Read Yupik Numbers 20 Bible Online

Numbers 20 - Yupik bible

Numbers 20

¹Iralut ciuqliatni tamarmeng Israel-aam yui tekitut Zin-am yuilqurtaanun arulairluteng-llu Kadesh-aamun. Tuani Miriam-aaq tuquuq tungmagcimaluni-llu.

²Mertaitellruuq tauna arulairvikellrat, taumek yuut quyurrvikagket Moses-aankuk Aaron-aaq-llu

³qanemyuugaullukek-llu qanerluteng, “Assinruyallruuq wangkuta-llu tuqullrukumta Israel-aarullgutput ilalirluki Pelatekam ciuqerrani.

⁴Ciin ayautellrusikut maavet yuilqumun? Tuqusqelluta-qaa ungungssirtuumamta maani yuilqumi?

⁵Ciin ayautellrusikut Egypt-aamek maavet assiitellriamun nunamun camek naugisciigalngurmun? Mukaarkartaunani, atsartaunani, wine-arkartaunani mer'unani tuaten!”

⁶Moses-aankuk Aaron-aaq-llu yuut unilluki ag'uk Pelatekam amiiganun. Tuani ciktuk nunamun, ATANREM-llu qitngirnarqelriakun ucurnarqucimikun alairvikak.

⁷ATANREM-llu qanrutaa Moses-aaq,

⁸“Ayaruq Akqutem Yaassiigan ciuqerrani uitalria teguluku quyurceqaarluki yuut tangvagtellutek ingna teggalquq qanrutniartek mermek maqesqelluku, qanruskuvtegni meq tuaken maq'erciiquq. Tua-i teggalquq mermek maqevkarciqertek yuut ungungssiit-llu merkaatnek.”

⁹Moses-aam-llu ATANREM alerquani ayaruq nuniinek tegua.

¹⁰Moses-aankuk-llu Aaron-aaq-llu yuut quyurcetakek teggalqum canianun qanrulluki-llu, “Niicugnici ukuut inglulicugpakalriani! Mermek-qaa pisquci uumek teggalqumek?”

¹¹Moses-aam-llu ayaruminek teggalquq kaugturaa malrurqugnek; mermek-llu maqngan yuut kuluviit-llu merluteng.

¹²Tau͡gaam ATANREM Moses-aankuk Aaron-aaq-llu nunurlukek qanrutak, “Nalirrukngavtegu nasvallerkaa qigcignaqlua pinilriaruciqa Israel-aam yuinun, itrusngairutatek ukut yuut nunamun akqutkellemnun ellaitnun.”

¹³Waten pillruut Meribah-mi,[4] tuani yuut qanemyuugallratni ATANERMUN tuani-llu elliin tanqilriarucini manillrani.

¹⁴Moses-aaq ayagceciuq qanrucarturtekainek Kadesh-aamek Edom-aam angayuqranun. Taukut qanertut, “Man'a qanerkarput kingunengqertuq tungayagpecen̄ek Israel-aam yuinek. Nallunritaci nangtequateput tamalkuita,

¹⁵ciuliamta ayallrat Egypt-aamun, tuani-llu ak'anun uitaluteng. Egypt-aarmiut-llu nanglluta ciuliaput-llu,

¹⁶wangkuta-llu qayagaurluku ATANEQ ikayuusqelluta. Elliin-llu niilluta an'gilamun ullagcetaakut, elliin-llu anulluta Egypt-aamek. Watua Kadesh-aami nunautvet engeliini uitaukut.

¹⁷Kaigavikamteggen kiturceskut nunautevgun. Ungungssirtuumamta tumyaraq uniteksaunaku ayagciqukut, naucetaarvici-llu tumekluki pingaunata, elakarpecen̄ek-llu meqsaunata. Tumyarapiakun uniurteksaunaku ayagciqukut nunauten pellugnatkamten̄un.”

¹⁸Tau͡gaam Edom-aarmiut kiugut, “Nunautemteggun kituusqumanritamceci! Pitassiaquvci anguyagyarturciqamceci.”

¹⁹Israel-aam yui qanertut, “Tumyarapiaq uniteksaunaku ayagciqukut, ilavut-llu wall'u ungungssiput elakarpecen̄ek meq'an akilirciqerput; nunautevgun kituqainaryugtukut.”

²⁰Edom-aarmiut kiunqigtait, “Nunautemteggun kiturngaituci!” Edom-aarmiut-llu anguyagterugaita anvikait Israel-aam yui.

²¹Edom-aarmiut nunautmegteggun pivkarngaitelliniiceteng Israel-aam yui allakun ayagtut.

²²Israel-aam yui tamarmeng Kadesh-aamek ayiimeng tekitut Ingrimun Hor-amun,

²³Edom-aam nuniin engeliinun. Tuani ATANREM qanrutak Moses-aankuk Aaron-aaq-llu,

²⁴“Aaron-aam iterngaitaa nuna Israel-aam yuinun akqutkelqa cikiutekciqniluku; Aaron-aaq tuquarkaurtuq, tua-i-wa tamarpetek inglulillruavtegu alerquuteka Meribah-mi.

²⁵Aaron-aaq qetunraa-llu Eleazar-aaq mayuuskek Ingrimun Hor-amun,

²⁶tuani-llu Aaron-aam aturai agayulirtellaat at'elluki Eleazar-aamun. Tuani Aaron-aaq tuquciquq.”

²⁷Moses-aaq ATANERMEK alerquumacimitun piuq. Mayuraat Ingriq Hor-aq takuatni Israel-aam yuin,

²⁸Moses-aam-llu Aaron-aam agayulirtellaat aturai yuuluki Eleazar-aamun at'elluki. Tuani ingrim qaingani Aaron-aaq tuquuq, Moses-aankuk-llu Eleazar-aaq-llu atrarlutek.

²⁹Tamarmeng Israel-aam yuin niicamegteggu Aaron-aam tuqullra qiatekaat ernerni yuinaq qulnek cipluku (30).