Read Yupik Amos 3 Bible Online

Amos 3 - Yupik bible

Amos 3

¹Israel-aam yuini, niiciu una qaneryaraq ATANREM qanrutkellra elpeci piluci, tamaq'apiarpeci anutellmini Egypt-aamek.

²“Tamalkuitni nunam yugugaini elpeci kiivci nallunritellruamci; taumek tamalkuita assiilnguci pitekluki anucimirqecetaarciqkemci.”

³Angutek-qaa malruk egilrallgutkeciquk, nani pairutlerkamegnek picirkiurraarpek'natek?

⁴Yugtutuli-qaa uirranilartuq napani pitarkaminek nalaqupailegmi? Yugtutulim-llu-qaa piyagaa uirranilartuq igtem̄ini camek pipailegmi?

⁵Yaqulek-qaa naptelartuq kapkaanamun neqcailengraan? Kapkaanaak-llu-qaa kegglartuk cam kegqercepailgatek?

⁶Cupu'uryaraq-qaa qalriayugngauq nunarpagni yuut alingevkarpek'naki? Pillugnarqellria-qaa nunarpagnun tut'elartuq ATANREM pivkarpailgani?

⁷Ilumun Artuqailnguq Quyigtatailnguq ATANEQ camek piyuituq piarkani nasvagpailegmiu pistem̄inun, prophet-aanun.

⁸Yugtutuli uirranikan, kina alingenriciiqa? ATANEQ Agayun qanqan, kia qanellra qanrutkenricartau?

⁹Qanruciki uitalriit angayuqat enaitni Egypt-aami Ashdod-aami-llu: “Quyurci pengunun Samaria-m avatiinelngurnun tangerrluki-llu angelriit uitacurlagnarqellriit inerciigalliqellriit-llu caliarit.”

¹⁰ATANEQ qanertuq, “Ukut yuut eneteng imilarait tegullermeggnek picirkartuyartellermegteggun nangcillermegteggun-llu. Piciuluteng yuullerkarteng nalluat.

¹¹Tua-i-llu inglukestiita nuniit kassuguciiqaa, cayailkutait-llu navgurluki, enait-llu uayarluki.”

¹²ATANEQ qanertuq, “Qusngiliurta nalaqut'lauciatun irugnek kiingan wall'u qusngim ciutiinek yugtutulim nerrellranek, tuaten-llu carraat uitaqerciqut Samaria-m yui, watua taklalriit aqumlleqegtarameggni.

¹³Niicugnirraarluci, aarcirturciki Jacob-aam kinguvri,” qanertuq Artuqailnguq Quyigtatailnguq ATANEQ.

¹⁴“Tuani ernermi anucimirqecetaaqumki Israel-aam yui assiilnguit pitekluki, Bethel-aami ekuaviit piunrirciqanka. Kangirait tamarmeng ekuaviit navgumaciqut nunamun igtaqluteng.

¹⁵Piunrirciqanka-llu uksumi enet atutukait kiagmi-llu cali enet atutukait. Enet tangnircaumalriit tugkarnek imciqut; tamarmeng enerpiit piunriumaciqut.”