Read Yupik Numbers 9 Bible Online

Numbers 9 - Yupik bible

Numbers 9

¹Cali ATANEQ qanellruuq Moses-aamun Sinai-am yuilqurrani allrakum aipaan iraluin ciuqliatni anellrata Egypt-aam nuniinek, qanerluni,

²“Israel-aam yuinun Kituun aturteskiu piyaraani.

³Ernengkan akimiarunrita'armek tauna iraluq, atakumi aturniarci piyaraa tekiskan; alerquusngalriit tamalkuita taum atullerkaanun aturluki piniartuci.”

⁴Tua-i Moses-aam qanrutai Kituun atuusqelluku.

⁵Kituun-llu aturaat iralut ciuqliatni akimiarunritariitni erenrin atakumi Sinai-am yuilqurrani; ATANREM alerquutellra Moses-aamun aturluku tua-i tuaten pillruut Israel-aam yui.

⁶Tau͡gaam yugtangqellrulliniuq menuurtellernek agtullrulliniamegteggu tuqumalriim temii, Kituun-llu aturciiganaku tuani ernermi; taumek tuani ernermi taukut ullallrulliniagket Moses-aankuk Aaron-aaq-llu.

⁷Waten-llu qanrullukek, “Wangkuta menuulriaruukut agtullruamteggu tuqumalriim temii; ciin elliisciigatevkarcecikut piyarami ilaput Israel-aam yui ilagarluki?”

⁸Moses-aam-llu kiugai, “Uitaqerci niitnatkamnun ATANERMEK qaillun piarkaucirpecen̄ek.”

⁹ATANREM-llu qanrutaa Moses-aaq,

¹⁰“Israel-aam yui qanruski, Ilasi wall'u kinguverpeci iliit agturluku tuqumalriim temii menuurtellrung'e'rmi wall'u ayaumallrunge'rmi, Kituun aturyugngaciqaa ATANERMUN.

¹¹Erenret akimiarunritariitni iralum aipaan atakumi atularciqaat; ner'arkauluku avuluku quulecirailngurnek kelipanek qatlinarqelrianek-llu naunrarnek.

¹²Ilakuingaunateng-llu unuaqullerkaanun, enranek-llu ayemcingaunateng; atullerkaanun-llu alerquusngalriit tamalkuita maligtaquluki aturarkauluku.

¹³Tau͡gaam yuk menuileng'e'rmi ayaumanrilngermi-llu Kituun aturyuumiilkuniu yum'inek au͡gaumaciquq, elliiyaraq ATANERMUN piyaraani atunrilamiu. Assiilngillra elliinun tusngaciquq.

¹⁴Allanrulria-llu nunavcen̄i ilaucukuni Kituun atuquvciu pivkarciqerci, tau͡gaam Kituutem atullranun picirkiutet aturluki piarkauluni; ataucimek picirkiutengqerciquci nutem tamatum yuinun allanrungraata-llu.”

¹⁵Ernermi tuani Pelatekaq napartellratni amirlum patullrua.

¹⁶Unugaqan amirluq kenertun ayuqliriaqluni, arulaiyuunatek-llu piurallruuk, amirluugaqluni erenrani kenrurrluni-llu unugmi.

¹⁷Amirlum-llu Pelatekaq unitaqaku quliinun piluni Israel-aam yui upalallruut, natmun-llu cali arulairan ellait-llu tuavet arulairluteng.

¹⁸ATANREM alerquraqateng Israel-aam yui upalartut, cali-llu alerquraqateng arulairaqluteng; amirlum uitallran taktaciatun Pelatekam quliini uitauralartut uitavimeggni.

¹⁹Amirluq-llu uitamangraan Pelatekam quliini Israel-aam yui ATANREM picirkiutii aturluku ayayuitut.

²⁰Tau͡gaam iliini ernerni qavcirrarni amirluq uitalartuq Pelatekam quliini, tua-i-llu Israel-aam yui uitalartut ayagluteng-llu ATANREM pisqutii aturluku.

²¹Iliini-llu amirluq uitalartuq atakumek ayagluni unuakumun; amirluq unuakumi nalugaqan ayagaqluteng. Tuaten piurallruut amirluq tau͡gaam nalugaqan ayagaqluteng.

²²Erenregni malrugni pingraan, wall'u iralumi wall'u ak'anun, amirluq Pelatekam quliini uitaura'rqan Israel-aam yui upayuitut, nalugaqan tau͡gaam ayagaqluteng.

²³ATANREM alerquutii Moses-aakun maligtaquluku uitallerkameggnun elkartelallruut wall'u upagluteng.