Read Yupik Numbers 23 Bible Online

Numbers 23 - Yupik bible

Numbers 23

¹Balak-aaq qanrutaa, “Pilicia wani malrunlegnek ekuavignek, tailluci-llu malrunlegtaarluki nulirten̄ek kuluvagnek angucalunek-llu qusnginek.”

²Balak-aaq qanrucimacirmitun piuq, elkek-llu Balaam-aaq-llu ekuagilutek nulirtem̄ek, qusngimek-llu taukuni ekuavigni.

³Tua-llu Balaam-aam Balak-aaq qanrutaa, “Nangerrluten ekuakengarpet canianun utaqanga paqtellemni ATANERMUN ullagnayuklua. Camek nasviskanga qanruciiqamken.” Tua-i mayurtuq kiimi qemim qainganun,

⁴Agayutem-llu tuani ullagaa. Balaam-aam qanrutaa, “Ekuavignek malrunlegnek pilillruunga ekuagilua-llu nulirten̄ek qusnginek-llu tamakut qaingitni.”

⁵ATANREM qanerkiuraa Balaam-aaq, utertelluku-llu qanllerminek qanrutesqelluku Balak-aaq.

⁶Utercami tangrraa Balak-aaq cali nangengqaluni Moab-am ciuliqagtainek ilaluni ekuakengami caniani.

⁷Balaam-aaq qanerkiurumacirmitun qanertuq: “Balak-aam Moab-am angayuqran taitaanga Syria-mek calaralirnerni ingrinek, qanerluni, ‘Qanrucicarturnga aniqlaaluki Israel-aam yui.’

⁸Qaillun wiinga aniqlaagiciqsia ATANREM aniqlaaksailkainek? Wall'u qalarrlua pillugnamek ciunerkamek ATANEQ tuaten piksaitevkarluku?

⁹Tangerrsugngaanka qertulrianek teggalqunek, tangvagyugngaluki-llu qeminek. Allakaumaluteng yuut; nalluvkenaku atawaqercecimanrucirteng allani yugni.

¹⁰Israel-aam yuin kinguvrit urr'artun ayuqut. Amllessiyaagameng naaqumasciigatut. Maani nunami uitalqa iqukliskan Agayutem yuin iliicetun ayuqlua piyugtua. Tuquvkaqia uitanqegcivkarlua ellualriit ilalirluki.”

¹¹Balak-aam tua-i Balaam-aaq qanrutaa, “Ciin waten pisia? Taitellruamken aniqlaasqelluki ukut yuut, tau͡gken elpet atawaqaasqelluki.”

¹²Elliin kiugaa, “Wiinga-wa qanerciqellrianga ATANREM tau͡gaam qanresqellrinek.”

¹³Balak-aam Balaam-aaq qanrutaa, “Tailuten maligesnga allamun, tuaken cali tangerrsugngaciqaten ilait tau͡gaam Israel-aam yui. Aniqlaaniaten tuaken.”

¹⁴Ayautaa-llu carr'ilqaanun Zophim-aam qainganun Ingrim Pisgah-m. Tuani cali ekuaviliuq malrunlegnek ekuagiluni-llu elliitekluki nulirten̄ek qusnginek-llu qaingitni.

¹⁵Balaam-aam Balak-aaq qanrutaa, “Nangerrluten canianun ekuakengarpet utaqanga, yaani qalarucartullemni ATANEQ.”

¹⁶ATANREM ullagaa Balaam-aaq qanerkiurraarluku-llu utertelluku Balak-aaq qanrucarturtelluku.

¹⁷Utercami tangrraa Balak-aaq nangengqaluni ekuakengami caniani Moab-am ciuliqagtainek ilaluni. Balak-aam aptaa ATANEQ camek qanrucianek,

¹⁸Balaam-aaq-llu waten qanerluni: “Tailuten Balak-aaq Zippor-am qetunraani, niicugninga.

¹⁹Agayun yugtun ayuqenrituq, iqluyulriatun; yugtun-llu ayuqenrilami umyuani cimiyuitaa. Qanrraarluni-qaa tuaten piksaitelartuq? Qanellruuq-llu-qaa piciurcetarkaunrilkem̄inek?

²⁰Wiinga alerquumallruunga atawaqercecisqellua, Agayun-llu atawaqercecikan wiinga utercecesciigataqa.

²¹Wiinga-llu Israel-aam yuin ukna tekitarkaat tangrraqa, pillugnarqellriamek wall'u picurlagmek pitaunani. ATANREM Agayutiita nayurai, qanrutkelaraat Ataneqniluku.

²²Agayutem anutellrui Egypt-aamek; Calluucit'larai yuilqurmiutartun kuluvagtun.

²³Angalkumirtaaryarat tuunriyarat-llu atuusciigatut Israel-aam yuinun. Maa-i-llu yuut waten qanrutkelarciqait Israel-aam yui, ‘Tangerciu Agayutem taqellra.’

²⁴Atanruvik Israel-aaq ayuquq yugtutulitun: Arulaiyuituq allguriluni nervailegmi, merpailegmiu-llu tuqutellermi augat.”

²⁵Balak-aam Balaam-aaq qanrutaa, “Aniqlaayuumiilkuvki Israel-aam yui atawaqercetenrilngerpeki piki!”

²⁶Tau͡gaam Balaam-aam Balak-aaq kiugaa, “Qanrutellruamken-ggem tamalkuan ATANREM qanellra wiinga aturarkauniluku.”

²⁷Balak-aam qanrutaa Balaam-aaq, “Tailuten allamun ayautnaamken Agayutem aniqlaagivkaryuaraaten tuaken.”

²⁸Tua-i Balaam-aaq ayautaa Ingrim Peor-am kangranun yuilquq tangerrnaqluni tuaken.

²⁹Balaam-aam qanrutaa, “Ekuavignek malrunlegnek pilinga tailluten-llu malrunlegnek nulirten̄ek malrunlegnek-llu qusnginek.”

³⁰Balak-aaq-llu qanrucimacirmitun piuq, ekuagiluni-llu nulirten̄ek qusnginek-llu tamakuni ekuavigni.