Read Yupik Numbers 24 Bible Online

Numbers 24 - Yupik bible

Numbers 24

¹Waniwa Balaam-aam nallunriamiu ATANREM atawaqercecisqumallra Israel-aam yuinek ciunganitun pilallermitun nallunailkutamek utaqalgirpek'nani caugaa yuilquq.

²Balaam-aam kiarcami tangrrai Israel-aam yui arulairumaluteng avqurluteng naumavillgutmegteggun. Agayutem-llu anerneran tuc'ani

³makunek qanertuq: “Waniwa qanerkaa Balaam-aam Beor-am qetunraan, waniwa qaneryarai angutem tangerrsugngalriim mecikluki.

⁴Niicugngaluku-llu Agayun qanqan. Iigka cikmiqaqsaunakek tangertua nasvicimalua Artuqailngurmek Agayutmek.

⁵Pelatekait Israel-aam yuin tangssunaqluteng,

⁶Nalleqliqu'urluteng napatun palm-atun wall'u naucetaarvigtun kuigem caniani. Naunrartun-llu aloes-aatun ATANREM nauceciillritun wall'u napatun cedar-aatun mer'em caniani.

⁷Ellallugmek enuqisngaitut nauceciiluki-llu naucetaarkateng merqumalrianun naucetaarvignun. Angayuqrat quyinruciquq Agag-ami, atanirturillra-llu sagtarkauluni yaaqvanun.

⁸Agayutem anutellrui Egypt-aamek; calluucit'larai yuilqurmiutartun kuluvagtun. Ingluteng atanruviit nerelriatun piciqait, ciqumlluki enrit ayemqelluki-llu pitegcautait.

⁹Angayuqauvik yugtutulitun ayuquq; qavaqan-llu kia alikevkenaku tuparqeciqau? Atawaqerlit atawaqaasqilriit elpecen̄ek, aniqlaamalit aniqlaasteci.”

¹⁰Balak-aaq qenqerrluni tengluugni qell'ukek Balaam-aaq qanrutaa, “Wiinga taisqellruamken aniqlaasqelluki inglukestenka, tau͡gken elpet atawaqaasqurluki pingayurqunek.

¹¹Watua ut'reskina. Nunulirciqniluten akqellruyaaqamken tau͡gaam ATANREM nunuliutekan pivkanritaa.”

¹²Balaam-aam kiugaa, “Qanrutellruanka taivkalten qanrucarturtellua,

¹³cikiryaaqeng'e'rpenga tamalkuitnek qerrirlinek akinek suulutaanek-llu enevni uitalrianek wiinga narurtesciigatniluku alerquutii ATANREM wangnek camek pilua. Qanerciqua ATANREM tau͡gaam tuaten qanresqekanga.”

¹⁴Balaam-aam qanrutaa Balak-aaq, “Waniwa uterteqatartua ilamnun, tau͡gaam ayagpailegma aarcirturnaamken Israel-aam yuinun qaillun piarkaucirpecen̄ek uum kinguani.”

¹⁵Qanerkiurumacirmitun-llu waten qanertuq: “Waniwa qanerkaa Balaam-aam Beor-am qetunraan, Qaneryarai angutem tangerrsugngalriim mecikluki,

¹⁶Niicugngaluku-llu Agayun qanqan, elisngamek-llu akurturaqluni quyinrulriamek. Cikmiqsaunii tangertua nasvicimalua Artuqailngurmek Agayutmek.

¹⁷Ukna ciunerkaq agiirtellria tangrraqa, tangerrluku-llu atanruvia Israel-aam. Angayuqaq tanqigcetellriatun agyatun nauciquq taukuni. Qilagmi agyatun taiciquq Israel-aanek. Tuqurqeciqai ciuliqagtai Moab-am uyunglluki-llu Seth-am yui.

¹⁸Edom-aami inglukesten̄i cirlakciqai nunautiit-llu elliin piksaguciiqaa Israel-aaq cirlakiurallrani.

¹⁹Israel-aam yuin tutmauciiqait piunrirluki-llu uitaqallret.”

²⁰Nasvicimallermikun-llu tangrrai Balaam-aam Amalekite-at, qanerluni-llu waten: “Amalek-aaq atanruviit pininquqellruat, tau͡gaam iquani piunriumaciquq akwarpak.”

²¹Cali-llu Kenite-at nasvaumaluki tangrramiki waten qanertuq: “Uitavigci pektayiituq, cam pisciiganaku unglutun ekvigmi qulvani uitalriatun.

²²Tau͡gaam elpeci Kenite-aulriani piunriumaciquci Assyria-m teguaqsaguskaci.”

²³Balaam-aaq cali waten qanertuq: “Camiunguat ukut yuut quyurtellriit neglirnermun?

²⁴Anguyagyartulriit Cyprus-aamek tengalrarluteng ayagciqut; cirlakciqagket Assyria Eber-aaq-llu. Tau͡gaam ellait-llu piunrirciqut akwarpak.”

²⁵Nutaan Balaam-aaq upluni utertuq kingunerminun, Balak-aaq-llu cali ayagluni.