Read Yupik Hosea 7 Bible Online

Hosea 7 - Yupik bible

Hosea 7

¹“Canrircecugaqamki yuunka Israel-aat tukuurcetenqiggluki-llu, kiingan tanglaraqa umyuarrliqellrat assiitellria-llu caliarat. Piciunrit'lartut ilameggnun; it'rarluteng enenun teglegaqluteng; uayaaraqluki yuut tumyarani.

²Umyugaitnun tut'eqayuunani wangnun umyuaqerkaucia man'a assiitellria; tau͡gaam assiilnguita kassugusngait, wiinga-llu nallunguarciiganaki.”

³ATANEQ qanertuq, “Yuut ukvertelaraat angayuqaq atanerruari-llu aassaqluteng assiitellriatgun picirkiuramegteggun.

⁴Tamarmeng alingnariut piciuvkenateng-llu. Eq'ukutiit ayuquq kangiplugtun kumauralriatun kaminiam kelipissuutiini, cayugaqsailkiitun kelipistem keliparkaq upingarinatkaanun.

⁵Ernermi taumi angayuqam nerevkaritiini angayuqaq atanerruari-llu taangiqevkarait usviirutelluki wine-amek.

⁶Aa-ang, ekuagut kelipissuutetun assiitellriamek picirkiullermegteggun. Unugpak eq'urtellrat kangiplugtun kumauralriatun ayuquq, ercan-llu ekuallagluni.

⁷“Qenertellermeng pitaciatun tuqurqellruit atanirturteteng. Tuqurqumallruut angayuqrit kinguqliqu'urluteng, tau͡gaam atauciunger'mi kina wangnun ikayungcarluni piicallrunrituq.”

⁸ATANEQ qanertuq, “Israel-aam yui kelipatun uuvlaagumalriatun ayuqut. Cacetuqutekiameng avaqlirmeggnek atanruvignek

⁹elpekevkenaku-llu cacetuqutekillermegteggun ilakumanrilngurnek pinimeggnek teguimacirteng. Ernerkait naaqucingqertut, tau͡gaam tamana nalluat.

¹⁰Ellmeggnek pivakellrata Israel-aam yuin assiiluciat nasvalaraa. Tuaten-llu tamakut ellmeggnun tutaangraata wangnun uterteksaunateng, ATANERMUN Agayutmeggnun.

¹¹Israel-aaq pillinqigtaalartuq usviilngurtun yaqulegtun; yuin ciumek Egypt-aaq ikayungcarvikaat, tua-i-llu caugarrluteng Assyria-mun!

¹²Tau͡gaam kuvyamek civciciqua naptelluki-llu yaqulegtun maagguirinanratni. Anucimirqecetaarciqanka assiilngurmek atullratnek.

¹³“Aarnarqellriamek ciunerkangqertut! Avtellruameng wangnek inglulilluteng-llu wangnun. Piunriumaciqut. Anirturyullruyaaqanka, tau͡gaam agayulallrat wangnun piciullrunrituq.

¹⁴Ilungluteng wangnun piicaksaitut, tau͡gaam palurquagaqluteng aaraluteng-llu agayumanrilnguut pilauciicetun. Piicagaqameng mukaarkamek wine-amek-llu piyugluteng ellmeggnek kilirturluteng pilartut agayutailngurcetun. Inglulitaalriaruvagtat!

¹⁵Wiinga-llu anglicallrungramteng pinirivkarluki-llu umyuarrliqutellruatnga.

¹⁶Ayassaagturluteng wangnek agayutmun piniilngurmun. Kemyuksunaitut urluvertun nalqialngurtun. Ciuliqagteteng qalartelaata ucuryaggluteng, nangteqnarqellriakun tuquciqut, Egypt-aarmiut-llu engelaraciqut.”