Read Yupik Amos 2 Bible Online

Amos 2 - Yupik bible

Amos 2

¹ATANEQ qanertuq, “Moab-am yui assiilnginqigtaalartut, man'a pitekluku pinritevkenaki anucimirqecetaarciqanka. Qigcikevkenaki angayuqran Edom-aam enri ekuavkallruit qamllerurrluki.

²Kenermek igceciciqua Moab-am nuniinun ekuavkarluki-llu cayailkutai Kerioth-aam. Moab-am yui tuquciqut niiskengaqluku anguyiim nepii, anguyagtet qayagpagalluteng cupu'uryarat-llu neplirluteng.

³Tuquciiqaqa atanirturtii Moab-am tamalkuita-llu ciuliqagtai nunam.”

⁴ATANEQ qanertuq, “Judah-m yui assiilnginqigtaalartut, man'a pitekluku pinritevkenaki anucimirqecetaarciqanka. Caukenritait elitnaurutenka alerquutenka-llu aturpek'naki. Iqlutmurucimiimeng agayutnguatgun ciuliameng kevgiullritgun.

⁵Taumek kenermek igceciciqua Judah-mun ekuavkarluki-llu Jerusalem-aam cayailkutai.”

⁶ATANEQ qanertuq, “Israel-aam yui assiilnginqigtaalartut, man'a-llu pitekluku pinritevkenaki anucimirqecetaarciqanka. Canganarqutailnguut yuut akilicisciigalnguut akiilngumeggnek tunlarait teguarurrluki, arrsaulriit akilirisciiganateng aluilitaungraagnek.

⁷Tutmautaqluki pinialnguut casciigalnguut-llu, arrsaulriit-llu cingqaquaqluki tumemeggnek. Angun atani-llu akusrarutekilartuk ataucimek arnamek pistem̄ek, menulirluku tanqilria atqa.

⁸Agayularvigni tamalkuitni yuut qavalartut curirluteng aturanek tegulallermeggnek arrsaulrianek akiilnguirciigacailkutkevkarluki. Agayuvigpiini-llu Agayutmeng mer'aqluteng wine-amek tegullermeggnek ellmeggnun akinek akiilngulegnek.

⁹“Tau͡gken cali, yumni, elpeci pitekluci piunrirteqapigtellruanka Ammorite-at sugtutalriit cedar-aatun napatun, pinirtaluteng-llu napatun oak-atun.

¹⁰Anutellruamci Egypt-aamek, ciuliqaggluci-llu yuilqukun allrakuni yuinaagni malrugni (40), cikirluci-llu Ammorite-at nuniitnek elpecen̄un pikesqelluku.

¹¹Cucukellruanka qetunrarpeci ilait prophet-aarusqelluki, ayagyuarpeci-llu ilait nazirite-ausqelluki.[2] Man'a-qaa piciunrituq, Israel-aam yuini? Wiinga, ATANEQ, qanertua.

¹²Elpeci tau͡gaam nazirite-at wine-amek mercet'laraci, prophet-aat-llu qanerkiurutemnek qanresqeksaunaki.

¹³Taumek watua passiciiqamci nunamun, yuuniaraciquci-llu ikamracuaraagtun akalrialegtun ucialriatun mukaarkanek.

¹⁴Uqilaliunge'rmeng anagngaitut; pinilriit-llu angutet piniaruciiqut, anguyagtet-llu unguvateng anirturciigaciiqait.

¹⁵Pitgaqustet cirlakumaciqut, uqilalit anagngaitut, angutet-llu horse-aani ugingalriit anagngaunateng unguvarmeng.

¹⁶Tuani ernermi anguyagtet alingilqukacagaita caskuteng peggluki qimagciqut.” ATANEQ qanertut.