Read Yupik Numbers 22 Bible Online

Numbers 22 - Yupik bible

Numbers 22

¹Israel-aam yui ayiimeng arulairtut carr'ilqainun Moab-am calaralirneranun Jordan-aam Jericho-m akianun.

²Balak-aam-llu Zippor-am qetunraan tangrrai Israel-aam yuin pillrit Amorite-anun.

³Moab-armiut-llu alingem tutai, alingluteng taukunek yugnek amllerata.

⁴Moab-armiut-llu qanrutait Midian-aarmiut ciuliqagtait, “Ukut yugugaat cairutarkaugaat avatvut tamalkuan, kuluvagtun canegnek nerelriatun carr'ilqam can'gi nangluki.” Tua-i Balak-aaq

⁵ayagceciuq qanrucarturtelluku Balaam-aaq Beor-am qetunraa Pethor-ami Kuigem Euphrates-aam caniani Amaw-am nuniini waten, “Nallunritesqamken yugugarnek tailrianek Egypt-aamek; yuit-llu cekavvngiinarluteng aarnaqluni nunavut piksagutnayukluku.

⁶Tailuten watua aniqlaacicarturnga ukunek yugnek, amllenrussiyaagtut wangkutni; pitsaqevkenata cirlaksugngariyuaput ayagtelluki-llu maaken nunamek; nallunrilamku atawaqercetellren atawaqercecimalaucianek aniqlaagaqavni-llu yuk aniqlaamaaqluni.”

⁷Tua-i Moab-armiut Midian-aarmiut-llu ciuliqagtait ayagtut akikalgirluku aniqlaagiarkaq; Balaam-aaq-llu qanrulluku-llu Balak-aam qanrutesqellranek.

⁸Balaam-aam qanrutai, “Qavartarci maavet, unuaqu qanrutniamci qaillun ATANREM qanruskanga.” Tua-i Moab-armiut ciuliqagtait Balaam-aami uitaut.

⁹Agayutem-llu Balaam-aaq ullagluku qanrutaa, “Kinkuugat ukut angutet ilaten?”

¹⁰Balaam-aam-llu qanrutaa Agayun, “Balak-aam Moab-am angayuqran taivkallrui wangnun qanrucartuusqellua,

¹¹yuut taillret Egypt-aamek cekavvniluki nunami tamalkuan. Aniqlaacicesquq wangnun callugluki ayagcetnaluki.”

¹²Agayutem Balaam-aaq qanrutaa, “Angutet ukut maligcaqunaki, aniqlaayaqunaki-llu Israel-aam yui, wiinga atawaqercecimiimki.”

¹³Unuaquan Balaam-aam imkut Balak-aam qaneryarturcetellri ullagluki qanrutai, “Uterci tua-i kingunerpecen̄un, ATANREM wangnun maligtesqenritaaci.”

¹⁴Tua-i uterrluteng Balak-aaq qanrutaat Balaam-aamun maligcuumiitniluteng.

¹⁵Balak-aaq cali ayagceciuq ciuliqagten̄ek ciuqliitni amllenrulrianek takarnarqenrulrianek-llu.

¹⁶Taukut-llu Balaam-aamun tekicameng qanrutaat, “Waten qanertuq Balak-aaq, ‘Camek nagucirluten taisciigacaqunak!

¹⁷Nunulirciqamken elaranailngurmek, camek-llu qanruskuvnga pisqellua tuaten piciqua. Tailuten aniqlaacicarturnga ukunek yugnek.’”

¹⁸Balaam-aam tau͡gaam kiugai Balak-aam kevgai, “Balak-aam cikiryaaqsaraanga enemi iluanelngurnek tamalkuita qerrirlinek akinek suulutaanek-llu, tau͡gaam wiinga narurcanritaqa ATANREM alerquutii carraungraan.

¹⁹Kitaki tau͡gaam elpeci-llu maani qavartarci nallunrirnatkamnun ATANEQ cali qanerkangqerrsuartuq wangnun.”

²⁰Tuani unugmi ATANREM Balaam-aaq ullagluku qanrutaa, “Ukut angutet ullallrukatgen maligtesqelluteng upluten maligeski. Alerquuteka tau͡gaam maligqurluku piurniartuten.”

