Read Yupik Joel 1 Bible Online

Joel 1 - Yupik bible

Joel 1

¹ATANREM man'a qanelqaa Joel-aamun Pethuel-aam qetunraanun.

²Murilkici, ak'alla'arni yugni; tamarpeci-llu Judah-melngurni, niicugnici. Waten-qaa ayuqellria piqaqsaituq nallevcen̄i wall'u ciuliarpeci nalliini?

³Irniarpecen̄un qanrutkiciu; irniarpeci-llu irniameggnun qanrutkeciqaat, ellaita-llu kinguverkameggnun qanrutekniarait.

⁴Quyurmeng amlleqapigtellriit petgertayulit kinguqliqu'urluteng mit'ellruut naucetaanun; ciuqlirmeng ilakuarit, kinguqliita ner'aqluki.

⁵Tupagluci aluviliurci, taangaryulriani; qiaci, wine-amek mer'ayulriani; tua-i-wa wine-arkat atsat piunriumiita.

⁶Petgertayulirugaat anguyagaat nunavut; piniqapigtut amllessiyaagameng-llu naaqesciiganateng; keggutait ipegtaluteng yugtutulim keggutaitun.

⁷Piunrirait wine-arkat napayagait tamualuki-llu figs-aanek naugitulit napat. Qeltairluki napat avayait qat'riviatnun.

⁸Qiaci, yugni, nasaurlurtun qivrulriatun tuqulriamek angutmek uikaqsaaqellerminek.

⁹Mukaarkartaituq wine-amek-llu elliitekanek Agayuvigpagmun; agayulirtet-llu tuquillertun ayuqut elliitekailameng ATANERMUN.

¹⁰Naucetaarviit naulriartaitqapigtut; nuna tuquillertun angniituq mukaarkat piunriumiita wine-arkat-llu atsat kinerluteng, olive-aat-llu napait kinerluki nalaluteng.

¹¹Angniici, nauceciiyurten̄i; qiaci, wine-arkanek napanek aulukilriani, tua-i-wa mukaarkat, barley-t, allat-llu tamarmeng naucetaat piunriumiita.

¹²Nauviit wine-arkat figs-aat-llu napait nalaut; tamarmeng-llu napat atsangtulit nalaluteng kinerluki. Yuut-llu angnirciigaliluteng.

¹³Agayulirten̄i, ekuavigmi-llu kevgiulriani, missuullernek all'uci qiaci! Agayuvigpagmun iterluci unugpak aluviliurci yuarnayulriatun! Tua-i-wa mukaarkartailan wine-arkartaunani-llu elliitekarpecen̄ek Agayutevcen̄un.

¹⁴Alerquigici yagyaraq atuusqelluku; quyurtesqelluki-llu! Quyurrluki ciuliqagtet tamalkuita-llu Judah-m yui Agayuvigpiinun ATANREM Agayutevci tuani-llu elliinun qayagaci!

¹⁵ATANREM ernerkiuraa canimelliuq, erneq tauna Artuqailnguum piunririllerkaa. Alingnarqellriaruqatartuq tauna erneq!

¹⁶Casciiganata tangvagaput naucetaaput piunriumallratni. Angnirnarqellriartairutuq Agayuvigpii Agayutemta.

¹⁷Kinertellriim nunam naucetaarkat nalavkarai. Mukaarkanek qemagtarkartailan, qemagciviit camek imaunateng imlartut.

¹⁸Kuluviit neplirtut nangteqluteng kaigluteng neqkailameng marami; katngiit-llu qusngit nangteqmiluteng.

¹⁹Qayagauramken, ATANEQ, marat napat-llu kinraki, tuarpiaq kenrem ekuallrukai.

²⁰Ungungssiaraunge'rmeng-llu qayagauraatgen, tua-i-wa kuiggaaraat kinrata.