Read Yupik Numbers 28 Bible Online

Numbers 28 - Yupik bible

Numbers 28

¹ATANREM qanrutaa Moses-aaq,

²“Alerqurki Israel-aam yui qanrulluki elliilaasqelluki neqkanek ilukegcinarqelrianek Agayutmun piyaraitni.

³“Makunek maa-i neqkanek elliilarciquci ATANERMUN: unuaquaqan elliilarniartuci ekuagiluci malrugnek allrakungelriignek qusngiyagaagnek natlugnerilnguugnek.

⁴Elliitek'larniaci aipaa unuakumi aipaa-llu atakumi,

⁵tapirlukek allakakenka malrugnek usperegnek mukaamek uringalriamek malruk saskak imaagnek assilriamek olive-aat uquatnek.

⁶Una unuaquaqan elliitek'larciqerci Ingrimi Sinai-ami ayagniqaraalleq elliitnguluku ekualuku, tepii narnirqellriaruluni ATANERMUN.

⁷Cali-llu wine-amek elliiniartuci tapeqluku ciuqlirmun qusngiyagarmun, kuv'iluci ekuavigmun malruk saskak imaagnek wine-amek.

⁸Atakuaqan-llu elliitekluku qusngiyagaam aipaa unuakumi pillerci ayuqeliluku taprin-llu ayuqaitnek tapirluku. Ekualuku cali elliitekniarci tepii ilukegcinaqluni ATANERMUN.

⁹“Ernermi Sabbath-aami elliilarniartuci malrugnek ataucimek allrakungelriignek qusngiyagaagnek natlugnerilnguugnek, tapirlukek cetamanek uspernek mukaamek urcimalriamek olive-aat uquatnek, wine-amek-llu cali.

¹⁰Waten ekualuki elliiguralarciquci ernerni Sabbath-aani avatiini unuaquaqan elliitekuralallerpeci wine-amek tapirluku.

¹¹“Ekuagiluci elliilaqici ATANERMUN iralut ayagnillratni: malrugnek ayagyualriignek angucalugnek, ataucimek angucalumek qusngimek, malrunlegnek-llu ataucimek allrakungelrianek angucalunek qusngiyagarnek, tamarmeng natlugnerilngurnek.

¹²Mukaarkamek-llu elliikuvci elliikici mukaamek olive-aat uquatnek urcimalriamek: angucaluq tapirluku arvinlegnek uspernek mukaamek; angucaluq-llu qusngiq tapirluku cetamanek uspernek;

¹³qusngiyagaat-llu allakaitgun malrugnek usperegnek pitaarturluki. Makut neqkauluteng elliitnguut tepiit ilukegcinaqluni ATANERMUN.

¹⁴Wine-at-llu tapqucimaarkat amllertaciqut saskat pingayunelgen ataucimun angucalumun; arvinelgen saskat angucalumun qusngimun; saskat-llu cetaman qusngiyagarmun. Una picirkiutnguciquq ekualuku elliitnun iralum erenrin ciuqliatni atuugarkamun allrakum iluani.

¹⁵Cali-llu unuaquaqan elliitek'lallerpecen̄un ilakluku wine-amek tapirluku, elliilarniartuci ataucimek angucalumek qusngirngalngurmek assiilnguirutekluku.

¹⁶“Akimiarunritariit erenrin ciuqliim iralum ATANREM Kituutekaa.

¹⁷Akimiaratni-llu erenrin taum nerevkariyarauluni, cali-llu quulecirailngurnek kelipanek neryarauluni ernerni malrunlegni.

¹⁸Erenret ciuqliatni caliarkaci peggluki agayuniartuci.

¹⁹Elliiluci ekuagarkamek neqkauluku ATANERMUN: malrugnek angucalugnek ayagyualriignek, ataucimek angucalumek qusngimek, malrunlegnek-llu qusngiyagarnek, tamarmeng natlugnerilngurnek.

²⁰Taperkaitnek-llu cali elliiluci: mukaamek olive-aat uquatnek urrluku, arvinlegnek uspernek angucaluq atauciq tapirluku, cetamanek-llu uspernek angucaluq qusngiq,

²¹malrugnek-llu usperegnek tapirluki qusngiyagaat allakaita.

²²Ataucimek-llu cali angucalumek qusngirngalngurmek elliiluci assiilnguirutkarpecen̄ek.

²³Makut elliitekekiciki cipneruluki unuakumi ekuagiluci elliitek'lallerpecen̄un.

²⁴Tuaten pilaucirpecetun elliilarniartuci neqkauluki unuaquaqan ernerni malrunlegni, elliitnguluni neqkauluni tepii ilukegcinaqluni ATANERMUN. Elliitek'larniarci una cipneruluku unuaquaqan ekualuku elliitek'lallerpecen̄un wine-amek tapirluku.

²⁵Erenret malrunelgatni calivkenaci quyurrluci agayularniartuci.

²⁶“Quyurciyaram erenrin ciuqliatni elliikuvci nutaranek mukaarkanek ATANERMUN, calivkenaci quyurrluci agayukici.

²⁷Elliiniartuci ekuagiluci tepii narnirqellriamek ATANERMUN: malrugnek ayagyuagnek angucalugnek, ataucimek qusngimek, malrunlegnek-llu qusngiyagarnek ataucimek allrakungelrianek, tamarmeng natlugnerunateng.

²⁸Tapirluki mukaarkamek elliitmek. Mukaaq urrluku olive-aat uquatnek, arvinlegnek uspernek angucalut tapirluki, cetamanek-llu uspernek angucaluq qusngiq,

²⁹malrugnek-llu usperegnek qusngiyagaat allakaita tapirluki.

³⁰Angucalumek-llu cali qusngirngalngurmek elliiluci assiilnguirutkarpecen̄ek.

³¹Makut elliitek'larniaci wine-aq-llu cipneruluki unuaquaqan ekualuki cali-llu mukaarkanun elliitevcen̄un.