Read Yupik Hosea 9 Bible Online

Hosea 9 - Yupik bible

Hosea 9

¹Israel-aam yuini, taqnariaci nerevkariyararpeci atulallrat agayutailngurcetun. Agayutsi unitellruaci piciunrirluci elliinun. Nunami tamiin elpecen̄ek akissutun Baal-amun agayutnguamun tunellruuci, kenekluki-llu mukaarkat elliinek elpecen̄un akiliuteksukluki.

²Tau͡gaam ak'anivkenaci nuruciiquci mukaarkanek olive-aat-llu uquatnek, wine-artairutarkauluni-llu.

³Israel-aam yui uitaurngaitut ATANREM nunautiini, tau͡gaam Egypt-aamun utertarkauluteng menuulrianek-llu neqnek nerlangarkauluteng[8] Assyria-mi.

⁴Tamakuni ilakumanrilngurni nunani aturciigaciiqaat wine-amek elliilallerkarteng ATANERMUN wall'u ullaucesciiganaki ekuagarkateng elliinun. Neqaita menulirciqai kinkut imkut nerelriit, neqtun nerlallricetun tungmagciyarani. Ellaita tau͡gaam kainrillerkaatnun atuugarkauluteng; ilii-llu elliitekumangaunani ATANREM Agayuvigpiinun.

⁵Pillerkaq-llu tekiskan apertuumalrianun nerevkariyaranun takaqutnguluteng ATANERMUN, qaillun tuani piciqat?

⁶Picurlagnarqellriim tekiskateng yuut-llu cekavvluteng, Egypt-aarmiut quyurciiqait — quyurrluki tungmaggnaluki Memphis-aami! Tukuutait qerrirlit enaita-llu uitavillrit caranglluut nauciqait cukilanat-llu naugarkauluki.

⁷Anucimirqecetaarillerkaq tekituq, tuani yuut caliameng akiliutiinek akurturciqut. Tuaten pikan, Israel-aam nallunriciiqaa! Qanertuci, “Una prophet-aaq usviituq. Una angun anernerkun ciuliqagcimalria usviilnguuguq.” Elpeci yugni eq'ukqapiararavcia assiilngurci cakneq angelriaruan.

⁸Agayutem ayagcetellruyaaqaanga aarcirturyartuusqelluki yun'i Israel-aat. Tau͡gken natmun ayalqa tamalkuan, elpeci pitaqengnaquralararpecia yaqulegtun. Agayutem-llu Agayuvigpiin ilukengraaku yuut ingluk'laamegteki prophet-aat.

⁹Gibeah-mi uitallermeggni ayuqucillermegcetun, umyuarrliqeqapiartut caliameggni.[9] Agayutem assiilnguit umyuaqluki anucimirqecetaarciqai tamana pitekluku.

¹⁰ATANEQ qanertuq, “Nalaqeqarraallemni Israel-aaq, qau͡gyarrlainarmi mertailngurmi yuilqumi wine-arkanek atsanek nalaqutellriatun ayuqellruuq. Tangerqerraallemni ciuliaci, figs-aanek nauqerraallernek tangellriatun ayuqellruut. Tau͡gaam Ingrimun Peor-amun tekicameng, Baal-amun agayulangellruut kiituani miryalngunarqellriatun ayuqliriut agayutnguatun kenkek'ngamegcetun.

¹¹Israel-aam ucurnarqucia tengluni ayagciquq yaqulegtun, mikelngurnek-llu yuurtellriartairuciiquq ellaitnun, arnanek qingalriartaunani, mikelngurnek alairilriartaunani.

¹²Tau͡gaam anglicaringraata mikelngurnek, wiinga teguyaranka atauciungraan unguvavkarpek'naku. Cakaarluki ukut yuut uniskumki, cat assiitellriit ellaitnun turqaqciqut.”

¹³ATANEQ, tangrranka irniarit pissuumavkarluki tuqucimaluki-llu.

¹⁴Qaillun pisqeqatarcia elpenun ukut yuut? Qingayuiruteski arnait! Aamarcesciigalivkarki irniarit!

¹⁵ATANEQ qanertuq, “Tamarmi caruyallrat ayagnillruuq Gilgal-aami. Tuaken ayaglua eq'uyagutellruanka. Assiilngurmek-llu calillrat pitekluku, anevkarciqanka nunamnek. Kenkenqiggngairuciiqanka; tamarmeng ciuliqagtait inglucitellruut wangnun.

¹⁶Israel-aam yui ayuqut naucetaatun acilqurri kinerluki atsangesciigalngurtun. Irniangengaitut, irniangyaaqengrata-llu, wiinga tuquciiqanka mikelnguut kenkek'ngait.”

¹⁷Agayutem kevgiuqengama cakaarciqai yun'i, tua-i-wa niicunrilatni. Calligtellriarurciiqut atanruviit akulaitni.