Read Yupik Numbers 1 Bible Online

Numbers 1 - Yupik bible

Numbers 1

¹Erenret ciuqliatni iralum aipaan allrakum-llu aipaani Israel-aam yuin anellrata Egypt-aamek, ATANREM qalarutaa Moses-aaq Pelatekam ATANREM alailarvian iluani uitallrani Sinai-am yuilqurrani, qanerluni,

²“Aaron-aaq-llu naaqeciqatek Israel-aam yui naumavillgutkelriit ilakuralriit-llu. Igaulluki angutet atrit tamalkuita

³allrakungelriit yuinarmek wall'u cipluku anguyagten͞guyugngarilriit.

⁴Ikayurtekarpetegnek pilutek naumavillgutkelriit ciuliqagtaitnek.”

⁵Waniwa ukut angutet, ciuliqagten͞gulriit kinguveqellriartameggni, cucukumaluteng nunanek man'a caliaqumallrani: Reuben-aam kinguvrinek, Elizur-aaq qetunraa Shedeur-am;

⁶Simeon-aam kinguvrinek, Shelumiel-aaq Zurishaddai-am qetunraa;

⁷Judah-m kinguvrinek, Nahshon-aaq Amminadab-aam qetunraa;

⁸Issachar-am kinguvrinek, Nethanel-aaq Zuar-am qetunraa;

⁹Zebulon-aam kinguvrinek, Eliab-aaq Helon-aam qetunraa;

¹⁰Joseph-aankuk-llu Ephraim-aaq-llu kinguvekegnek, Elishama Ammihud-aam qetunraa, Manasseh-m-llu kinguvrinek, Gamaliel-aaq Padahzur-am qetunraa;

¹¹Benjamin-aam-llu kinguvrinek, Abidan-aaq Gideoni-m qetunraa;

¹²Dan-am-llu kinguvrinek, Ahiezer-aaq Ammishaddai-am qetunraa;

¹³Asher-aam-llu kinguvrinek, Pagiel-aaq Ochran-aam qetunraa;

¹⁴Gad-am-llu kinguvrinek, Eliasaph-aaq Deuel-aam qetunraa;

¹⁵Naphtali-m-llu kinguvrinek, Ahira Enan-aam qetunraa.

¹⁶Ukut waniwa cucukumallret yum'eggnek, ciuliqagten͞guarkauluteng ilameggnun, ciuqliuluteng naumallgutkelriartainun Israel-aam yuin.

¹⁷Ikayuqluki ukut apertuumalriit Moses-aankuk Aaron-aaq-llu

¹⁸quyurcetait yuut tamalkuita erenrin ciuqliatni iralum aipaan, igaulluki-llu yuut naumavillgutkelriit ilakuralriit-llu. Naaqluki atrit-llu igaulluki angutet yuinarmek allrakungellratnek ayagluki.

¹⁹ATANREM alerquutii aturluku Moses-aam naaqellrui yuut Sinai-am yuilqurrani.

²⁰Angutet yuinarmek allrakungellermeggnek ayagluteng anguyagten͞guyugngalriit igausngallruut atrit naumaviitgun nakmiin-llu ilaitgun, ayagneqluki Reuben-aam kinguvri Jacob-aam anngaqliq qetunraa. Waten amllertaut: Reuben-aam kinguvrinek yuinaak malruk arvinlegnek cipluku tiissitsaat, tiissitsaam-wa avga (46,500); Simeon-aam kinguvrinek yuinaak malruk yuinaunrita'armek cipluku tiissitsaat, yuinaat-wa akimiaq (59,300); Gad-am kinguvrinek yuinaak malruk tallimanek cipluku tiissitsaat, tiissitsaam-wa avga yuinaat malrunelgen qulmek cipluku (45,650); Judah-m kinguvrinek yuinaat pingayun akimiarunrita'armek cipluku tiissitsaat, tiissitsaam avga yuinarnek tallimanek cipluku (74,600); Issachar-am kinguvrinek yuinaak malruk akimiarunrita'armek cipluku tiissitsaat, yuinaat-wa yuinaat (54,400); Zebulon-aam kinguvrinek yuinaak malruk akimiaq malrugnek cipluku tiissitsaat yuinaat-wa yuinaat (57,400); Ephraim-aam kinguvrinek yuinaak malruk tiissitsaak tiissitsaam-wa avga (40,500); Manasseh-m kinguvrinek yuinaq qula malrugnek(...)

⁴⁷Levite-at tau͡gaam igausngallrunritut naumavimegteggun tamakucetun,

⁴⁸ATANREM qanrutellruaku Moses-aaq,

⁴⁹“Naaqekuvki angutet anguyagten͞guyugngalriit, Levi-am kinguvri ilaksaqunaki.

⁵⁰Pelatekaq ATANREM alailarvigkaa ellaitnun ataniumavkaqiu aklui-llu tamalkuita. Ayagat'larniaraat ellaita kevgiuraqluteng-llu tuani, arulairumaaqameng-llu avatiini uitaaqluteng.

⁵¹Upagaqavci Levite-at Pelatekaq imtelarciqaat, napartaqluku-llu arulairaqavci allamun. Tau͡gaam yuk alla Pelatekam mallgeskiinun pikan tauna tuqucimaarkauguq.

⁵²Israel-aam yui arulairumaaqameng quyuqetaarluteng pilarciqut, quyungqalriit nallunailkutangqerturluteng ellaita pimeggnek.

⁵³Tau͡gaam Levite-at uitalarciqut avatiini Pelatekam, murilkesten͞guluteng yugnun mallegnayukluku, Agayutmun-llu qenqerrutnayukluki tuaten pikata.”

⁵⁴Tuaten pillruut Israel-aam yui ATANREM alerquutellri Moses-aamun maliggluki.