Read Yupik Hosea 8 Bible Online

Hosea 8 - Yupik bible

Hosea 8

¹ATANEQ qanertuq, “Cupiciu elpengcarissuun! Inglut ellu'urtut nunamnun yaqulpagtun! Yum'a navellruat akqut'lilqa ellait ilakluki inglucilluteng-llu elitnaurutemnun.

²Tuqlulangerme'gten͞ga Agayutmeggnek wangnun-llu yukniaqluteng nallunritnilua-llu,

³qessakellruat assilria. Man'a pitekluku ingluita malirqeraciqait.

⁴“Yuunka cucuklillruut angayuqanek, tau͡gaam ellaita umyuarteng aturluku pillruut. Ciuliqagtekanek ellimerrillruut, tau͡gaam wiinga apelcirraarpek'nii. Teguit qerrirliuteteng suulutaaruteteng-llu agayutngualiluteng-llu — ellaita ellmeggnek navguutekameggnun.

⁵Eq'ukaqa cakneq suulutaaq angucaluq kuluvaguaq agayuvikelallrat yuin nunarpiim Samaria-m. Qenrutanka cakneq. Qaku taqeqatartatgu agayutngualiullerteng?

⁶Israelite-am muraliurtem pilialqaa agayutnguaq, tauna watqapik agayutngunrituq! Suulutaaq kuluvaguaq agayuvikelallrat Samaria-mi kaugtuarluni ciqumcimaciquq!

⁷Anuqmek nauceciilriatun pikuneng, quyurciciqut ellarayagmek! Naucirivigmi mukaarkat taqmigtenrilkuneng keliparkaurcesciigatut. Tau͡gaam kelipaurcaaqengraata, allanret neryarait.

⁸Israel-aaq allatun atanruvigtun ayuqliriuq atuunrirluni-llu navgumalriatun egatetun.

⁹Tatervagtun yuilqurmiutartun ciulvagtun, Israel-aam yui umyuarteng aturluku yuugut. Assyria ullagluku ikayungcallruat allat-llu cali atanruviit akilirluki ililiisqut camun pivkaasqevkenateng.

¹⁰Tau͡gaam wiinga waniwa quyurrluki anucimirqecetaaqataranka. Ak'anivkenateng qiperrlugciqut aknirniurluteng atanerruarata Assyria-rmiut nangeskateng.

¹¹“Amllerriinallrat maliggluku ekuaviit Israel-aam yuin piliari assiilnguirvigkat, amlleriinarciqut assiilngirvigkait.

¹²Igaucilartua naaquciilngurnek elitnaurutkaitnek yuut, tau͡gaam qessakait tangnerranaqniluki allayuuniluki-llu.

¹³Elliilartut ekuagarkanek wangnun nerluki-llu kemget ekuagat. Tau͡gaam Wiinga, ATANERMI, ilukegcitkenritanka, waniwa-llu neq'e'rciqaqa assiilnguat anucimirqecetaarciqanka-llu tamana assiilnguat pitekluku; ataam uterceciiqanka Egypt-aamun!

¹⁴“Israel-aam yui pilillruut angayuqat enaitnek, tau͡gaam nalluyagutaat ellaita Piliaqestellerteng. Judah-m yui pilillruut asvairqumalrianek nunarpagnek. Tau͡gaam wiinga ayagceciciqua kenermek ekuaciqai-llu angayuqat enait nunarpait-llu.”