Read Yupik Numbers 21 Bible Online

Numbers 21 - Yupik bible

Numbers 21

¹Canaan-aam ungalalirnerani angayuqam Arad-am Canaanite-am niicamiki Israel-aam yui agiirrniluki tumekluku Atharim-aaq curugluki anguyagait ilait-llu teguaqsagulluki.

²Israel-aam-llu yuin waten akqaat ATANEQ, “Cirlakevkaquvki wangkutnun ukut yuut, wangkuta qaillukuarciigalngurkun allakarciqaput[5] elpenun yuut nunarpiit-llu, tamalkuita piunrirluki.”

³ATANREM-llu Israel-aam yui niilluki cirlakevkarai Canaan-aarmiut; ellaita-llu piunrirluki nunarpait yugtuumaita. Taumek taum nunii Hormah-mek acillrukiit.

⁴Ingrimek Hor-amek ayagtut tumyarakun ayalriamun Red Sea-mun tamana Edom-aam nunii avatairluku pinaluteng. Tamaani tumemeggni yuut nerinisngialliq'ngut,

⁵qanemyuugautenglukek-llu Agayun Moses-aaq-llu, “Ciin ayautellrusikut Egypt-aamek tuqusqelluta maani yuilqumi neqkartailngurmi mertaunani-llu? Neqput-llu makut pilnguyagutaput!”

⁶ATANREM-llu ciissirpiit tuqunarqellrialget pivkarai yuut akulaitni tamakut-llu yuut keggmarluki amlleret tuquvkarait.

⁷Yuut-llu Moses-aaq ullagluku qanrutaat, “Wangkuta qanllemteggun assiilngirtukut ATANERMUN elpenun-llu; piicagvikiu ATANEQ ciissirpiit makut wangkutnek ayagcetniarai.” Moses-aam tua-i piicautai yuut.

⁸ATANREM-llu qanrutaa Moses-aaq, “Ciissirpaguamek tegglimek pilirraarluten naparyam kangranun elliu; yuut ciissirpiit kegg'aqaceteng tauna tangrraqamegteggu unguvalarciqut.”

⁹Moses-aaq-llu punernermek ciissirpagualiuq naparyam-llu kangranun elliluku; yuut-llu ciissirpiit kegg'aqaceteng tauna ciissirpaguaq tangrraqamegteggu caksaitelartut.

¹⁰Israel-aam yui upiimeng arulairtut Oboth-aamun.

¹¹Tuaken-llu ayiimeng arulairluteng nunallernun Abarim-aamun yuilqumun Moab-armiut nuniita calaralirneranun.

¹²Tuaken-llu ayiimeng arulairluteng kuignayugmun Zered-aamun.

¹³Tuaken cali ayiimeng arulaillruut neglirneranun Kuigem Arnon-aam, yuilqumun tekisngalriamun Amorite-at nuniitnun. (Arnon-aaq engelkaak nunautaita Moabite-at Amorite-at-llu.)

¹⁴Taumek kalikaini ATANREM Anguyalallrini qanrumauq, “nunarrarnek Waheb-aamek aterluteng Suphah-m nuniini, kuignayugnek, kuigmek-llu Arnon-aamek,

¹⁵uverneritnek-llu kuignayuut nunarraq Ar-aq tekilluku Moab-am nuniin engeliini.”

¹⁶Tuaken ayiimeng ayagtut nuna tekilluku Wells-aamek aterpagcimalria. Tuani ATANREM Moses-aaq qanrutellruluku, “Yuut quyurceski mermek cikirnianka.”

¹⁷Taum nalliini Israel-aam yui mat'umek yuarutmek aturtut: “Elakani meng'ici; ciuniurniarput atuulluku—

¹⁸Elakaq angayuqat kinguvertaita elallrit, Yuut-llu ciuliqagtaita, Elagcuucirluteng tegumianek scepter-aamek ayarumeggnek-llu.” Yuilqumek-llu upagtut Mattanah-mun,

¹⁹Tuaken-llu ayagluteng Nahaliel-aamun, Nahaliel-aamek-llu Bamoth-amun,

²⁰Bamoth-amek-llu kuignayugmun Moabite-at nuniitni, Ingrim Pisgah-m kangran acianun, tangvagluku yuilquq.

²¹Israel-aam-llu yuin qanrucarturcetaat Sihon-aq angayuqrat Amorite-at waten,

²²“Kiturceskut nunautevgun. Ayagciqukut tumyaraq uniteksaunaku tumekngaunaki-llu naucetaarvici, merngaunata-llu elakarpecen̄ek; tumyarapiaq aturluku ayagciqukut nunauten pellugnatkamten̄un.”

²³Tau͡gaam Sihon-aam Israel-aam yui kiturcecuumiitai nunautmikun. Anguyagten̄i quyurqaarluki ayagtuq Jahaz-aamun yuilqumi anguyagluki-llu Israel-aam yui.

²⁴Tau͡gaam Israel-aam yuin tuqurqait nuniit-llu yirluku kuigmek Arnon-aamek ayagluku negetmun Jabbok-aaq tekilluku, tamana Amorite-at nunautiita engelekluku, anguyagterugaitnek murilkesterluni.

²⁵Israel-aam yuin teguit Amorite-at nunarpautait Heshbon-aaq-llu, avatiinelnguut-llu nunarraat uitaviksagulluki.

²⁶Heshbon-aaq nunarpak uitavikellrua Sihon-aam Amorite-at angayuqrata. Uum anguyallrua ciuqliq angayuqaqellra Moab-am nunautii-llu piksagulluku Kuik Arnon-aaq tekilluku.

²⁷Taumek yuarucitulit waten atutulriit, “Taici Heshbon-aamun, nunarpiinun angayuqam Sihon-aam! Ataam tumarrluku nautesqerput.

²⁸Cat iliitni waken nunarpagmek Heshbon-aamek Sihon-aam anguyagtai kenertun ayallruut; Piunrillruat Ar-aq nunarpak Moab-ami Caunrirluki-llu qemii quliini Arnon-aam.

²⁹Nakleng, elpeci Moab-am yuini! Elpeci agayulalriani Chemosh-aamun caunrirtuci! Agayutevci angutet qimagaurcetai, Arnat-llu teguaqsagutelluki Amorite-at angayuqratnun.

³⁰Tau͡gaam maa-i kinguvrit piunrirtut, Heshbon-aamek ayagluteng Dibon-aamun, Nashim-amek-llu Nophah-mun, Medeba-m yaaqsinrilkiini.”

³¹Tua-i Israel-aam yui nunalgartut Amorite-at nuniitnun,

³²Moses-aam-llu Jazer-aaq nunarpak paqcetaa nallunriryugluku qaillun elluarrluku anguyallerkaanek. Israel-aam-llu yuin teguluku avatiinelnguut-llu nunarraat ayagtelluki Amorite-at uitalriit tamaani.

³³Tua-llu Israel-aam yui caqirrluteng ayagtut tumyaraikun Bashan-aam. Og-am-llu Bashan-aam angayuqran ullagai anguyagten̄i malikluki anguyagnaluki Edrei-ami.

³⁴ATANREM qanrutaa Moses-aaq, “Aliksaqunaku. Cirlakevkarciqaqa yugtuumaan nunatuumaan-llu. Sihon-aaq Amorite-at angayuqrat atanirturilleq Heshbon-aami pillrucirpetun tuaten piniaran.”

³⁵Israel-aam-llu yuin tuqurqait Og-aq, qetunrai, yui-llu tamalkuita ilakuivkenaki, nuna-llu tamana yirluku.