Read Yupik Numbers 16 Bible Online

Numbers 16 - Yupik bible

Numbers 16

¹Korah Izhar-am qetunraa Levite-at iliit Kohath-amek naumavilek, inglulituq Moses-aam ciuliqagcillranun. Ilangluni-llu pingayunek Reuben-aamek ciulialegnek — Dathan-aamek, Abiram-aamek-llu qetunraagkenek Eliab-aamek, On-amek-llu qetunraanek Peleth-aam — cali-llu allanek Israel-aam yuinek nallunritestelilrianek ciuliqagten͞guluteng-llu yugnek cucukumallruluteng. Amllertaluteng yuinaat qula malruk qulnek cipluku (250).

³Quyurrluteng Moses-aam Aaron-aam-llu ciuqerragnun qanrutagket, “Elpetek anagarutengutek! Ukut yuut tamalkuita ATANREM pikai, ATANREM-llu nayuraakut tamamta. Ciin tua-i elpetegnek quyinrurrlutek picetek ukuni yugni?”

⁴Moses-aaq-llu mat'umek niicami ciktuq nunamun piicagluni.

⁵Qanrulluku-llu Korah ilai-llu, “Unuaqu ATANREM nasvagciqaa elliin pikekni; tauna elliin pikekni cucukellni-llu iluvarceciiqaa ellminun ekuavigmi.

⁶Waten pikici: unuaqu ilaten-llu kenercissuutnek piluci kumalrianek kangiplugnek imirluki aruvagkanek-llu kanevlerqaarluki ekuavigmun iluvauskiciki. Tuani tangerrniarput nalirput ATANERMUN cucukucianek. Elpeci tau͡gaam Levite-ani anagarulluci pilriaruuci!”

⁷

⁸Moses-aam cali Korah qanrutaa, “Niicugnici Levi-am qetunraini!

⁹Elpecen̄i-qaa carrauguq Agayutiin Israel-aam allakarillra elpecen̄ek iluvarvik'laasqelluni, calilaasqelluci-llu kevgartualuci Pelatekaani ATANREM, yuut-llu kevgiulaasqelluki?

¹⁰Mat'umek elpeci, allat-llu Levite-at takarnarqelriamek pillrukiici, tau͡gken cali waniwa elpeci agayulirtem caliara tegungnaqluku!

¹¹Qanemyuugarluci inglulitellerpecen̄i Aaron-aaq pinritarci ATANEQ tau͡gaam.”

¹²Tua-i-llu Moses-aam kelegcetak Dathan-aankuk Abiram-aaq-llu, tau͡gaam qanertuk, “Taingaitukuk.

¹³Carrartun-qaa elpeni pitauq ayaucillren wangkutnek naungignarqelriamek enuqitnailngurmek-llu nuniinek Egypt-aam tuqutnaluta maani yuilqumi? Cali-llu-qaa atanrussaakatartuten wangkutnun?

¹⁴Cali-llu elpet tekiuteksaunata nunamun naungignarqelriamun enuqitnailngurmun-llu, cikiqsaunata-llu nunautekamten̄ek naucetaarvigkamten̄ek-llu wine-arkanek, tua-i-llu cali wani-wa iqluurluta ukvercetengnaqerpekut. Ullagngaitamteggen!”

¹⁵Moses-aam qenngami qanrutaa ATANEQ, “Ciuniuryaqunaki ukut angutet elliitait; wiinga qaillun piksailamki nurautiitnek-llu atauciungraan teguteksaunii.”

¹⁶Moses-aam qanrutaa Korah, “Unuaqu ilaten-llu tamarpeci taikici Pelatekamun, Aaron-aaq-llu tuanciiquq.

¹⁷Tamarpeci kenercissuutelgirluci piniartuci kumalrianek kangiplugnek imirluki aruviarkamek-llu qaingat ellivikluki taitniaci ekuavigmun.”

¹⁸Tua-i tamarmeng kenercissuuteteng piluki, kumalrianek kangiplugnek imirluki aruviarkamek-llu ellivikraarluki ag'ut Pelatekamun nangerrluteng-llu Pelatekam amiiganun Moses-aankuk Aaron-aaq-llu ilaklukek.

¹⁹Korah-m-llu quyurrluki ilani nangertut caulukek Moses-aankuk Aaron-aaq-llu Pelatekam amiigani. ATANREM-llu ucurnarqucia tanqiuluni qitngirnaqluni alairtuq yugnun tamalkuitnun.

²⁰ATANEQ-llu qanertuq Moses-aankugnun Aaron-aaq-llu,

²¹“Unitkanirteki ukut yuut, piunrirnaunka egmianun.”

²²Tau͡gaam Moses-aankuk Aaron-aaq-llu ciklutek nunamun qanertuk, “Agayun, unguvam tamarmi ayagneqaaten. Yuum-qaa ataucim assiilngillra pitekluku qenrutqataraten yuut tamalkuita?”

²³ATANREM qanrutaa Moses-aaq,

²⁴“Qanruski yuut unitesqelluki pelatekait Korah-m, Dathan-aam, Abiram-aam-llu.”

²⁵Moses-aaq-llu Israel-aam yuin ciuliqagtainek maligluni ullagak Dathan-aankuk Abiram-aaq-llu.

²⁶Yuut-llu qanrutai, “Qanrutamci, uniciki ukut yuut assiitellriit pelatekait, akluit-llu agturyaqunaciki. Assiilngillerteng pitekluku piunriumakuneng tapqucuaraiceci.”

