Read Yupik Jonah 4 Bible Online

Jonah 4 - Yupik bible

Jonah 4

¹Tau͡gaam Jonah-m umyugaa cakneq nall'artenrituq qenengluni-llu.

²Taumek piicagtuq ATANERMUN qanerluni, “ATANEQ, qanellrunritua-qaa ayagpailegma kingunemnek waten piciqniluten? Taumek pinertutacimtun qimallrulrianga Tarshish-aamun! Nallunrilamku takumcutalriarucin, naklegtarluten-llu Agayutngucin, qenqerrngianak, kenkirrlainarluten-llu, pinricen̄araqluku-llu anucimirqecetaarillerkan.

³Taumek kitaki, ATANEQ piicagvikamken, unguvaka tegusqelluku, assinruciqngan unguvavkenii tuqukuma.”

⁴Tua-llu ATANREM kiugaa, “Tua-i-qaa pitengqerrluten pinarqelriamek qenertuten?”

⁵Jonah tua-i an'uq nunat calaralirneratnun aqumluni-llu. Tuani-llu uqisngavigkiurami talinranun taum aqumuq, utaqalgirluni qaillun nunarpak Nineveh pimallerkaanek.

⁶ATANEQ-llu Agayun nauvkariuq naucetaarpagmek talisngavigkirluku Jonah, arenqialliqlerkaanek anirturluku. Tua-i Jonah quyauq cakneq taumek naulriamek.

⁷Tau͡gaam unuaquani erqaarallrani, Agayutem pisquciatun, paralum naucetaarpak callugaa, tauna-llu nalaluni.

⁸Tua-i-llu akerta piqaartelluku, Agayutem anuqlircetaa calaralirnermek cakneq kiirpagmek, Jonah-llu akerviurluni ellani nalluqaqatarnganaku. Tua-i-llu umyuartequq tuquyugyaaqluni. Qanerluni, “Wiinga tuqukuma assinruyartuq unguvavkenii.”

⁹Tau͡gaam Agayutem qanrutaa, “Ciin tua-i qenercit naucetaaq pitekluku?” Jonah-m-llu kiugaa, “Elluatun qenertua—qenngem-llu ugaani tuquyugtua!”

¹⁰Tua-llu ATANREM qanrutaa, “Una atam naumalria naullruuq unugpaagaq unuaquani-llu piunrirluni; elpet aulukellruvkenaku nauvkallruvkenaku-llu, amta-llu tua-i elpet taumek kusgurluten!

¹¹Tua-llu-qaa qaillun pitalriamek taum amllenranek wiinga naklekciqsia Nineveh, nunarpakayak? Atam tiissitsaat yuinaat arvinelgen (120,000) cipingakiit camek pinarqenrilnguut mikelnguut, amllernek-llu ungungssirugarnek pitarluni!”