Read Yupik Numbers 11 Bible Online

Numbers 11 - Yupik bible

Numbers 11

¹Yuut qanemyuugartut picurlagallermeggnek niitelluteng ATANERMUN, ATANREM-llu eq'uqertellermini keneq ekuavkaraa akuliitgun piunrirluku uitaviata ilii elalirnermi uitalria.

²Yuut-llu Moses-aaq qayagauratni ikayuusqelluteng piicagvikaa ATANEQ, keneq-llu tamana nipluni.

³Taumek nuna tauna acillruat Taberah-mek, tuani ATANEQ ekuagivkallruan akuliitni.[1]

⁴Allanernek maligutellriartangqertuq Israel-aam yuinun. Tamakut kemegnek neryunqeggluteng, kiituani Israel-aam-llu yui taukut maliggluki qanemyuugangut: “Waniwa-kina kemegmek neqkangqerrli!

⁵Egypt-aami-ggem neqnek nerlallruukut akiinaki piyugtacimcetun, naunrarnek-llu ayuqenrilngurnek ner'aqluta.

⁶Tau͡gken maa-i pinialiluta. Camek allamek neqkaunata, makunek tau͡gaam manna-nek ner'aqluta unuaquaqan!”

⁷(Tamakut manna-t ayuqut naucetaarkayagartun, qaterrlugluteng esirrlugcen̄ateng.

⁸Yukutaq maliggluku nunamun tut'elartut unugmi. Unuaquani-llu yuut avulartut tamakunek arilluki-llu mukaarurqaarluki qallautelluki egatni, cake-aayagiluteng-llu; ner'aqaceteng ayuqluteng kelipatun uucimalriatun olive-aat uquatnek avuluki.)

¹⁰Moses-aam-llu niitai yuut quyuqetaarluteng qanemyuugalriit pelatekameng amiigitni. Uitacurlagtuq-llu, tua-i-wa ATANREM qenrucaki taukut yuut.

¹¹ATANEQ-llu qanrutaa, “Ciin assiilliqevkarcia? Ciin ilukegcitkenricia? Ciin-llu cikillrusia aulukillerkamnek ukunek yugnek?

¹²Wiinga piliaqellrunritanka yuurcetellruvkenaki-llu! Ciin anglicartaicetun pitarrlua mikelngurtun kevegluki ayagatesqessiki tekiutellerkaatnun tuavet nunamun akqutkellerpenun ciuliaritnun?

¹³Naken-llu ukut yuut kemegturkaitnek piqatarcia, kaigalriit qialuteng kemegturkameggnek pisqelluteng?

¹⁴Wiinga kiimenii ukut yuut auluklerkaat arturaqa; cakviurnarquq cakneq man'a wangnun!

¹⁵Waten ayuqlua aulukqataquvnga takumcuklua tuquvkarnga, eq'urruten man'a wiinga atunrirniarqa.”

¹⁶ATANREM qanrutaa Moses-aaq, “Quyurceski yuinaat pingayun qulnek cipluku (70) ciulirnerulriit atanerruaruluteng-llu Israel-aam yuinun; tailluki Pelatekamun nangengqallgucircetniartuten tuani.

¹⁷Wiinga atrarciqua qalarucarturluten tuani; anernerem iliinek cikiutekellma elpenun cikirciqanka, ikayuryugngariniaraatgen aulukillerpeni ukunek yugnek, kiivet pinrirluten.

¹⁸Waniwa qanruski yuut, ‘Menuircarci unuaqullerkamun; kemegmek neqkangqerciquci. Qanemyuugarpakallerci niilluku ATANREM unuaqu kemegturcetqataraaci, qanlaavci, “Kia kemegturceciiqakut?” Umyugiurluci-llu pilallruniluci Egypt-aami. Taumek ATANREM kemegturkarpecen̄ek cikirciqaaci, elpeci-llu nerciquci pinritevkenaci.

¹⁹Nerngaituci kiingan ataucimi ernermi wall'u malrugni wall'u tallimani wall'u qulni wall'u cali ernerni yuinarni,

²⁰tau͡gaam iralurrluci nerciquci kiituan ner'arpeci ilii maq'languq, miryalngukengluku-llu neqkarci. Watnaciquci qessakngavciu ATANEQ nayurtessi qanemyuugaraqluci-llu tungiinun qanerluci, “Ciin tanem wangkuta Egypt-aamek ayallruceta?”’”

²¹Tau͡gaam Moses-aaq qanertuq, “Yuut ilaliq'nganka amllertaut tiissitsaam avga, yuinaat-wa talliman tiissitsaat (600,000). Tau͡gken elpet qanerluten, ‘Wiinga kemegturkaitnek cikirciqanka iralumi ataucimi ner'arkaitnek.’

²²Tuqurqiciqukut-qaa kuluvagnek qusnginek-llu ukut yuut camirrluteng neqkaitnek? Imarpiim-llu-qaa neqai camiruteksugngait?”

²³ATANREM-llu kiugaa Moses-aaq, “Wiinga-qaa piniqa engelengqertuq? Waniwa tangrrarkaugan qanelqa piciurtelluku wall'u piciurtevkenaku!”

²⁴Tua-i Moses-aam anluni qanrutai yuut ATANREM qanellrinek. Quyurtelluki-llu yuinaat pingayun qulnek cipluku ciulirneret nangertelluki-llu Pelatekam avatiinun.

²⁵ATANEQ-llu atrarluni amirlukun qalarulluku. Anernerem-llu ilii Moses-aamun cikiutekellmi tunaa taukunun ciulirnernun. Taukut-llu anernerem tuc'ateng prophet-aatun qayagaut tau͡gaam ak'anun pivkenateng.

²⁶Malruk tau͡gaam ciulirneret ilagket Eldad-ankuk Medad-aaq-llu nunameggni uitallruuk Pelatekamun agevkenatek. Tuanlengraagnek anernerem tut'ellruak elkek-llu cali tuaten prophet-aatun qalarrlutek.

²⁷Ayagyuat iliita aqvaqurluni qanrucarturaa Moses-aaq Eldad-ankuk Medad-aaq-llu pillragnek.

²⁸Joshua-m-llu Nun-am qetunraan, Moses-aam kevgaan ayagyuarraanranek, qanrutaa Moses-aaq inerquusqellukek.

²⁹Moses-aam kiugaa, “Ciknakutan-qaa tamana wangnun? Wiinga-wa umyuamkun ATANERMUN anernera cikiutekesqumayaaqaqa yugnun tamalkuitnun, prophet-aatun qayagasqelluki!”

³⁰Moses-aaq-llu taukut-llu ciulirneret utertut yuut uitaviatnun.

³¹ATANREM-llu anuqenga'arcetaa, anuqa-llu iluvaulluni yaqulegnek imarpigmek, tengaurluteng nunam qul'ariikun. Mill'uteng-llu taukut uitaviatnun avatiinun-llu, yaqulgurrluku avatiit yaaqvanun.

³²Taumek tuani ernermi ernerpak unugpak-llu, unuaquani-llu yuut caliut yaqulegnek quyurciluteng; tamarmeng-llu yuinaak malruk qulnek cipluku (50) assigtat bushel-aat nurtevkenaki. Uitavimeng avatiitnun tamakut saggluki kinercirait.

³³Neqkalillrata nalliini ATANREM qenrutai cangerliqevkarluki-llu.

³⁴Taumek uitallrat aciraat Kibroth Hattaavah-mek[2] tua-i-wa tungmagtellruamegteki tuavet kemegmek neryuumillret.

³⁵Tuaken ayiimeng yuut arulairtut Hazeroth-amun.