Wine-arkanek atsanek naugitulit napat, figs-aanek-llu cali naugitulit piunrirciqanka, qanrutkellri angutnun kenkuurtem̄inun cikiutelqen̄iluki akiliutekluki aipaqraarluni. Naucetaarvii wine-arkanek atsanek-llu yuilqutun ayuqlirivkarciqanka; yuilqurmiutaat ungungssiaraat piunrirciqait.

¹³Anucimirqecetaarciqaqa nalluyagucilallri wangnek pitekluku, elegciaqami aruviarnek Baal-amun kenugutnek-llu aqaarluni kenkuurten̄i yuaralallrinek. ATANEQ qanertuq.

¹⁴Taumek ataam ayauteqata'rqa yuilqumun mertailngurmun, tuani kenegyagutenqigceciiqua qalarulluku kenekmek.

¹⁵Elliinun uterceciiqanka naucetaarvii wine-arkanek Picurliim-llu Kuignayua amiigurrluku neryuniurutmun. Maliguciiquq wangnun ayagyuallermini pillrucirmitun, Egypt-aamek taillermini.

¹⁶Uiminek-llu ataam tuqlulangenqigciiqaanga—Baal-aminek-llu tuqlunqiggngaitaanga.[3]

¹⁷Wiinga watqapik Baal-am atra elliinun aterpagcetenqiggngaitaqa.

¹⁸Taum nalliini akqucillgutkeciqanka yuilqurmiutaat ungungssit yaqulget-llu, yuunka akngirtenritniarait. Au͡g'arciqanka-llu tamalkuita anguyagcuutet saskut nunamek, tamalkuita nuussirpiit urluvret-llu, yuunka-llu uitavkarciqanka nepaitmi pengegnailngurmi-llu.

¹⁹Israel-aaq, nuliqsaguciiqamken; Piciulua; allaliuqsaunii piciqua; Kenkuralarciqamken nakleku'urluten-llu piksagulluten-llu akwarpak pikarkauluten.

²⁰Akqutkelqa aturluku piksaguciiqamken, elpet-llu nallunrirciqan ATANRUCIQA.

²¹Taum nalliini kiuciqanka piicautai yum'a Israel-aam.[4] Ellalluk tuc'eciiqaqa nunamun, nuna-llu naugiciquq mukaarkanek wine-arkanek-llu olive-aanek-llu.

²³Yuunka nunalgarceciiqanka tamaavet nunamun tukuurtelluki-llu. Kenekmek nasviciiqanka imkut aterpagcimallret “Kenkumanrilnguq,” imkut-llu aterpagcimallret “Yuk'enrilkenka” Qanerciqua, “Elpeci yuk'amci,” kiuciqut-llu, “Elpet Agayutkamteggen.”