Read Yupik Numbers 34 Bible Online

Numbers 34 - Yupik bible

Numbers 34

¹ATANREM Moses-aaq qanrutaa

²waten alerquusqelluki Israel-aam yui: “Itquvci Canaan-aamun wiinga cikiuteklemnun elpecen̄un waten engelkiuqiciu.

³Ungalalirnera nunautevci engelii ayagnirniarci Zin-am yuilqurranek ayagtelluku-llu Edom-aarmiut nuniita engeliikun. Calaralirnera-llu ayagnirluku Dead Sea-am iquanek ungalalirnermek.

⁴Tuaken-llu ungalatmun caqirrluni Akrabbim-aam tungiinun, Zin-akun-llu ayagluni iquklilluni Kadesh Barnea-mun. Tuaken-llu ayagluni Hazar Addar-amun Azmon-aaq tekilluku,

⁵tuaken-llu kuignayuum tungiinun caqirrluni Egypt-aam nuniin engeliinun, iquklilluni imarpigmun Mediterranean-aamun.

⁶“Imarpik Mediterranean-aaq kanaknalirnerem engelekciqaa.

⁷“Neglirneq nunautevci engelii imarpigmek Mediterranean-aamek ayagluku piniarci Ingrimun Hor-amun,

⁸tuaken-llu Hamath Pass-amun cali-llu ayagluni Zedad-amun

⁹Ziphron-aamun-llu, iquklilluni Hazar Enan-aamun.

¹⁰“Calaralirneq-llu engelii Hazar Enan-aamek ayagluni Shepham-amun.

¹¹Tuaken-llu ungalatmun ayagluni Harbel-aamun calaralirnerakun Ain-am, ayagluni-llu cali qeminun calaralirnermi cen̄iini nanvam Galilee-am.

¹²Tuaken-llu cali ayagluni ungalatmun Kuik Jordan-aaq aturluku Dead Sea-mun anellranun. “Ukut waniwa cetaman engelkeciqai nunautevci.”

¹³Moses-aam qanrutai Israel-aam yui, “Man'a maa-i nuna piksagutarkarci nall'arcetaarutekluku, ATANREM alerquutekellra cikiutekesqelluku qulngunrita'arnun avek-wa yuullgutkelrianun.

¹⁴Yuullgutkelriartakek Reuben-aankuk Gad-aq-llu calaralirnermi-llu uitalriit avgit yuin Manasseh-m akurtullruut nunautekameggnek avgumaluni ilakuralriartait cuqekluki

¹⁵calaralirnerani Jordan-aam, Jericho-m akiani.”

¹⁶Atarem qanrutaa Moses-aaq,

¹⁷“Eleazar-aam agayulirtem Joshua-m-llu Nun-am qetunraan avegciqakek nuna yugnun.

¹⁸Ikayurkakegnek piniartuci ilangaruqurluci ataucitaarluki yuullgutkelriit ciulirnerita ilaitnek.”

¹⁹Maa-i makut ATANREM cucukellrin angutet atrit: Kinguvrinek Judah-m, Caleb-aaq Jephunneh-m qetunraa.

²⁰Kinguvrinek Simeon-aam, Shemuel-aaq Ammihud-aam qetunraa.

²¹Kinguvrinek Benjamin-aam, Elidad-aaq Chislon-aam qetunraa.

²²Kinguvrinek Dan-am, Bukki Jogli-m qetunraa.

²³Kinguvrinek Manasseh-m, Hanniel-aaq Ephod-aam qetunraa.

²⁴Kinguvrinek Ephraim-aam, Kemuel-aaq Shiphtan-aam qetunraa.

²⁵Kinguvrinek Zebulun-aam, Elizaphan-aaq Parnach-aam qetunraa.

²⁶Kinguvrinek Issachar-am, Paltiel-aaq Azzan-aam qetunraa.

²⁷Kinguvrinek Asher-aam, Ahihud-aaq Shelomi-m qetunraa.

²⁸Kinguvrinek Naphtali-m, Padahel-aaq Ammihud-aam qetunraa.

²⁹Makut maa-i ATANREM nakmikellri Israel-aam yuinun nuna avgesqelluku Canaan-aami.