Read Yupik Numbers 25 Bible Online

Numbers 25 - Yupik bible

Numbers 25

¹Israel-aam yui arulairumallermeggni Acacia Valley-mi angutait akusrarutekilangellruut Moabite-anek arnanek tamaanelngurnek.

²Tamakut-llu arnat unayaq'larait tuqucimalrianek elliiyarameng nerevkariyaraitni, tuatnaluteng agayuaqameng Moab-am agayutnguaranun. Tamakut-llu Israelite-at nerellguciutaqluteng agayutnguaratnun-llu agayuaqluteng

³Baal Peor-amun. Taumek ATANREM qenruskai,

⁴Moses-aaq-llu qanrulluku, “Israel-aam yuin ciuliqagtait tamalkuita tuquciki alerquuteka aturluku erenrani, qenrutenrirnianka yuut.”

⁵Moses-aam atanerruat qanrutai, “Tamarpeci tuqurqiciki yugpecen̄i agayulangelriit Baal Peor-amun.”

⁶Iliit-llu Israel-aam yuin pelatekaminun itrutuq Midianite-at iliitnek arnamek takuani Moses-aam yuut-llu aluviliulriit Pelatekam Agayuviim amiigani.

⁷Phinehas-aam Eleazar-aam qetunraan, Aaron-aam agayulirtem tutgariin, tangrramikek nangerrluni taukut quyungqalriit unitai. Panamek-llu tegulluni

⁸maligtak taukuk, pelatekam-llu iluqliani Israel-aarmiu angun tauna-llu arnaq tamarkenka temkenkun kaplukek. Tua-i-llu cangerlak piyaaqelleq Israel-aam yuini arulairluni.

⁹Tau͡gaam tuani ak'a tiissitsaat yuinaq cetamanek cipluku (24,000) tuquqalliniluteng.

¹⁰ATANREM-llu Moses-aaq qanrutaa,

¹¹“Phinehas-aam tuaten piami qenrutenrircetai Israel-aam yui. Wangnun tau͡gaam agayuuraasqumaluki piaki allanun pivkenaki wiinga qenerrlua piunrinritanka.

¹²Taumek qanruskiu akqut'lillgutkeciqniluku akwanun piugarkamek.

¹³Ellii kinguvri-llu taqsuunateng agayulirten͞gularciqut ciknakucicanga allanun agayutmun yuut-llu assiilnguirumallerkaatnek taqucan.”

¹⁴Israel-aam yuin iliit tuqucimalleq Midianite-amek arnamek aiparluni atengqertuq Zimri-mek Salu-m qetunraa, ciulirnerat Simeon-aamek nauvilget ilakellriit.

¹⁵Arnaq-llu tauna aterluni Cozbi-mek, Zur-aq atii ciulirneqluku Midian-aarmiut ilakellriit.

¹⁶ATANREM-llu Moses-aaq qanrutaa,

¹⁷“Curugluki anguyagluki piunrirciki Midianite-at,

¹⁸iqluurluci assiilngurmek pillrat elpecen̄un pitekluku Peor-ami. Cali-llu Cozbi pitekluku, tuqucimalleq cangerliim nalliini Peor-ami.”