Read Yupik Numbers 32 Bible Online

Numbers 32 - Yupik bible

Numbers 32

¹Yuullgutkelriartakek Reuben-aankuk Gad-aq-llu ungungssiaraucillruut. Tangllermegni-llu nuniik Jazer-aam Gilead-aam-llu ungungssinun nunakarnillinian,

²ullagakek Moses-aankuk Eleazar-aaq-llu, allat-llu cali yuut ciuliqagtait qanrulluki-llu,

³“Man'a nuna ATANREM ikayurluta piksagucetellra — makunek nunatarluni, Ataroth, Dibon, Jazer, Nimrah, Heshbon, Elealeh, Sibmah, Nebo, Beon-aaq-llu — assilliniuq nunaksunaqluni ungungssinun, amllerrluteng-llu ungungssiuteput.

⁵Canganarqenrilkan elpecen̄i cikiisqumayaaqukut mat'umek nunamek piksagutnaluku. Jordan-aaq qerarpek'naku maancugyaaqukut.”

⁶Moses-aam kiugai, “Ilaci-qaa anguyakata maani uitanaluci piuci?

⁷Ciin nalirrugcetaarceciki ilaci Jordan-aam qerallerkaanek nunamun ATANREM cikiutekellranun ellaitnun?

⁸Ciuliaci tuaten pillruut ayagcetlemni Kadesh Barnea-mek nuna paqtelluku.

⁹Ayallruut Eschol-am kuignayua tekilluku nuna tamaani tangaaluku. Tau͡gaam utercameng ilateng nalirrugcetaarait itlerkaatnek nunamun ATANREM ellaitnun cikiutekellranun.

¹⁰ATANEQ tuani ernermi eq'uqercami akqillruuq qanerluni,

¹¹‘Ukut yuut Egypt-aamek anellret allrakungelriit yuinarmek ayagnirluteng tangerrngaitaat nuna akqutkelqa cikiutekciqniluku Abraham-aamun, Isaac-aamun, Jacob-aamun-llu, tua-i-wa tamalkirrluteng maligtaqunrilatnga.

¹²Tamarmeng iterngaitut Caleb-aaq tau͡gaam Jephunneh-am Kenezzite-am qetunraa, Joshua-llu Nun-am qetunraa, tamarmek elluarrlua niisngallruagnga.’

¹³ATANREM-llu qenqerrucamiki ayagavkallrui yuilqumi yuinaagni malrugni allrakuni imkut ellminun assiilngillret tuquluteng nangnatkaatnun.

¹⁴Waniwa elpeci ciuliarpecetun ayuqluci assiilngurtulriaruuci, arcaqanranek qenrutesqelluki ATANERMUN Israel-aam yui.

¹⁵Elpeci Reuben-aam Gad-am-llu yuini maligcuumiilkuvcen̄i ukut cali yuut uniciiqai maavet yuilqumun, piunriqata-llu piunrillrat elpecen̄un tusngaarkauluni.”

¹⁶Taukut ullagluku Moses-aaq qanrutaat, “Wangkuta katngauteput casguliciqaput nunaliluta-llu asvairqumalrianek irniamta uitavigkaitnek.

¹⁷Nutaan wangkuta ayagyugngariciqukut ilaput ciuliqaggluki anguyagyarturluta nunakaatnun tekiutnatkamten̄un. Ilaput tau͡gaam maantaurniartut nunat asvairqumalriit iluatni alingniurpek'nateng mat'um nunam yuinek.

¹⁸Wangkuta-llu nunamten̄un uterrngaitukut Israel-aam yuin nunakarteng piksagutnatkaatnun.

¹⁹Wangkuta ilalirluki pikamten̄ek pingaitukut Jordan-aam akiani, ak'a maa-i pikangamta Jordan-aam calaralirnerani.”