²⁷Tua-i yuut unitait pelatekait Korah-m, Dathan-aam Abiram-aam-llu. Dathan-aankuk-llu Abiram-aaq-llu anlutek nuliatek irniatek-llu ilakluki nangertut pelatekameng amiigitni.

²⁸Moses-aaq-llu qanertuq, “Maaggun nallunrirciqerci ATANERMUN ayagcetellruciqa elliin-llu pisqutii aturluku wangnek pivkenii makunek pilauciqa.

²⁹Ukut yuut tuqukata tekiskan tuqullerkarteng anucimirqecetaarutiikun Agayutem tuquvkenateng, nallunailkutauciquq ATANERMUN ayagcetellrunriluciqa.

³⁰Tau͡gken ATANEQ ciungani pimaksailngurmek pikan, nuna ikirtelluku igevkaqaki ukut yuut aklutuumaita, unguvaluki ayagtelluki tuqumalriit nuniitnun, nallunriciiqerci ukunun yugnun cakaallrucia ATANEQ.”

³¹Qanellra iqukliyuciatun nuna aciagni Dathan-aankuk Abiram-aaq-llu quligtuq aitarrluni,

³²igluki-llu taukut ilakellriit, ilakluki Korah-m maligtestai akluit-llu tamalkuita.

³³Taukut ayagtut tuqumalriit nuniitnun aklutuumarmeng. Kingunrat-llu nuna quuluni tangrruunrirtelluki.

³⁴Israel-aam-llu yui tuantellret qimagluteng taukut yuut erinait niilluki. Qimagtut qayagpagaluteng, “Qimagci wangkuta-llu nunam igyuaraakut.”

³⁵ATANREM-llu keneq tuc'etaa taukunun yuinaat qula malruk qulnek cipluku (250) yugnun aruviarmek taitellernun tamalkuita tuqulluki.

³⁶ATANEQ-llu qanertuq Moses-aamun,

³⁷“Qanrusgu Eleazar-aaq Aaron-aam agayulirtem qetunraa au͡gaasqelluki punerneret kenercissuutet taukunek kenrem tuqutellrinek, imait-llu kangipluut allamun kuvuuresqelluki, tamakut kenercissuutet qigcignarqelriaruata.

³⁸Qigcignarillruut ekuavigmun iluvaucimallermeggni. Taumek tamakut kenercissuutet avurluki tuqucimallernek assiilngillerteng pitekluku mulut'uugluki mamkilnguaraurrluki ekuavigmun patukiuqiciki. Aarcirtuutngularniartut Israel-aam yuinun.”

³⁹Tua-i Eleazar-aam agayulirtem kenercissuutet teguamiki mulut'uugcetai mamkilnguaraurrluki ekuavigmun patukiurluki.

⁴⁰Taukut-llu aarcirtuutngurrluteng kina imna Aaron-aam kinguveqenrilkii iluvautesqevkenaku ekuaginaluku aruviarmek ATANERMUN. Tuqucimanayukluku Korah-tun tuqucimallertun ilatuuman. Makut tamalkuita piurallruit ATANREM alerquutii aturluku Eleazar-aamun Moses-aakun.

⁴¹Tau͡gaam taum unuaquani Israel-aam yui tamarmeng qanemyuugartut Moses-aankugnun Aaron-aaq-llu qanrullukek-llu, “ATANREM yuinek tuquciutek.”

⁴²Quyurcimariameng inglulirnalukek Moses-aankuk Aaron-aaq-llu Pelatekaq caugaat tangerrluku-llu amirlum caqullinikii ATANREM-llu qitngirnarqelria ucurnarqucia alairluni.

⁴³Moses-aankuk-llu Aaron-aaq-llu Pelatekamun aglutek nangertuk ciuqerranun,

⁴⁴ATANREM-llu qanrutaa Moses-aaq,

⁴⁵“Uniteki ukut yuut, watua egmianun piunrirnaunka!” Elkek-llu tamarmek ciktuk nunamun,

⁴⁶Moses-aam-llu Aaron-aaq qanrutaa, “Kenercissuuten piluku imirru kumalrianek kangiplugnek ekuaviim qainganek aruviarkamek-llu qaingatnun elliiluten. Cukangnaqluten yuut ullagluki menuircariyaraq ellaitnun piniaran, ATANREM eq'uqertii ak'a tuc'an cangerlauluni-llu ak'a ellaitni ayagnirluni.”

⁴⁷Aaron-aaq niilluni kenercissuutni teguluku aqvaqurluni yuut akunliitnun piami tangrraa ak'a cangerlak ayagnillinilria. Aruviarkaq kangipluut qaingatnun ellirraarluku menuircariyaraq aturaa taukunun yugnun.

⁴⁸Tua-i cangerlak arulairtuq Aaron-aaq-llu nangengqaqerluni tuqumalriit unguvalriit-llu akunliitni.

⁴⁹Cangerlagkun-llu tuqullret amllertaluteng akimiarunritaraat tiissitsaat, tiissitsaam avga yuinaat-wa qulen (14,700), ilakevkenaki Korah-m inglulitellermini ilani-llu tuqullret.

⁵⁰Cangerlak arulairan Aaron-aaq utertuq Moses-aaq ullagluku Pelatekam iteryaraani.