Read Yupik Numbers 8 Bible Online

Numbers 8 - Yupik bible

Numbers 8

¹ATANREM qanrutaa Moses-aaq,

²“Qanrusgu Aaron-aaq, Kenurrat ellikuvki manutmun ciqinqerarkaurtelluki pikiki.”

³Aaron-aaq-llu tuaten piuq elliluki kenurrat manutmun ciqinqerarkaurtelluki, ATANREM alerquuciatun Moses-aaq.

⁴Kenurrarvik-llu tauna taqumauq mulut'uugumalriamek suulutaamek, aciminek ayagluni kangminun ATANREM ayuqucirtuutekellra aturluku.

⁵ATANREM qanrutaa Moses-aaq,

⁶“Allakarki Levite-at Israel-aam yuinek menuircarluki-llu

⁷waten: mermek menuircautmek ciqertarluki qaingitni-llu tamalkuita melqurrit ungairutakun keligluki, aturait-llu ervigtelluki. Tuaten pikuneng menuiruciiqut.

⁸Taitelluki-llu nulirteyagarmek tapirluku mukaarkanek elliitnek olive-aam uquanek urcimalrianek, cali-llu allamek nulirteyagarmek assiilnguum au͡gautekaanun elliitekamek.

⁹Yuut quyurcetraarluki Levite-at nangercetniaten Pelatekam ATANREM alailarvigkaan ciuqerranun.

¹⁰Yuut-llu unataitnek pategtelluki Levite-at qamiqurritgun,

¹¹nutaan-llu Aaron-aam allakarciqai Levite-at Israelite-anun wangnun elliitekevkarluki, ellaita caliaqniaraat caliaka.

¹²Cali-llu Levite-at unateteng elliciqait nulirtet qamiqurritnun; elpet-llu atauciq elliitekciqan assiilnguum au͡gautekaanun, aipaa-llu ekuagarkauluku ATANERMUN, Levite-at assiilnguita au͡gautekaatnek.

¹³“Levite-at kevgiulriarurceciiqaten Aaron-aamun qetunrainun-llu, elliitnguluki wangnun yagulluku elliiyarakun.

¹⁴Waten piluki allakarki Levite-at Israel-aam yuinek, wiinga piksagutnianka.

¹⁵Levite-at-llu menuircaumarikuvteng elliitekumariluki-llu yagulluku elliiyarakun, ayagluteng Pelatekamun kevgiuryarturniaraatnga.

¹⁶Wiinga piksugluki pillruanka enairulluki Israel-aam yuin yung'eqarraarutaitnun, wiinga kiima piknaluki.

¹⁷Tua-i-wa Israel-aam yuin yung'eqarraarutait tamalkuita wiinga piksagutellruamki, yuungraata ungungssiungraata-llu; tuani ernermi tuqurqellemni yung'eqarraarutait Egypt-aarmiut, Israel-aam yuin yung'eqarraarutait allakallruanka wiinga pikarkaurrluki.

¹⁸Maa-i-llu wiinga teguanka Levite-at enairulluki yung'eqarraarutaitnun Israel-aam yuin.

¹⁹Wiinga-llu cikiutekanka Levite-at Israel-aam yuinek Aaron-aamun qetunrainun-llu, ellaitnun calicit'laasqelluki yuut Pelatekami, cali-llu assiilnguita au͡gautekaatnek pilaasqelluki, cangerlagpiit tut'esqevkenaki Israel-aam yuinun pitsaqevkenani yuut iliita Agayuvik malkaku.”

²⁰Waten pillruit Levite-at Moses-aam Aaron-aam Israel-aam-llu yuin; ATANREM alerquutellra Moses-aamun aturluku Levite-at pitekluki.

²¹Levite-at-llu menuircartut assiilngurmek ervigluki-llu aturateng; Aaron-aam-llu elliitekai yagulluku elliiyarakun ATANREM ciuqerrani, cali-llu ekuagiluni assiilnguita au͡gautekaatnek.

²²Yuut-llu piurallruit tamalkuita ATANREM alerquutekellri Moses-aamun Levite-anun pisqelluki. Tamatum-llu kinguani Levite-at agellruut Pelatekamun kevgiullerkarteng Aaron-aamun qetunrainun-llu caliaqsarturluku.

²³ATANREM qanrutaa Moses-aaq,

²⁴“Allrakungellermeggnek yuinaq tallimanek cipluku (25) Levite-at caliyugngalarciqut Pelatekami,

²⁵arulairaqluteng yuinaak malruk qulnek cipluku (50) allrakungaqameng.

²⁶Taum kinguani Agayuvigmi ikayuayugngaciqait, tau͡gaam kiimenateng caliarkauvkenateng. Waten ayuqluki calivkalarciqaten Levite-at.”