²⁰Moses-aam qanrutai, “Ilumun tuaten piarkaukuvci waniwa ATANREM tangvallrani anguyagyartullerkarci upyuciu.

²¹Tamarpeci-llu caskulegni qerarciqerci Jordan-aaq, ATANREM-llu pisqutii maliggluku curugciqaci inglukesteput elliin cirlakillerkaanun,

²²nuna-llu pikliutellerkaanun. Nutaan elpeci uterrniartuci pisqumalria elpecen̄un ATANERMUN ilavcen̄un-llu Israel-aam yuinun pimariavciu. Man'a-llu nuna calaralirnerani Jordan-aam ATANREM tangvallrani pikciqerci.

²³Tau͡gaam akqutkellerci atunrilkuvciu aarcirturamci tamana assiilngiutekciqerci ATANERMUN. Assiilngillerci-llu pitekluku anucimirqecetaarumanrilngaituci.

²⁴Tua-i nunalikiciki irniaci, qusngiuteci-llu casguliluki; tau͡gaam akqutkellerci pinricaqunaciu!”

²⁵Gad-am yui Reuben-aam-llu yui qanertut Moses-aamun, “Alerquucirpetun tuaten piciqukut.

²⁶Nuliaput irniaput-llu katngauteput-llu maani Gilead-aam nunaini uitaciqut.

²⁷Wangkuta tau͡gaam anguyagarkaulriani qerarciqukut anguyagyarturluki ATANEQ ataneqluku, qanellren aturluku.”

²⁸Tua-i Moses-aam makunek alerqurai Eleazar-aaq, Joshua-llu allat-llu ciuliqagtait Israel-aam yuin:

²⁹“Gad-ankuk Reuben-aaq-llu yuk'enka qeraqatgu Jordan-aaq anguyagyuumaluteng ATANREM alerquutiini, ikayuqluki-llu elpeci nuna piksaguskuvciu, Gilead-aamek nunakaatnek cikiqiciki.

³⁰Tau͡gaam Jordan-aaq qeranrilkatgu anguyagyarturluteng nunakaatnek cikiqiciki Canaan-aami.”

³¹Gad-ankuk Reuben-aaq-llu yuk'ek qanertut, “Wangkuta ATANREM alerquuciatun piciqukut.

³²Pisqellra maliggluku qerarciqukut anguyagyarturluta Canaan-aamun, piku'urniarput nunautvut calaralirnerani Jordan-aam.”

³³Moses-aam-llu pikitai Gad-am yui, Reuben-aam yui, Manasseh-m-llu yuin avgit, tamalkuan nunautellranek King Sihon-aam Amorite-am King Og-am-llu Bashan-aarmium, nunautekenka-llu avatiigni nuna nunarrartuumaan.

³⁴Gad-am yuin nautenqigtait ukut asvairqumalriit nunat, Dibon, Ataroth, Aroer,

³⁵Atroth Shophan, Jazer, Joghehah,

³⁶Beth Nimrah, Beth Haran-aaq-llu.

³⁷Reuben-aam-llu yuin napartenqiggluki Heshbon, Elealeh, Kiriathaim,

³⁸Nebo, Baal Meon (uum atra cimiumauq), Sibmah-llu. Nunat nautenqigtelteng nutaranek acirturluki pillruit.

³⁹Manasseh-m-llu qetunraan Machir-aam yun'i-llu anguyagluku Gilead-aaq piksagutellrua, Amorite-at tamaantellret tamaaken anlluki.

⁴⁰Moses-aam-llu cikiutekluku Gilead-aaq Machir-aam yuinun taukumiungurrluteng-llu.

⁴¹Jair-am-llu qetunraan Manasseh-m curugluki tegullrui nunacuaraat ilait acirluki-llu “Nunacuarai Jair-am.”

⁴²Nobah-m-llu cali anguyagluku tegullrua Kenath-aaq nunarrartuuman, acinqiggluku-llu Nobah-mek, elliin at'minek.