Read Yupik Numbers 7 Bible Online

Numbers 7 - Yupik bible

Numbers 7

¹Ernermi tuani Moses-aam qaqicamiu napartellra Pelatekam ATANREM alailarvigkaa mingullrua allakarluku-llu aklutuumaan. Tuaten-llu cali piluku ekuavik aklui-llu.

²Ilakellgutkelriit ciulirnerit ciuliqagten͞guluteng Israel-aam yuini ataniumastekellrit yugnek naaqilriit,

³taitut elliitekluki ATANERMUN ayagassuutnek qilakutalegnek arvinlegnek, kuluvagnek-llu qula malrugnek cipluku. Atauciq qilakutalek ayagassuun malrugnun ciuliqagtegnun tusngaluni, kuluvagngalnguut-llu ataucitaarluteng tamalkuitnun tusngaluteng. Cikiutekumariitki

⁴ATANREM qanrutaa Moses-aaq,

⁵“Ciuniurki tamakut elliitait atuuniartut Pelatekam caliaqellranun; tunluki Levite-anun caliaqerkait cuqekluki.”

⁶Tua-i Moses-aam tamakut elliitellret ayagassuutet kuluvagngalnguut-llu tunai Levite-anun.

⁷Gershon-aam qetunrai cikirai malrugnek ayagassuutegnek cetamanek-llu kuluvagngalngurnek caliarkait cuqluki;

⁸cetamanek-llu ayagassuutnek, pingayunlegnek-llu kuluvagngalngurnek Merari-m qetunrai cikirluki caliarkait cali cuqluki ataniumastiitgun Ithamar-akun Aaron-aam Agayulirtem qetunraakun.

⁹Kohath-am tau͡gaam qetunrai cikinritai caliaqelaitki qigcignarqelriit qugluteng ayagacarat.

¹⁰Tamakut-llu cali ciuliqagtet elliillruut naaqicimallerkaanun ekuaviim. Elliitekateng elliarkaurcatki ekuavigmun,

¹¹ATANREM qanrutaa Moses-aaq, “Qanruski ernerni ukuni qula malrugnek cipluku unuaquaqan ataucitaarluki elliitekait ekuaviim naaqicimallerkaanun taiquraasqelluki.”

¹²Ciuqliatni erenret elliiqerraallruut Judah-mek nauvilget ciuliqagterluteng Nahshon-aamek Amminadab-aam qetunraanek; erenret aipaatni Issachar-amek nauvilget Nethanel-aamek Zuar-am qetunraanek ciuliqagterluteng; erenret pingayuatni Zebulon-aamek nauvilget ciuliqagtiit-wa Eliab-aaq Helon-aam qetunraa; erenret cetamiitni Reuben-aamek naumavilget ciuliqagtiit-wa Elizur-aaq Shedeur-am qetunraa; erenret tallimiitni Simeon-aamek nauvilget ciuliqagtiit-wa Shelumiel-aaq Zurishaddai-am qetunraa; erenret arvinelgatni Gad-amek nauvilget ciuliqagtiit-wa Eliasaph-aaq Deuel-aam qetunraa; erenret malrunelgatni Ephraim-aamek naumavilget ciuliqagtiit-wa Elishama Ammihud-aam qetunraa; erenret pingayunelgatni Manasseh-mek nauvilget ciuliqagtiit-wa Gamaliel-aaq Pedahzur-am qetunraa; erenret qulngunritariitni Benjamin-aamek nauvilget ciuliqagterluteng Abidan-aamek Gideoni-m qetunraanek; erenret qulngurutiitni Dan-amek naumavilget ciuliqagtiit-wa Ahiezer-aaq Ammishaddai-am qetunraa; erenret qula ataucimek ciptellratni Asher-aamek n(...)

⁸⁴Quyurmeng ukut ciuliqagtet elliitellrit naaqicimallerkaanun ekuaviim amllertaluteng; qula malrugnek cipluku qerrirlit qantat ermigcuutet-llu, quyurmeng uqamaltaluteng yuinarnek pingayunek (60) uspernek, qula malrugnek cipluku suulutaat qantat aruviarkamek imalget uqamaltaluteng yuinaak malruk akimiaq pingayunek cipluku (48) usperem cetyagainek, qula malruk nulirtet, qula malruk angucalut qusngit, qula malruk ataucimek allrakungelriit qusngiyagaat, cali-llu mukaarkat elliitet taprit tamakut ekualuki elliitnguarkauluteng, qula malrugnek cipluku qusngirngalnguut assiilnguum au͡gautekaanun elliitekat, yuinaq cetamanek cipluku (24) nulirtet, yuinarnek-llu pingayutaarluteng (60) angucalut qusngit, qusngirngalnguut, ataucimek-llu allrakungelriit qusngiyagaat ilakuyucimun elliitekat.

⁸⁹Moses-aaq-llu itlermini Pelatekamun qalarucarturluku Agayun, niitaa ATANREM qanrutellrani Akqutem Yaassiigan patuan quliinek cherubim-aak akuliignek.