Read Yupik Numbers 10 Bible Online

Numbers 10 - Yupik bible

Numbers 10

¹ATANEQ qanertuq Moses-aamun,

²“Pilikina malrugnek cupu'uryaragnek mulut'uugumalriamek qerrirlimek yuut qayagaurcuutekaatnek upagnariaqan wall'u quyurrnariaqata.

³Tamarmek cupumaaqagnek taktuamek yuut quyurtelarniartut elpenun Pelatekam ciuqerranun.

⁴Tau͡gken atauciq cupu'uryaraq cupumaaqan ciuliqagten͞gulriit Israel-aam yuinun kiimeng quyurtarkauluteng.

⁵Nanilnguarnek cupu'uryaraq qalriagaqan calaralirnermelnguut naumavillgutkelriit upagluteng ayalarciqut.

⁶Nanilnguarnek-llu qalrianqigeskan ungalalirnermi uitalriit upagluteng. Tua-i tuaten nanilngurnek qalriagaqan yuut nallunrit'larciqaat upaasqucirteng,

⁷tau͡gaam taktuamek qalriagaqata yuut quyurtelararkauluteng.

⁸Aaron-aam qetunrain agayulirtet cupu'uryarat cup'larciqait. Man'a-llu cupu'uryaratgun pilallerci picirkiutnguarkauguq taqsuunani elpecen̄un kinguverpecen̄un-llu tamalkuitnun.

⁹Anguyakuvci-llu ingluliurluki curugteci, cupu'uryaraq cupkiciu elpengcarissuutekluku anguyagarkanun, wiinga-llu ATANEQ Agayutevcen̄i, ikayurluci anirturniamci inglukestevcen̄ek.

¹⁰Cali-llu angnirnarqellriit nalliitni nerevkariyararpecen̄i-llu cupu'uryarat cup'larniaci, iralut ayagnillratni, elliigaqavci ekualuki, cali-llu elliigaqavci ilakuyucimun. Nutaan wiinga ikayurniamci. Wiinga ATANRUUNGA elpeci Agayutkarpecia.”

¹¹Yuinaurtellratni erenrin iralum aipaan, allrakum aipaani ayaggaanratnek Egypt-aamek, amirluq naluumauq Pelatekamek.

¹²Israel-aam-llu yuin ayagniraat ayallerteng Sinai-am yuilqurtaanek. Amirluq-llu arulairluni Paran-aam yuilqurtaanun.

¹³Ayagallerteng ayagniraat ayakarraarluteng ATANREM alerquutii Moses-aakun aturluku.

¹⁴Ayagaqameng tungliqutacirmegcetun ayalartut. Judah-mek nauvilget nallunailkutaanek-llu atulriit allakaqtaarluteng ciumek ayalartut, Nahshon-aamek Amminadab-aam qetunraanek atanerluteng.

¹⁵Nethanel-aam Zuar-am qetunraan ataniumaluki Issachar-amek naumavilget.

¹⁶Eliab-aam-llu Helon-aam qetunraan ataniumaluki Zebulon-aamek nauvilget.

¹⁷Nutaan-llu Pelatekaq imtelaraat, Gershon-aankuk-llu Merari-llu yuk'enka ayaulluku ayalartut.

¹⁸Tungliuluteng ayatulit Reuben-aamek nauvingqellriaruut, cali ukut allakaqtaarluteng quyungqaaqluteng, ayatuluteng Elizur-aamek Shedeur-am qetunraanek atanerluteng.

¹⁹Shelumiel-aaq-llu Zurishaddai-am qetunraa atanruluni Simeon-aamek naumavilegnun.

²⁰Eliasaph-aaq-llu Deuel-aam qetunraa Gad-amek naumavilget ataneqluku.

²¹Taukut-llu kinguatgun Levite-at Kohath-amek naumavilget ayalartut, kencignarqellrianek ayagaciluteng. Ukut-llu arulaillerkaatnun tekipailgata Pelatekaq napartelaraat.

²²Taukut-llu tungiitgun Ephraim-aamek naumavilget nallunailkutaanek-llu pilget ayalartut quyungqalriit allakaqtaarluteng, Elishama-mek Ammihud-aam qetunraanek atanerluteng.

²³Gamaliel-aaq-llu Padahzur-am qetunraa atanruluni Manasseh-mek naumavilegnun.

²⁴Abidan-aaq-llu Gideoni-m qetunraa Benjamin-aamek naumavilegnun atanruluni.

²⁵Nangenruluteng-llu Dan-amek naumavilget nallunailkutaanek-llu atulriit ayalararkauluteng murilkesten͞guluteng kinguatgun ciuqlimeng, allakaqtaarluteng ilakellriit quyungqaaqluteng, Ahiezer-aamek Ammishadai-am qetunraanek atanerluteng.

²⁶Pagiel-aaq-llu Ochran-aam qetunraa atanruluni Asher-aamek naumavilegnun,

²⁷Ahira-llu Enan-aam qetunraa Naphtali-mek naumavilegnun atanruluni.

²⁸Waten tungliqutacirmegcetun upagaqameng ayalartut Israel-aam yui, ilakellriit quyungqaaqluteng allakaqtaarluteng.

²⁹Moses-aam-llu cakini Hobab-aaq Reuel-aam Midian-aarmium qetunraa qanrutaa, “Ayakatartukut nunamun ATANREM waten wangkutnun qanrutkellranun, ‘Wiinga elpecen̄un cikiutekciqaqa’; maligeskut elluarrluten piniamteggen, ATANREM akqellruakut canek enuqisngaitniluta.”

³⁰Hobab-aam tau͡gaam kiugaa, “Ayagngaitua; nakmiin tau͡gaam ilamnun nakmiin-llu nunamnun ayagciqua.”

³¹Moses-aam cali pia, “Kaigavikamken unicaqunata, yuilqumi arulairvigkarnilriit nallunrilavki, apertuastekniamteggen-llu.

³²Maligeskuvkut atawaqautnek ATANREM cikiutainek wangkutnun avguciiqamteggen.”

³³Tua-i ayagtut ernerni pingayuni Sinai-amek qigcignarqellriamek ingrimek. Akqutem Yaassiiga ciunratgun ayalartuq arulairvigkaatnek yuarluni.

³⁴Upagaqata-llu ATANREM amirluan erenrani nayularai quliitni uitaluni.

³⁵Akqutem Yaassiiga ayagaqan Moses-aaq qanlartuq, “Makluten, ATANEQ, cekaveski inglukesteten, qimagtelluki eq'ukesteten.”

³⁶Arulairaqan-llu cali qanraqluni, “Uterten, ATANEQ, tiissitsaanun ilakuralriarinun Israel-aam.”