Read Yupik Amos 1 Bible Online

Amos 1 - Yupik bible

Amos 1

¹Makut qaneryaraqai Amos-aam, qusngiliurten͞guluni nunarrarnek Tekoa-mek kingunerluni. Allrakuk malruk nunam pektellran ciungani, Uzziah angayuqrullrani Judah-mi Jeroboam-aaq-llu, Jehoash-aam qetunraa, angayuqruluni Israel-aami, ATANREM nasvitellrua Amos-aaq tamalkuitnek makunek Israel-aam ayuqucianek.

²Amos-aaq qanertuq, “ATANEQ uirraniuq Ingrimek Zion-aamek; erinii kallilriatun tailuni Jerusalem-aamek. Naugitulit nunat kinrai, can'get-llu Ingrimi Carmel-aami nalaluteng.”

³ATANEQ qanertuq, “Damascus-aam yui assiilnginqigtaallruut, man'a-llu pitekluku pinritevkenaki anucimirqecetaarciqanka. Aulukellruit Gilead-aam yui anagulluki mulngakevkenaki.

⁴Taumek kenermek igceciciqua Angayuqam Hazael-aam angayuqam eniinun piliallranun, ekuavkarciqanka-llu cayailkutai Angayuqam Benhadad-aam.

⁵Navgurciqanka ikirtuqai nunarpiim Damascus-aam, au͡g'arluki-llu uitalriit Aven-aam Kuignayuani, Betheden-aam-llu atanirturtii. Syria-m-llu yui ayaucimaciqut itertauluteng Kir-am nuniinun.”

⁶ATANEQ qanertuq, “Gaza-m yui assiilnginqigtaalartut, man'a-llu pitekluku pinritevkenaki anucimirqecetaarciqanka. Tua-i-wa ayautellruitki tamalkuita atanruviim yui Edom-aamun-llu tunluki.

⁷Taumek igceciciqua kenermek Gaza-m qacarnerinun ekuavkarluki-llu cayailkutai.

⁸Au͡g'arciqanka nunarpiim Ashdod-aam Ashkelon-aam-llu atanirturtai. Anucimirqecetaarciqaqa nunarpak Ekron-aaq, tamarmeng-llu Philistine-at un'gartellret tuquciqut.”

⁹ATANEQ qanertuq, “Tyre-am yui assiilnginqigtaalartut, man'a-llu pitekluku pinritevkenaki anucimirqecetaarciqanka. Ayautellruit tamalkuita atanruviim yui nuniitnek ayagtelluki Edom-aamun, cakaarluku atunem akquyuteklerteng yugnikutarkauluteng.

¹⁰Taumek igceciciqua kenermek Tyre-am nunarpiin qacarnerinun cayailkutai-llu ekuavkarluki.”

¹¹ATANEQ qanertuq, “Edom-aam yui assiilnginqigtaalartut, man'a-llu pitekluku pinritevkenaki anucimirqecetaarciqanka. Yuallruit tungelquteng,[1] Israelite-at, takumcukellrunritait-llu. Qenertellrat engelaunani, qenertenriyuunateng-llu.

¹²Taumek igceciciqua kenermek nunarpagmun Teman-aamun ekuavkarluki-llu cayailkutai Bozrah-m.”

¹³ATANEQ qanertuq, “Ammon-aam yui assiilnginqigtaalartut, man'a pitekluku pinritevkenaki anucimirqecetaarciqanka. Anguyagaqameng nunauteteng ilangnaqluku, arnat qingalriit aqsait ullirtelallruit Gilead-aami.

¹⁴Taumek igceciciqua kenermek nunarpiim Rabbah-m qacarnerinun cauyailkutai-llu ekuavkarluki. Tuani ernermi anguyakuneng qayagpagaciqut, anguyallrat-llu tukniciquq ellarayagtun tuknilriatun ayuqluni.

¹⁵Angayuqrat atanerruari-llu ayagcecimaciqut nunameggnek.”