Read Yupik Numbers 33 Bible Online

Numbers 33 - Yupik bible

Numbers 33

¹Makut maa-i Israel-aam yuin ilakelriartaqluteng arulairvik'lallrita atrit Egypt-aamek ayallermeggni ciuliqagterluteng Moses-aankugnek Aaron-aamek-llu.

²ATANREM alerquutai aturluki Moses-aam igauqurallrui arulairviklermeng atrit.

³Israel-aam yui ayallruut Egypt-aamek iralut ciuqliat ernengqertelluku akimiarmek, Kituutem atuqerraallermeng unuaquani. ATANREM cayailkuciumaluki unitellruat nunarpak Rameses-aaq tangvagterluteng Egypt-aarmiunek.

⁴Ayallruameng Egypt-aarmiut tungmagcinginanratni angutnek yung'eqarraarutmeggnek ATANREM tuquvkallrinek. Tuaten pillermikun ATANREM nasvallrua pininrucini Egypt-aarmiut agayutaitni.

⁵Israel-aam yui Rameses-aamek ayiimeng Sukkoth-amun arulaillruut.

⁶Sukkoth-amek-llu ayiimeng Etham-aamun arulairluteng yuilqum engeliini uitalriamun.

⁷Etham-aamek-llu ayiimeng uterrluteng ayagtut Pi Hahiroth-aamun calaralirnerani Baal Zephon-aam, arulairluteng-llu yaaqsigpek'naku Migdol-aaq.

⁸Pi Hahiroth-aamek ayiimeng imarpik Red Sea-q qeraraat Shur-am yuilqurtaanun; ernerni pingayuni ayaumarraarluteng arulairtut Marah-mun.

⁹Marah-mek ayiimeng Elim-aamun ayallruut, tuani-llu qula malrugnek mermek nunamek ulvelriartangqellinian yuinarnek-llu pingayunek qulnek cipluku (70) napatarluni tuavet arulairtut.

¹⁰Elim-aamek ayiimeng arulairtut imarpiim Red Sea-m canianun.

¹¹Tuaken-llu ayiimeng arulairluteng Sin-am yuilqurranun.

¹²Sin-am-llu yuilqurranek ayiimeng arulairluteng Dophkah-mun.

¹³Dophkah-mek-llu ayiimeng Alush-amun arulairluteng.

¹⁴Alush-amek-llu ayiimeng Rephidim-aamun mer'ilngurmun arulairluteng.

¹⁵Rephidim-amek ayallermeggni Ingrimun Hor-amun arulairaqluteng pilallruut makunun: Sinai-am yuilqurranun, Kibroth Hattaavah-mun, Hazeroth-amun, Rithmah-mun, Rimmon Perez-aamun, Libnah-mun, Rissah-mun, Kehelathah-mun, Mount Shepher-aamun, Haradah-mun, Makheloth-amun, Tahath-amun, Terah-mun, Mithkah-mun, Hashmonah-mun, Moseroth-amun, Bene Jaaken-aamun, Hor Haggidgad-aamun, Jotbathah-mun, Abronah-mun, Eziongeber-aamun Zin-am yuilqurtaanun (tauna Kadesh-auguq), Ingrimun-llu Hor-amun Edom-aarmiut nuniita engeliini.

³⁸Aaron-aam-llu agayulirtem mayuraa Ingriq Hor-aq ATANREM pisqen͞gani. Tuani-llu tuquluni, allrakut yuinaak malruurteqerlukek Israel-aam yuin Egypt-aamek anellrata kinguani, tallimiit iralut ataucimek ernengellrani.

³⁹Yuinaat arvinelgen pingayunek cipluku (123) allrakungluni Aaron-aaq tuqullruuq tuani.

⁴⁰Canaan-aam ungalalirnerani uitalriim Arad-aam angayuqran niitai agiirrniluki Israel-aam yui.

⁴¹Ingrimek Hor-amek ayallermeggni Israel-aam yui Moab-am carr'ilqainun arulairaqluteng makunun pilallruut: Zalmonah-mun, Punon-aamun, Oboth-aamun, Abarim-aam-llu imenrinun Moab-am nuniini, Dibon Gad-amun, Almon Diblathaim-aamun, Abarim-aam Ingriinun, Ingrim Nebo-m yaaqsinrilkiini, Moab-am-llu carr'ilqainun Kuigem Jordan-aam akiani Jericho-mek, akuliigni Beth Jeshimoth-am Kuignayuum-llu Acacia-m.

⁵⁰ATANREM-llu qanrutaa Moses-aaq tuani Moab-am carr'ilqaini Jordan-aami Jericho-m akiani,

⁵¹alerqurluku makunek Israel-aam yuin pillerkaitnek: “Qanruski Israel-aam yui, Jordan-aaq qeraquvciu Canaan-aamun,

⁵²ayagceskiciki nunam tamatum yui. Navgurluki-llu tamalkuita teggalqut caviit-llu agayutait agayularviit-llu.

⁵³Nuna piksagulluku uitaviksagutniarci, wiinga cikiutekellruamku piksagutesqelluku.

⁵⁴Nall'arcetaarutetgun nuna avegniarci naumallgutkelrianun, yugyalriit naumallgutekluteng angelrianek cikiraqluki, yugkilnguut-llu angenrilngurmek.

⁵⁵Tau͡gaam antenrilkuvceteng tamatum yui, tamakut unegtellret arenqianarqelarciqut 'verutetun iivcen̄i wall'u qerruarutetun qaivcen̄i, ingluliurluci-llu callugciqaiceci.

⁵⁶Antenrilkuvciki wiinga piunrirciqamci tamakut piunrirnaluki pillrucimtun.”