Read Yupik Numbers 19 Bible Online

Numbers 19 - Yupik bible

Numbers 19

¹ATANREM alerqurak Moses-aankuk Aaron-aaq-llu,

²“Israel-aam yui cikiisqelluki makunek picirkiutnek. Tailluci Moses-aamun Aaron-aamun-llu kavirlimek arnacalumek kuluvagmek natlugnerilngurmek calissuutekumaksailngurmek-llu.

³Tuneniarci Eleazar-aamun agayulirtem̄un. Anulluku uitavigpeci elatiinun tuqucimaniartuq Eleazar-aam takuani.

⁴Nutaan-llu Eleazar-aaq augan iliinek teguqaarluni unatmikun ceqvallertaulluku malrunlerqunek Pelatekam tungiinun.

⁵Tauna-llu arnacaluq kuluvak ekuagarkauluku amirtuumaan, kemga, auga, qilui-llu agayulirtem takuani.

⁶Teguqaarluni-llu muragmek cedar-aamek, culugtarmek hyssop-aamek, kavirlimek-llu pelacinagmek egciiqai tuavet ekualriamun.

⁷Tuaten-llu pirraarluni aturani ervigluki ervuqerluni-llu, nutaan tuaten pirraarluni itrarkauluni uitavimeggnun; agayulirta-llu menuugarkauluni atakurnatkaanun.

⁸Cali-llu ekuagilleq taumek arnacalumek kuluvagmek, ervigluki aturani ervuqerluni-llu, menuugarkauluni-llu atakurnatkaanun.

⁹Menuurteksailnguum-llu angutem taum arnacalum kuluviim arai avurluki elliciqai menuilngurmun uitaviata elatiini, qelkumaarkauluteng Israel-aam yuinun atuusqelluki mermek menuircautekameggnek pikiuqata. Una atularaat assiilngurmun au͡gautekluku.

¹⁰Angutem-llu taukut arat avurtellrata aturani ervigciqai, tau͡gaam ellii menuugarkauluni atakullranun. Man'a-llu picirkiutnguarkauluni akwarpak Israel-aam yuinun allanernun-llu nuniitni uitalrianun.

¹¹“Kia imum tuqumalriim temii agtuquniu menuulriaruciquq malrunlegni ernerni.

¹²Merkun menuircautekun menuircararkauguq erenret pingayuatni cali-llu erenret malrunelgatni, tuaten pikuni menuirutarkauluni. Tau͡gken menuircanrilkuni erenret pingayuatni malrunelgatni-llu menuirusngaituq.

¹³Tuqumalriim temiinun yuk agtuuqaarluni menuircanrilkuni menuugurciquq, mermek menuircautmek ciqrumanrilami. Menuurcilriaruciqngami ATANREM Pelatekaanek ATANREM-llu yuinun ilaungairuciiquq.

¹⁴“Una pisqutnguuq yugmek tuqulriartangqerqan pelatekam iluani. Yuk tamaani uitalria wall'u tuavet pelatekamun itellria menuugarkauguq ernerni malrunlegni.

¹⁵Tamarmeng-llu assigtat patuilnguut pelatekam iluanelnguut menuugarkauluteng.

¹⁶Cali-llu kia imum tuqucimalleq wall'u tuqulleq ellami wall'u agtuquniu yuum enra qungua-llu menuulriaruciquq ernerni malrunlegni.

¹⁷“Menuulriit menuircautekaatnek piliciqut tegulluteng imum kavirlim kuluviim ekuamallrem arainek assigtamun ekluki mirluki-llu mertanrrarmek mermek.

¹⁸Nutaan-llu menuilnguum yuum culugtarmek hyssop-aamek piluni tuavet mermun akurqaarluki ciqertarciqai pelatekaq, aklui-llu, yuut-llu tamaanelnguut, yuk-llu agtuutelleq yuum enranun wall'u tuqumalriamun wall'u tuqucimallermun wall'u qungumun.

¹⁹Ciqertariarkauluni menuulriamek erenret pingayuatni erenret-llu cali malrunelgatni; tua-i erenret taukut malrunelgatni menuircararkauluku tauna-llu aturaminek ervigiarkauluni ervuqerluni-llu, tuani-llu atakumi menuirulluni.

²⁰“Kina tau͡gaam menuurqaarluni menuircanrilkuni menuugurciquq menuircautmek mermek ciqrumanrilami. Menuurcecamiu-llu ATANREM Pelatekaa Agayutem yuinun ilaungairuciiquq.

²¹Picirkiun man'a atularciqerci akwarpak. Yuk ciqertarilleq menuircautmek mermek aturani erurciqai; kia-llu imum agtuquniu tauna meq menuugarkauluni atakullranun.

²²Ca tamarmi menuulriim agtullra menuurciiquq, allam-llu cali agtuquniu menuugarkauluni atakullranun.”