Read Yupik Numbers 31 Bible Online

Numbers 31 - Yupik bible

Numbers 31

²“Akinauruski Israel-aam yui Midianite-at ellaitnun pillratnek. Tuaten pimarikuvki tuquciquten.”

³Tua-i Moses-aam yuut qanrutai, “Ilaci angutet upciki anguyagniarait Midianite-at akinaurulluku ATANEQ.

⁴Tamalkuitnek yuullgutkelriartainek Israel-aam yuin ayagceciniartuci tiissitsaaruqa'aqluki angutnek anguyagarkanek.”

⁵Tua-i cucuklirtut tiissitsaaruqa'aqluki tamalkuitnek yuullgutkelrianek Israel-aam yuin, quyurrluteng amllertaluteng qula malrugnek cipluku tiissitsaat (12,000) angutet upingaluteng anguyallerkameggnun.

⁶Moses-aam-llu ayagcetai anguyagyarturtelluki Phinehas-aamek Eleazar-aam agayulirtem qetunraanek atanirluki. Tauna-llu ang'aqluni Agayuviim kencignarqellrianek akluinek, cupu'uryaranek-llu elpengcarissuutekanek.

⁷Anguyagluki-llu Midianite-at ATANREM alerquuciatun Moses-aaq, tuqulluki angutet tamalkuita,

⁸tuqutellermegnun-llu tapqulluki ukut Midian-aam atanri talliman tuqutellruit: Evi, Rekem, Zur, Hur, Reba-llu. Cali-llu tuqutellruluku Balaam-aaq Beor-am qetunraa.

⁹Israel-aam-llu yuin teguit Midian-aarmiut arnait mikelnguut-llu, kuluvautait-llu allat-llu cali katngautait, tukuutait-llu tamalkuita,

¹⁰ekualuki-llu nunarpait allat-llu cali uitaviit.

¹¹Tamakut-llu tegulteng tukuutait, tapeqluki yuut ungungssiaraat-llu,

¹²taitait Moses-aamun Eleazar-aamun-llu, Israel-aam-llu yuinun uitallratni Moab-am carr'ilqaini Jordan-aam akiani Jericho-m nalliini.

¹³Moses-aam Eleazar-aam-llu yuut-llu ciulirnerita uitavimeggnek anluteng pairrsaagait anguyagtet.

¹⁴Moses-aam-llu qenrutai anguyagtet atanrit utertellret anguyaggaarluteng.

¹⁵Aptai, “Ciin arnat tamalkuita unguvavkarceciki?

¹⁶Nauwa arnat Balaam-aam ayuqucirtuutii maligtellrukiit, Peor-ami-llu Israel-aam yui picurlagtelluki ATANERMUN. Tamana pitekluku cangerlak tut'ellruuq ATANREM yuinun.

¹⁷Taumek waniwa tuquciki tamalkuita tan'gaurluut mikelnguut, cali-llu tuqulluki tamalkuita arnat anguciullret.

¹⁸Tau͡gaam elpeci pikarkauluki uitatniaci nasaurluut wall'u allat arnat angutem agtuqsailkai.

¹⁹Elpeci-llu tuqucillrulriani yugmek, wall'u agturallrulriani tuqumalriit temaitnek nunat elatiitni uitaniartuci ernerni malrunlegni. Erenret pingayuatni malrunelgatni-llu menuircarniartuci elpecen̄ek arnat-llu cali tegukengalci.

²⁰Menuircarniaci-llu cali aturat tamalkuita, cali-llu menuircarluki tamalkuita piliaqumalriit qecignek, qusngirngalnguut melqurritnek, cali-llu muragnek.”

²¹Eleazar-aam agayulirtem qanrutai angutet utertellret anguyallermeggnek, “Makut maa-i picirkiutet ATANREM cikiutekellri Moses-aamun.

²²Tamarmeng makut ekuayuilkai, suulutaaq, qerrirli, punerneq, cavik, qerriryak, wall'u imarkaq, menuircaumaarkaugut kenerkun. Allat tau͡gken tamarmeng menuircaumaarkauluteng merkun menuircautekun.

²³

²⁴Erenret malrunelgatni ervigniaci aturaci; nutaan elpeci menuirutniartuci nunanun-llu ityunariluci.”

²⁵ATANREM qanrutaa Moses-aaq,

²⁶“Elpetek Eleazar-aaq-llu ilalirlutek allanek yuut ciulirneritnek, naaqiciki tamalkuita anguyallermeggni teguaqellrit, ilakluki yuut teguat ungungssiaraat-llu.

²⁷Avveqniaci malruingurrluki, avvlerpeci aipaingit anguyagten̄un pikarkauvkarluki avgit-llu cali yugnun pikarkauvkarluki.