²¹Balaam-aaq tua-i unuaquan makcami ungungssini uptaa ugingassuucirluku, maliggluki-llu Moab-armiut ciuliqagtait.

²²Tau͡gaam Agayutem qenrutaa Balaam-aaq ayakataan, ayainanrani-llu ungungssimini ekumaluni pistegminek maligluni, ATANREM an'gilaa nangertuq tumkaanun tumairluku.

²³Ungungssim-llu ekumavian ATANREM an'gilaa tangrramiu nangerngalria tumyarani nuussirpagmek tegumiarluni caqirtuq tumyaraq unilluku carr'ilqanun. Balaam-aam-llu kaugturluku utertelluku tumyaramun.

²⁴Tuamta-llu an'gilaq nangertuq tumyaram iqkelli'irtellranun wine-arkanek naucetaarviik akunliigni, atunem avatek qacarnertarlutek.

²⁵Ungungssim-llu ugingavian ATANREM an'gilaa tangrramiu avitellermini piqrutuq qacarnermun, Balaam-aam it'gaa passilluku. Ataam-llu Balaam-aam kaugtuarluku.

²⁶Ataam cali an'gilaq ayakanirluni nangertuq nequkilngurmun avatek kiturviinatek.

²⁷Ungungssim tuani tangrramiu elavuq; Balaam-aam-llu qenqerrulluku ayaruminek kaugtuarluku.

²⁸ATANREM-llu ungungssiq qaneryugngarivkaani Balaam-aaq qanrutaa, “Qaillun pillrukemken ciin kaugtuarcia pingayurqunek?”

²⁹Balaam-aam kiugaa, “Usviilqiavnga, nuussirpagmek tegumiangqerquma tuqucaramken.”

³⁰Ungungssim kiugaa, “Wiinga-wa ekumavikuratukevnga yuurqaanerpenek ayagluten una engelkarrluku. Tua-llu-qaa uum ciungani waten pillruamken?” Kiugaa, “Qang'a.”

³¹ATANREM nutaan Balaam-aamun tangercetaa an'gilaq nuussirpagmek tegumiarluni, ellii-llu cikluni nunamun.

³²ATANREM an'gilaan qanrutaa, “Ca pitekluku ungungssiuten kaugtuarciu pingayurqunek? Taillruunga tumairyarturluten ayagarkaunricaaqngavet.

³³Tau͡gaam ungungssim tangerrlua caqirtelartuq pingayurqunek. Tuaten pillrunrilkan tuqutellruyaramken ungungssiq pivkenaku.”

³⁴Balaam-aaq kiuguq, “Wiinga assiilngirtua. Nallullruaqa nangengqallren tumairlua; waniwa-llu ayaasqumanrilkuvnga ayagpek'nii uterciiqua.”

³⁵Tau͡gaam an'gilam qanrutaa, “Maliggluki tua-i ayii, qanresqellemnek tau͡gaam qanlarniartuten.” Tua-i Balaam-aaq maliggluki ayagtuq.

³⁶Balak-aam niicamiu Balaam-aaq agiirrniluku pairrsaagluku ayagtuq Ar-amun, nunarpagmun Kuigem Arnon-aam cen̄iinelngurmun Moab-am nuniin engeliinelngurmun.

³⁷Balak-aam qanrutaa, “Ciin ciuqlirmi taisqellemni taillrunricit? Nunulimyaagnayukluten-qaa umyuarteqngavet pillruuten?”

³⁸Balaam-aam kiugaa, “Canrilnguq-wa tua-i taingama! Wangnek-qaa tua-llu piningqerrlua qaneryugngaunga? ATANREM tau͡gaam tuaten qanresqekanga tuaten qanerciqua.”

³⁹Balaam-aam-llu Balak-aaq maliggluku nunarrarnun Huzoth-amun ayagtut,

⁴⁰tuani-llu Balak-aaq tuqurqiluni kuluvagnek qusnginek-llu Balaam-aaq malii-llu ciuliqagtet cikirai kemgita ilaitnek.

⁴¹Unuaquani Balak-aam Balaam-aaq mayuutaa Bamoth Baal-amun, tuaken-llu Balaam-aam tangrrai Israel-aam yuin ilait.