Read Yupik Amos 4 Bible Online

Amos 4 - Yupik bible

Amos 4

¹Niicugniciu una, Samaria-m arnaini, uquringlalriani neqkegcaumalriatun Bashan-aam kuluvaitun, pinialngurnek aulukicurlagalriani, nanglluki arrsaulriit, uici-llu kiikirturaqluki taangarkarpecen̄ek taitesqelluci!

²Quyigtatailnguq Artuqailnguq ATANEQ tanqilriaruciatun, akqillruuq, “Erenret tekiciqut ayaucimallerkarci negcigteggun qamurluci; tamarpeci ayuqeciquci neqtun manam cangtaatun.

³Qamurciqaiceci canimellratnun qacarnerem navenrin elatmun-llu eggluci.”

⁴Artuqailnguq ATANEQ qanertuq, “Israel-aam yuini, tanqilriamun ayagluci Bethel-aami assiilngiryarturci, uitasciigalkuvci! Gilgal-aamun ayagluci pitacirpecetun assiilnguq aturciu! Kiiki-llu taitaqluci ungungssinek elliitekanek unuakut tamalkuita, qulngurutevcen̄ek-llu taitaqluci erenret pingayuurtaqata.

⁵Kiiki elliitekiciki kelipauteci quyassuutekluki Agayutmun, ucuryaggluci-llu elliilallerpecen̄ek pisqumallerci anaggluku! Tuaten elpeci piyunqelartuci, Israel-aam yuini.

⁶“Wanguuq piitnamek tuc'ecilleq tamalkuitnun nunarpagpecen̄un, tau͡gken cali elpeci utertellruvkenaci wangnun.

⁷Ellallircetellrunritaqa naucetaaci ellallugmek nuuqitellratni. Ellallircetellruaqa nunarpagnun atauciinun, allanun pivkarpek'naku. Ellallirtuq ataucimun naucetaarvigmun, alla tau͡gken naucetaarvik kinerluku.

⁸Meqsuum ugaani pinialiluteng, qavcin nunarpiit yuit ayagyaaqut nunarpagmun mermek nalaqutnayukluteng, tau͡gaam tuani cali mermek nuryugciut. Tau͡gken cali elpeci utertellruvkenaci wangnun.

⁹“Puqlerpalriamek anuqlircetellruaqa naucetaaci kinertelluki. Petgertayulit-llu nerait tamalkuita naucetaarvigpecen̄i naumalriit, wine-arkanek-llu atsanek naucetaarvici, figs-aanek olive-aanek-llu naugitulit napat. Tau͡gken cali elpeci utertellrunrituci wangnun.

¹⁰“Cangerlagmek-llu elpecen̄un ayagcecillruunga ayuqiinek Egypt-aamun pillma. Tuqutellruanka ayagyuaci anguyagkun ayaulluki-llu horse-aaruceci. Narumavkallruamci tepsarqellriamek tuqumalriit tepiitnek uitavigpecen̄i. Tau͡gken cali elpeci utertellrunrituci wangnun.

¹¹“Ilaci-llu piunrillruanka piunrillrucimtun Sodom-aaq Gomorrah-llu. Ilaci-llu kingunrulriit muragtun ekualriatun ayuqellruut kenermek tegullracetun. Tau͡gken cali elpeci utertellrunrituci wangnun,” qanertuq ATANEQ.

¹²“Taumek, Israel-aam yuini, anucimirqecetaaqataramci. Waten piqataama, upyuciu cuqyutkaqa elpecen̄un.”

¹³Agayutem piliaqellrui ingrit anuqet-llu piurcetaqluki. Umyuani nallunrircet'laraa yugnun; erneq-llu unuurcetaqluku. Piyualartuq qertulriarikun nunam. Wani-wa atra: ATANEQ Agayun Artuqailnguq!