Read Yupik Micah 2 Bible Online

Micah 2 - Yupik bible

Micah 2

¹Angelriamek angniitnarqeciqvagta, unugmi qavarpek'nateng assiitellriamek picirkiulalrianun! Unuakuurtaqan, egmian pillerkangutmeggni, picirkiulteng assiitellria atularaat.

²Piksugiilartut allat naucetaarviitnek, teguigaqluki-llu; enenek piugaqameng, tegularait. Kia imum ilai aklui-llu caperqevkenaki.

³Taumek ATANEQ qanertuq, “Wiinga picirkiurtua taitnalua picurlagmek elpecen̄un, qimagciigaciiqercii-llu. Arenqiallugutmun ellangarkauguci, tuani-llu ucuryaggluci piyuangaituci.

⁴Tauna erneq tekiskan, yuut qanemcilarciqut elpecen̄ek ayuqestassiigutekluci picurlagmun, mat'umek-llu nanikuanam yuarutiinek aturciqut elpeci qaillun pillrucirpecen̄ek: “Navguumaqapigtukut! ATANREM nunaput tegullrua Tunluku-llu teguaqestemten̄un.”

⁵Tua-llu, nunam utercecimallerkaa tekiskan ATANREM yuinun, ilasi atauciunge'rmi pikangqerrngaituq.

⁶Yuut qalarut'laraatnga qanerluteng-llu, “Qalarutenrilkut. Tamalkuitnek tamakunek qalarutenrilkut. Agayutem kasnguyugtessngaitaakuk.

⁷Umyuartequten-qaa Israel-aam yui aniqlaamayukluki? Ataneq-qaa nerinisngialliquq? Ilumun-qaa tuaten ayuqellrianek piyugngauq? Ellii-qaa qalarcetunrituq unganaqluni elluam aturtainun?”

⁸ATANEQ kiuguq, “Curukalaraci yuunka inglukelriacetun, aturaitnek teguilaraci ellmegteggun piuralriit, anguyallerkameggnek umyuarteqevkenateng kitu'urqaceci.

⁹Arnait yum'a antelaraci uitanqegcinarqellrianek enaitnek; irniarit-llu teguillruaci atawaqautekamnek akwarpak.

¹⁰Nangerrluci ayagci, una mernuinercirvigkarniirutuq. Assiilngurpeci nau͡gguirviilngurmek piunriumaarkaurcetellrua.

¹¹“Kina imna yuk wavirtaaqan qalareskan piciunrilngurnek iqluurutnek-llu, qanerluni, ‘Qalaruciiqamci wine-amek tuknilriamek-llu taangamek,’ tauna tua-i nutaan ukunun yugnun qalarutestekarniryartuq!

¹²“Pinritevkenii tamarpeci quyurciiqamci Jacob-aam yuini, quyurciiqanka Israel-aam yui unegtauqallret; nek'egciiqanka quyurrluki qusngitun uitavimeggni uitalriatun, katngagtun marami nervimeggni uitalriatun, nunasi ataam yugyangciquq.”

¹³Agayutem ikiruciiqai tumkaatnek, ciuliqaggluki-llu nuniitnun ut'rulluki. Nunarpiim casguin ikirtuqaikun navguulluteng anciqut. Atanrata, ATANREM tungaunani, anuciiqai ciuliqaggluki.