Read Yupik Amos 5 Bible Online

Amos 5 - Yupik bible

Amos 5

¹Niicugnicia, Israel-aam yuini, mat'umek tungmagcissuutmek atullemni:

²Ciungani agtuumaksailnguq Israel-aaq iquuq, Nangertenqiggngaunani! Nunami taklauq cakaarumaluni, Kia-llu ikayurluku nangercetenritaa.

³Artuqailnguq ATANEQ qanertuq Israel-aam yuinun, “Nunarpak Israel-aami ayagceciuq tiissitsaanek anguyagten̄ek, yuinaat-llu talliman tau͡gaam uterrluteng; alla nunarpak ayagceciuq yuinarnek tallimanek, qulen-llu tau͡gaam uterrluteng.”

⁴ATANEQ qanertuq Israel-aam yuinun, “Taikici wangnun, unguvaniartuci.

⁵Beersheba-mun ayagyaqunaci agayunaluci. Yuaryaqunacia Bethel-aami Bethel-aaq caungailan. Gilgal-aamun ayagyaqunaci yui nunameggnek ancimaarkaungata.”

⁶Ullagciu ATANEQ unguvaniartuci. Ullanrilkuvcen̄i, atrarciquq kenertun Israel-aam yuinun. Kenrem ekuaciqai Bethel-aam yui, kia-llu imum niptesciigatarkauluku.

⁷Aarnarqellriamek ciunerkangqertuci, elpeci elluam iqlutun aturtaini, teglegiaqluki-llu yuut piyunarquciitnek!

⁸ATANREM piliaqellrui agyat, Pleiades-aaq Orion-aaq-llu. Tan'geq tanqigivkalaraa erneq-llu unuurcetaqluku. Qayagaularai imarpiit mer'it nutaan-llu kuvluki nunamun. Atengqertuq ATANERMEK.

⁹Piunrircet'larai piningraata asvairqucetuumaita.

¹⁰Elpeci yugni eq'ukaci inglulirtai elluanricaram qanlalriit-llu piciurrlainalrianek apqaurvigni.

¹¹Nangcilriaruuci arrsaulrianek teguigaqluki mukaarkautaitnek. Taumek uitangailnguci teggalquni enekegtaarni piliallerpecen̄i, merngaunaci-llu wine-amek naucetaarvikegtaaraliallerpecen̄ek.

¹²Nallunritaqa arcaqalriaruciat assiilngurpeci cali-llu qavcirqunek inerciigalliqellrucirci. Nangtelaraci ellualriit angutet, assiilngurkun akilircetaqluci, arrsaulriit-llu elluarrluki cuqcimavkaqsaunaki cuqcivigni.

¹³Taumek nepaunani piunarquq assiitellriim nalliini!

¹⁴Piyuumiutekiciu elluam atullerkaa, assiilnguq pivkenaku, unguvaniartuci. Nutaan-llu ATANREM Agayutem Artuqailnguum nayurciqaaci, qanlallerpeciucetun elliinun nayurciqniluci.

¹⁵Assiitellria eq'ukluku, piciuyaraq kenekluku, pinritevkenaku-llu elluarrluni cuqciyaraq aturluku apqaurvigni. Aipaagni ATANREM takumcuksuarai uum atanruviim yui cali unguvalriit.

¹⁶Taumek ATANEQ Artuqailnguq waten qanertuq, “Neplirciqut aluviliurluteng-llu nunarpiit tumyaraitni. Nauceciiyurten͞gungraata ellimerciqait qiatekesqelluki tuqullret, ilagarluki akilirtelluteng qiatekilriit.

¹⁷Qialriartangqerciqut tamarmeng wine-arkanek atsanek naucetaarviit. Makut tamarmeng tuaten piarkaugut ullagluci anucimirqecetaaryartuqataamci.” ATANEQ qanertuq.

¹⁸Assiqatanripaa-lli elpecen̄un ATANREM ernerkaanek nerinitellriani! Camek assilriamek erenrem taum piciqaci? Tua-i-wa erneq tauna tan'gercetellriaruciqngan elpecen̄un tanqigcetevkenani.

¹⁹Ayuqeciquq-llu angucetun qimalriatun yugtutulimek ungungssimek-llu pairkengluni! Wall'u angutetun eneminun utertellermini unatni enemi qacarneranun ayapellrani ciissirpiim kegkiitun!

²⁰ATANREM erenra taiciiquq tan'germek tanqigmek pivkenani; alianarqelriaruciquq, tanqigcetellriartaunani.

²¹ATANEQ qanertuq, “Wiinga eq'ukanka nerevkariyaraci; quyurtaaryaraci-llu nunanikevkenaki.

²²Elliilang'e'rpeci-llu ekuagarkanek mukaarkanek-llu, ciuniurngaitanka; ciuniurngaunaki-llu ungungssiaraat uqingcarraarluki elliitek'lalci wangnun.

²³Atunrirciki neptulriit yuarutet; aturcetaaci niicuumiitanka.

²⁴Tau͡gaam, elluarrluni cuqciyaraq kuigtun qurrlurceciu, elluaryaraq-llu kuigtun kinyuilkiitun.

²⁵“Israel-aam yuini, nauwa allrakuni yuinaagni malrugni (40) ciuliqagtellemni yuilqukun mertailngurkun kaigavikeksaitellrukemci elliivik'laasqellua ungungssinek tuqutarkanek elliitnek-llu.

²⁶Tau͡gaam watua, agayulaavci agayutnguanun Sakkuth-aamun, ataneq agayutsi, Kaiwan-aamun-llu agyamun agayutevcen̄un, ang'aquagarkaurtaci tamakut agayutnguat

²⁷ayauskumci teguarurtelluci nunamun Damascus-aam yaatiinelngurmun,” qanertuq ATANEQ Artuqailnguq.