Read Yupik Numbers 35 Bible Online

Numbers 35 - Yupik bible

Numbers 35

¹Moab-am carr'ilqaini kuigmi Jordan-aami Jericho-m akiani ATANREM qanrutaa Moses-aaq,

²“Alerqurki Israel-aam yui nunameggni akurtuq'ngameggni nunarpiit ilaitnek Levite-at uitavigkaitnek cikiisqelluki, avatait tamakut nunarpiit ungungssiutaitnun uitavigkauluni.

³Nunarpiit makut Levite-at pikciqait uitavikarkauluki. Maraq-llu avataitni kuluvautaita allat-llu ungungssiutaita uitavigkaqluku.

⁴Tamana-llu maraq cuq'liumaarkauluni nunarpiim qacarneranek tiissitsaam avganek yaaltanek elatmun avataini tamalkuita,

⁵yaassiigenqelriaruarkauluni maraq, menglai cetaman taktaaqluteng tiissitsaanek yaaltanek, nunarpak qukamenani.

⁶Cali-llu Levite-at cikirniaci arvinlegnek nunarpagnek qimagvigkanek, yuk pitsaqa'artevkenani ilaminek tuqucikuni tamakut iliitnun qimagarkauluni. Taukunun-llu cali ilakluki yuinaak malruk malrugnek cipluku (42) cali allanek nunarpagnek cikirniaci

⁷maramek avatetuumaita, tapeqluteng nunarpiit amllertaluteng yuinaak malruk pingayunlegnek cipluku (48).

⁸Nunarpiit-llu Levite-anun cikiutekait kinguveqellrianun ataarkauluteng yugyagtaciitnun nunautiita-llu angtaciitnun. Yugyalriani nunauterpaulriani-llu amllenruarkauluteng, yugkilngurni-llu nunautait-llu mikellrulriani ikgellruluteng.”

⁹ATANREM qanrutaa Moses-aaq

¹⁰qanrutesqelluki Israel-aam yui: “Qeraquvciu Kuik Jordan-aaq iterluci-llu Canaan-aamun,

¹¹cucuklirciquci nunarpagnek yuut pitsaqevkenateng tuqucillret qimagvigkaitnek.

¹²Tuani qimaumalarciquq tuqumalriim tungayainek akinauringnaqellrianek. Tuqucilleq tauna tuqucimaarkaunrilan qanercetaarumavailegmi.

¹³Cucuklirluci arvinlegnek nunarpagnek,

¹⁴pingayunek calaralirnerani Jordan-aam, pingayunek-llu Canaan-aami.

¹⁵Taukut arvinelgen nunarpiit qimagviuniartut Israel-aam yuinun, allanernun, wall'u carrarmek wall'u ak'anun uitalrianun. Kina imna pitsaqa'artevkenani tuqucilria qimagyugngaluni taukut iliitnun.

¹⁶“Tau͡gaam yuk tuqucikan caskulirluni cavigmek wall'u teggalqumek wall'u muragmek, nallunaunani pitsaqluni tuqucilriaruuq. Tauna tuquskiciu.

¹⁹Tuqutaullrem taum malleggluku tungelqurran tuqutarkaugaa tauna tuqucilleq tangerquniu.

²⁰“Angutem-llu eq'ukekni tuquskaku callugluku wall'u camek milqerluku

²¹wall'u tenglugluku, pitsaqluni tuqucilriaruami tuqucimaarkauguq. Tuqutaullrem taum malleggluku tungelqurra pillerkiurumauq tauna tuqucilleq tuqutarkauluku tangerquniu.

²²“Tau͡gken cali angutem eq'ukenrilken̄i pitsaqa'artevkenaku tuquciiqaa, iqulluku wall'u camek milqerluku.

²³Wall'u murilkevkenani teggalqumek milqaquni, yuk-llu pitsaqa'artevkenaku nall'arciiqaa tuquvkarluku, inglukestekevkenaku-llu.

²⁴Watnalriamek pilriartangqerqan yuut cuqciiqagket tuqucilleq tungelqurra-llu akinaurutestekaa, picirkiuteteng aturluki.

²⁵Yuut-llu anirturarkauluku tauna pitsaqa'artevkenani tuqucilleq tungelqurranun tuqutellran akinaurcetevkenaku, ut'rulluku-llu nunarpagmun qimagvikellranun. Tuani-llu uitaarkauluni taum nalliini agayulirten͞gunrulria tuqunatkaanun.

²⁶Tau͡gken cali tuqucillrem uniskaku nunarpak qimagvikellni

²⁷tuqutaullrem-llu tungelqurran tangerrluku tauna tuquskaku, watnaluni akinaurutmek tuqucilria pinarqelriarunrituq.

²⁸Tua-i-wa angun tauna tuqucilleq uitaurararkauyaaqngan tuani nunarpagmi qimagviklermini agayulirten͞gunrem tuqunatkaanun. Tuqullran tau͡gaam kinguani utercugngariarkauluni kingunerminun.

²⁹Makut picirkiutet atuugarkaugut elpecen̄un kinguverpecen̄un-llu nani uitallerpecen̄i.

³⁰“Yuk yuullgutminek tuqucilria tuqucimaarkauguq atauciunrilngurmek tau͡gaam nallunritestengqerquni. Ataucim yuum nallunritesten͞guluni qanellrakun pinaqniluku tuquciarkaunrituci.

³¹Pitsaqluni tuqucilleq tuqucimaarkauguq. Akilirluni anagciigataa anucimirqecetaarutkani.

³²Angun qimalleq nunarpagmun qimagviulriamun akilirtelluku utertessngaitarci kingunranun agayulirten͞guneq tuquvailgan.

³³Tuaten pikuvci menuurceciiqerci nuna uitavigci. Pitsaqluni tuqucilriim menuurtelaraa nuna, taum-llu tuqucillrem tuqucimallran avatiini allamek menuircautekaunani nuna yuum tuqutauvikellra.

³⁴Menuliryaqunaciu nuna uitavigci, wiinga ATANRUAMA, Israel-aam-llu yui uitavikluki.”