Read Yupik Amos 6 Bible Online

Amos 6 - Yupik bible

Amos 6

¹Nakleng elpeci camek nuuqitevkenaci Zion-aami uitalriani Samaria-melngurni-llu camek alingniurpek'naci uitalriani—elpeci angelriaruluci ciuliqagtaini uum angelriim angayuqauvian Israel-aam, elpeci ikayungcarluteng yuut ullalaq'ngaitni!

²Ayagluci paqciu nunarpak Calneh. Cali-llu ayagci paqluku angelria nunarpii Hamath-aam atrarluci-llu Philistine-at nunarpiitnun Gath-amun. Ukut-qaa nunarpiit utumanrunritut angayuqauviagni Judah-m Israel-aam-llu? Nuniit-qaa angenruuq nunavcen̄i?

³Ciuniuryuumiitarci erenrem pilluggnarqellriim tekitellerkaa, elpeci tau͡gaam caliarpeciuggun tauna erneq canimellikanircet'lararci.

⁴Naklegnarqeciquci elpeci watua elluiluci taklalriani aqumlleqegtaarni, nerluci camirrluci qusngiyagarnek!

⁵Yuaruciyunqelartuci, David-aam pillratun, tua-i-llu aturcetaatgun aturluki.

⁶Qantatgun wine-amek mer'alartuci tepkegcaraqluci-llu tepkegcautet assinkacagaitnek, tau͡gken angniiluteksuunaku assiirutellra Israel-aam.

⁷Taumek elpeci ciumek teguarurciiqellriaci. Nerevkariyaraci anglaniyaraci-llu iqukliciiquq.

⁸Quyinrulria ATANEQ Artuqailnguq aarcirturiuq waten: “Eq'ukaqa pivakellrat Israel-aam yuin; caukenritanka enekegtarait. Nunarpiit imartuuman tunciqaqa inglukestaitnun.”

⁹Qulnek angutnek uitalriartangqerquni enemi ataucimi, tuquciqut.

¹⁰Tuqumalriim-llu tungelqurran, tungmagcillrata caliaqestiin, temii anuciiqa tuaken enemek. Tungelqurran qayagaurciqaa kina imna enemi tuani cali uitalria, “Allamek-qaa aipangqertuten?” Taum yuum kiuciqaa, “Qang'a!” Tungelqurra-llu qanerluni, “Nepaunak! Mulngaksunarqaakut wangkuta qanrutkellerkaanek ATANREM atran.”

¹¹ATANEQ alerquikan, enet angelriit mikellriit-llu navguumaciqut ciqumcimaluteng.

¹²Kuunit-qaa pangalgalartut teggalqut qaingatgun? Kia-qaa imarpik naucetaarvigtun itumtelaraa kuluvagnek qimugcirluni? Elpeci tau͡gken elluarrluni cuqciyaraq tuqunarqellriarurtarci, piciuneq-llu piciunricaraurrluku.

¹³Elpeci ucuryagtelartuci tegullruniluku nunarraq Lodebar-aq.[3] Qanraqluci ucuryaggluci, “Wangkuta pinilriaruamta Karnaim-aaq teguyugngaarput.”[4]

¹⁴ATANEQ Artuqailnguq tungaunani qanertuq, “Israel-aam yuini, ayagceciqatartua nunam allam anguyagtainek nunavci tegustekaatnek. Nangciiqaiceci-llu Hamath-aam Kuignayuanek neglirnermi ayagluteng Kuiggaq Arabah-q tekilluku ungalalirnermi.”