Read Yupik Jonah 1 Bible Online

Jonah 1 - Yupik bible

Jonah 1

¹Erenret iliitni ATANREM qalarutaa Jonah qetunraa Amittai-am.

²Qanerluni, “Nunarpagmun Nineveh-mun ayii, tugerluku qalarrniartuten; tua-i-wa nallunrilamku arcaqerluteng yuin assiiluciat.”

³Tau͡gaam Jonah nangerrluni ayagtuq ATANREM ciuqerranek qimagnaluni Tarshish-aamun. Atrarluni-llu Joppa-mun, tuani tangertuq sun'amek ayakatalriamek Tarshish-aamun. Ekniarutni-llu akilirluku ek'uq, maliggluki ayagnaluni ciuqerranek ATANREM Tarshish-aamun.

⁴Tau͡gaam ATANREM anuqa cayukarcetaa imarpigmi, anuqerpak-llu anagucan aarnarqellruuq sun'aq navgurnayukluni.

⁵Sun'am-llu ayagatestai alingameng eriniagut ikayuusqelluteng, kaigavikluki ellaita agayuteteng. Tua-i aarnarqessiyaallra utumartengnaqluku, egqaqait ucii; mermun. Tau͡gaam Jonah atrallruuq camavet sun'am iluanun inarrluni-llu, qavaryukapiggluni.

⁶Sun'am-llu alulartiin nalaqellinia tuani qanrulluku-llu, “Caluten qavarcit? Makluten agayuten qayagaurru ikayungcarvikluku. Takumcuksuaraakut piunrircetevkenata-llu.”

⁷Ellmeggnun-llu sun'am ayagatestai qanruyutut, “Kitaki nall'arcetaarinaurtukut, nallunrirniarput kitumun man'a aarnarqellria wangkutnun tut'evkaucianek.” Tua-i nall'arcetaarameng nall'arcetaarutiit Jonah-mun tut'uq.

⁸Taukut-llu qanrutaat, “Wani-wa qanruskut! Kina pitekluku man'a waten pia? Caluten maancit? Nani nunangqercit? Cat-llu yuut ilakatgen?”

⁹Jonah-m-llu kiugai, “Wiinga Hebrew-ruunga; qigcikilriaruunga ATANERMEK, qiliim Agayutiinek, piliaqestiignek imarpiim nunam-llu.”

¹⁰Cali-llu Jonah-m qanrulluki qimagniluni ATANERMEK. Taukut-llu sun'am ayagatestai alingqapigtut, qanerluteng-llu Jonah-mun, “Arcaqalriaruuq assiitellra tamatum tuatnallerpet!”

¹¹Tua-i kayungellra arcariinaan sun'am ayagatestain aptaat, “Qaillun wani-wa piciqseta elpet, imarpik quunengesqelluku?”

¹²Jonah-m-llu qanrutai, “Tegulua imarpigmun egcia, egeskuvcia imarpik quunengciquq. Nallunritaqa wii piteklua cayukautaaci.”

¹³Tau͡gaam pisqellratun pivkenaku tua-i sun'am ayagacestai tagengnaqsaaqut cen̄amun, pinirtacirramegcetun cavluteng. Tau͡gaam anuqa arcariinarluni, natetmurcesciiganateng.

¹⁴Taumek-llu qayagaut ATANERMUN, “Kaigavikamteggen ATANEQ, anucimirqecetaaryaqunata piunrirtelluta uum angutem unguvii pitekluku! Elpet, ATANEQ, man'a piyugtacirpetun caliaqan.”

¹⁵Tua-i Jonah teguat eggluku-llu imarpigmun, egmianun-llu anuqairrluni.

¹⁶Waten pillrani taukut sun'am ayagacestai alingameng cakneq ATANERMEK elliigut ekuagarkamek akeqluku-llu kevgiurciqniluku.

¹⁷ATANREM-llu pisquciatun neqerpiim Jonah igaa, tuanlluni-llu iluani neqem ernerni pingayuni unugni-llu pingayuni.