Read Yupik Hosea 4 Bible Online

Hosea 4 - Yupik bible

Hosea 4

¹ATANEQ Israel-aam yuinun tuaten pillruniluku qanerkangqertuq tamaani nunami uitalrianun. Niicugni, Israel-aaq, qanellrinek: “Piciunermek kenekmek-llu pitaituq maani nunami, yuut-llu nallunaiqsaitelaraatnga Agayutngulua.

²Akqillerteng atuyuunaku; iqluyugluteng, tuquciyugluteng, teglegyugluteng, akusrarutekiyugluteng tuaten. Narurcinek pingiinarluni, tuqurqiurluteng tuaten.

³Taumek nuna kinerciquq, cat-llu tamarmeng qaingani unguvalriit nalaciqut. Tamarmeng ungungssit yaqulget-llu, neqngung'e'rmeng-llu nalaciqut.”

⁴ATANEQ qanertuq, “Yuut tuaten pillruniluki qaneryaqunaci nunurpek'naki-llu — elpeci agayulirten̄i piluci qanemyuugartua.

⁵Unugmi erenrani-llu elluaturqevkenaci pilartuci, prophet-aat-llu cangallruvkenateng elpecen̄i. Piunriqatarqa Israel-aaq, aanasi.

⁶Yuunka assiitellriamek ciunerkangqertut nallunaiqsaitelaamegteggu wang'uciqa. Elpeci agayulirten̄i nallunairyuumiitelararci wang'uciqa ciuniullruvkenaki-llu elitnaurutenka, taumek wiinga qessakekemci ciuniurngaunaki-llu qetunrarpeci wangnun agayulirten͞gullrat.

⁷“Agayulirten̄i amllerillerci maliggluku, assiilnguq atullerci tungemnun pingiinartuq, taumek takarnarquceci cimirciqaqa kasngunarqellriamek.

⁸Tukuurtuci assiilngillratgun yum'a, taumek cingumalaqeci kiiki assiilngirturalaasqelluki.

⁹Nangteqluci aturciqerci ayuqii yuut anucimirqecetaarutkaat! Anucimirqecetaarciqamci assiilnguq atullerci akilirtelluku.

¹⁰Nerciqsaaquci elliitnek pikiumacirpecetun, tau͡gaam camirrngaunaci. Agayuvikeciqaci irniangevkaritulit agayutet, tau͡gaam cali irniangengaituci, tua-i-wa tunutellruavcia maliggnaluki allat agayutet.”

¹¹ATANEQ qanertuq, “Wine-am, tamarmek ak'allaam nutaram-llu, yuunka usviirucetai!

¹²Kiituani-llu muraggarmun ellatessulangut! Muraggaam qanrut'larai canek nallunricukaitnek! Unitellruatnga. Arnatun akissuurtellriatun, cikiutekut ellmeggnek allanun agayutnun.

¹³Qigcikek'ngameggni ingrit kangritni elliilartut ekuagiluteng, qemit-llu qaingitni aruviararaqluteng aciatni sugtulriit avayalilriit napat, napam talinra assirpakaan! “Taumek, panici akissuurtelalriit, ukurraci-llu akusrarutekevkaraqluteng.

¹⁴Tau͡gaam wiinga mat'umek anucimirqecetaarngaitanka, tua-i-wa elpeci-llu akusrarutekilaavci agayuvigpiim akissuinek,[6] pillgutekluki-llu elliiluci agayutailnguut ekuagiyaraitnun. Waten umyuartulriim qanrutkuciatun, ‘Yuut usviilnguut navguumaciqut.’

¹⁵“Elpeci Israel-aam yuini piciunrilngerpeci wangnun, Judah-m yui pinarqutailkilit tamatumun. Agayuyaqunaci Gilgal-aami Bethaven-aami-llu,[7] akqiksaunaci-llu tuani atrakun unguvalriim ATANREM.

¹⁶Yui Israel-aam tatervaugut ciulvagtun. Qaillun wii nerqeciqsia qusngiyagartun carr'ilqami?

¹⁷Israel-aam yui agayutnguat umyugiumait. Umyugait aturceciu.

¹⁸Wine-amek amllermek merraarluteng, angniutek'laraat akissuullerteng, kasngunarqellria aturyunruluku elluarucimi.

¹⁹Anuqem tengeskiitun ayaucimaciqut, kasnguyugciqut-llu ekuagilallermeggnek agayutailngurtun.