Read Yupik Numbers 27 Bible Online

Numbers 27 - Yupik bible

Numbers 27

¹Caqerluteng iluvartut Zelophehad-am panii Hepher-aam qetunraan, Gilead-aam qetunraan, Machir-am qetunraan, Manasseh-m qetunraan, Joseph-aam qetunraan. Taukut arnat aterluteng: Mahlah, Noah, Hoglah, Milcah, Tirzah-wa.

²Taukut ullagait Moses-aaq, Aaron-aaq yuut-llu tamalkuita ciulirnertuumaita, nangerrluteng-llu ciuqerratnun Pelatekam Agayuviim amiigan ciuqerrani taukunun qanertut,

³“Wangkuta atavut tuqullruuq yuilqumi angutmek kinguvrunani. Ilagallrunritai Korah-m maligtestai inglulitellratni ATANERMUN, tau͡gaam tuqullruluni elliin assiilngillni pitekluku.

⁴Ciin tua-i atamta atra catairuceteqatarceciu Israel-aam yuinek angutmek qetunrailucia pitekluku? Pikarkamten̄ek cikircikut atamta kinguvrin nuniitni.”

⁵Moses-aam-llu taukut piyullrat ATANERMUN qanrutekngaku,

⁶ATANREM Moses-aaq qanrutaa,

⁷“Zelophehad-am panii elluarrluteng piut; cikirciki pikaitnek atiita tungayain nuniitni. Atiitnek kinguvararkaulleq ellaitnun piksagutelluku.

⁸Qanrutniaten Israel-aam yui angun tuqukan qetunraunani aklui kinguvarcet'laasqelluki panianun.

⁹Paniilkan-llu aklui kinguvarcet'laasqelluki atiin anelgutainun angutnun.

¹⁰Angutnek-llu anelgutailkan aklui kinguvarcet'laasqelluki atiin anelgutainun angutnun.

¹¹Atii-llu anelgutailkan angutnek aklui kinguvarcetniaci canimellratnun tungayain, taum nakmiin piksagutarkauluku. Israel-aam-llu yuinun man'a picirkiutnguarkauluni, ATANREM alerquutekellruciatun Moses-aamun.”

¹²ATANREM qanrutaa Moses-aaq, “Mayurru una ingriq Abarim-aamek at'lek, kangranek tangerrniaran nuna Israel-aam yuinun cikiutekaqa.

¹³Tangrrumarikuvgu tuquciquten Aaron-aatun anelgutevtun,

¹⁴tua-i-wa inglulitellruavet qanllemnun Zin-am yuilqurrani. Israel-aam yuin wangnun qanemyuugallrata nalliini Maribah-mi, qigcignarqellria piniqa nasvagyuumiinaku yugnun.” (Meribah meruuq nunamek ulvelria Kadesh-aami Zin-am yuilqurrani.)

¹⁵Moses-aam ATANEQ qanrutaa,

¹⁶“ATANEQ Agayun, unguvangqellriit tamarmeng ayagnerata, kaigavikamken apertuisqelluten angutmek yugpet ciuliqagtestekaatnek

¹⁷alerquastekaatnek-llu anguyiim nalliini, yut'en ayuqenritnaurtut qusngitun qusngiliurtailngurcetun.”

¹⁸ATANREM qanrutaa Moses-aaq, “Joshua Nun-am qetunraa ullagluku unatevnek qamiqurrakun pategluku

¹⁹nangercessgu Eleazar-aam agayulirtem yuut-llu ciuqerratnun, qanrulluki-llu elpenun enairtekaqniluku.

²⁰Takarnarqutvet iliinek cikirluku Israel-aam yuin niisnganiaraat.

²¹Eleazar-aaq agayulirta tegguteku'urluku piniartuq, elliin nallunriryugngiiku wiinga pisqutka aturluku Urim-aaq Thummim-aaq-llu.[6] Waten piluni Eleazar-aam picirkiurciqaa Joshua Israel-aam-llu yui tamalkuita callratni tamalkuitni.”

²²Moses-aaq-llu tuaten piuq ATANREM alerquuciatun, Joshua nangertelluku Eleazar-aam agayulirtem yuut-llu ciuqerratnun.

²³ATANREM-llu alerquuciatun Moses-aam Joshua qamiqurrakun unatminek pategluku aperturaa elliin cimiqerkauniluku.