²⁸Tegutniartuci ATANREM pikainek anguyallernun avvlerpecen̄ek ayuqluki yugnek ungungssiarnek-llu (ciulviit, qusngit, qusngirngalnguut) tiissitsaam avganek (500) ataucimek ilangaruqurluci.

²⁹Tuneniaci Eleazar-aamun agayulirtem̄un elliitekluki ATANERMUN.

³⁰Yugnun-llu pikesqelluki avvlerpecen̄ek tegutniartuci ayuqluki yugnek ungungssiarnek-llu yuinaak malruk qulnek cipluku (50) amllertalrianek ataucimek ilangaruqurluci. Tamakut-llu tunluki Levite-anun Agayuviim Pelatekam aulukestainun.”

³¹Moses-aankuk-llu Eleazar-aaq-llu tuaten pillruuk ATANREM alerquuciatun.

³²Makut maa-i anguyallret tegukengallrit ilakluki tegullermeggnun ellaita piknaluki: tiissitsaam avga, yuinaat-wa pingayunelgen akimiarmek cipluku tiissitsaat (675,000) qusngit qusngirngalnguut-llu, yuinaat pingayun qula malrugnek cipluku tiissitsaat (72,000) kuluviit, yuinaat pingayun ataucimek cipluku tiissitsaat (61,000) ciulviit, yuinaq qula malrugnek cipluku tiissitsaat (32,000) neviarcaraat angutem agtuqsailkai.

³³

³⁴

³⁵

³⁶Taukut-llu avgit anguyagtet akurtullrit amllertaluteng, yuinaat akimiaq ataucimek cipluku, akimiaq-wa malrugnek cipluku tiissitsaat, tiissitsaam-wa avga (337,500) qusngit qusngirngalnguut-llu, tuaken-llu tegulluteng tiissitsaam avga, yuinaat pingayun akimiarmek cipluku (675) ATANREM pikainek; kuluviit-wa anguyagtet akurtullrit yuinaq akimiarmek cipluku tiissitsaat (36,000), tuaken-llu tegulluteng yuinaat pingayun qula malrugnek cipluku (72) ATANREM pikainek; ciulviit-wa anguyagtet akurtullrit yuinaq qulnek cipluku tiissitsaat, tiissitsaam-wa avga, (30,500), tuaken-llu tegulluteng yuinarnek pingayunek ataucimek cipluku (61) ATANREM pikainek; neviarcaraat-wa anguyagtet akurtullrit angutem agtuqsailkai akimiaq ataucimek cipluku tiissitsaat (16,000), tuaken-llu tegulluteng yuinaq qula malrugnek cipluku (32) ATANREM pikainek.

³⁷

³⁸

³⁹

⁴⁰

⁴¹Moses-aam makut akiliqurautet Eleazar-aamun tunai elliitnguluki ATANERMUN, elliin alerquuciatun.

⁴²Avgit-llu taukut yugnun cikiutekumallret amllertatkait anguyagten̄un tunumallret: yuinaat akimiaq ataucimek cipluku, akimiaq-llu malrugnek cipluku tiissitsaat, tiissitsaam-wa avga (337,500) qusngit qusngirngalnguut-llu, yuinaq akimiaq ataucimek cipluku tiissitsaat (36,000) kuluviit, yuinaq qulnek cipluku tiissitsaat tiissitsaam-wa avga (30,500) ciulviit, akimiaq ataucimek cipluku tiissitsaat (16,000) neviarcaraat angutem agtuqsailkai.

⁴³

⁴⁴

⁴⁵

⁴⁶

⁴⁷Ukunek Moses-aaq tegutellruuq yugnek ungungssiarnek-llu yuinaak malruk qulnek ciptaqan ataucimek ilangaruqurluni, cikiutekluki-llu Levite-anun Pelatekam Agayuviim aulukestainun ATANREM alerquutii aturluku.

⁴⁸Anguyagtet-llu atanirturtaita ullagaat Moses-aaq,

⁴⁹qanrulluku-llu, “Wangkuta naaqellemten̄i anguyallret atanirtuq'ngaput atauciunge'rmi cataitenrituq.

⁵⁰Taumek waniwa taitaput suulutaat tangnircautet, tallirat, kulutet, aqlitet, uyamiit-llu wangkuta tegulput. Elliitekaput ATANERMUN unguvamten̄un akiliutekluki, elliinun camun pivkaasqevkenata.”

⁵¹Moses-aankuk Eleazar-aaq-llu ciuniurakek tamalkuita tamakut suulutaat tangnircautnguluteng taqumalriit.

⁵²Tapeqluteng-llu tamakut atanerruat elliitekellrit usperluteng yuinaat yuinaat (400) usperet cipluki.

⁵³Atanerruarunrilnguut tau͡gaam tegulteng avaliqluki.

⁵⁴Moses-aankuk-llu Eleazar-aaq-llu agutakek suulutaat Pelatekamun, ATANERMUN camun pivkaasqevkenaki Israel-aam yui.